Nehemia

1 Hane hi la itre trengewekë i Nehemia nekö i Hakalia, hmekune la treu Kiselu, ngöne la kola 20 lao macatre ne mus i joxu,* lo eni e Susani, traon ne la joxu. 2 Hnei Hanani ketre trejin me eni, hna ce bëeke me itre xa trahmanyi ne Iudra, nge eni a hnyingë nuvele jë koi angatr, göne la itre atre Iudra ka bëeke qa ngöne la nöje trenyiwa, me itre nuvel göi Ierusalema. 3 Öni angatr: “Ame la itre ka mele pe, nge ka bëeke kowe la itre provës, jole catr angatr, nge nyine hmahmane la mele i angatr. Kei hë la itre ihag e Ierusalema, nge hna manith asë la itre qëhnelö.”

4 Matre ame hë la eni a drenge lai, hnenge hna pane lapa me treij. Nge nyimu drai ne pane hnë meci ni, me tha xen, me thithi kowe la Akötresie ne hnengödrai. 5 Öning: “Iehova fe, Akötresie ne hnengödrai, Akötresie ka draië nge nyine xouen, atre metrötrëne la isisinyikeu i nyidrë, nge ka amamane la ihnimi nyipici nyidrë kowe la itre ka hnimi nyidrë, nge ka trongëne la itre wathebo i nyidrë, 6 epi tro la lue hnangenyë i nyipëti a dreng, nge epi fe pi la luemeke i nyipë. Pane drenge ju la thithi ne la hlue i nyipë, la hnenge hna thithi fë koi nyipëti enehila. E lai me jidr, eni a thithi fë la angetre Isaraela lo itre hlue i nyipë, nge eni a qaja amamane la itre ngazo hnei angatr hna kuca koi nyipë. Ke eje hi, hne huni hna ngazo koi nyipë, eni me nöjeng. 7 Tha fene ngazo kö la hne huni hna kuca, ke tha trongëne kö huni la itre wathebo, me itre hna amekötin, me itre hna isenyin, lo hnei nyipëti hna hamëne koi Mose hlue i nyipë.

8 “Matre epi tha tro kö nyipëti a thëthëhmine la hnei nyipë hna amekötine koi Mose hlue i nyipë, lo öni nyipë: ‘E tha mele nyipici hë epun, tro hë ni a isa ije epun nyipine la itre nöj. 9 Ngo e tro epuni a bëeke koi ni, me metrötrën me trongëne la itre wathebong, ngacama hna isa ije epuni uti hë la ketre cane la hnengödrai, ngo tro hmaca kö ni a acasi epun, me bëeke sai epun kowe la götran hnenge hna iën troa amë la ëjeng.’ 10 Angatre la itre hlue i nyipë, me nöje i nyipë, lo hnei nyipëti hna amelen* hnene la etrune la mene i nyipë, me ime ka catre i nyipë. 11 Matre Iehova fe, epi tro la lue hnangenyë i nyipëti a drenge la thithing, me thithi ne la itre xa hlue i nyipë, itre ka madrin troa xouene la ëje i nyipë. Epi tro nyipëti a kuca matre troa eatr la hnenge hna pi kuca, nge tro la joxu a utipi ni.”

Ngöne la ijine cili, hna acili ni troa kepe trepe ime i joxu.