Nyima i Solomona
1 Nyima* ka sisitria hna sil hnei Solomona:
2 “Pane aba ni jë hnene la ukeineqë i ö,
Ke ka sisitria kö la itre hatrene ihnim i ö hune la waina.
3 Ka pui lolo la itre oel i ö.
Ceitune hi la ëje i ö me oel ka pui lolo hna neng.
Celë hi matre, itre nekö jajinyi a aja eö.
4 Xomi* ni jë; kötre sai ni jë.
Ke hnene la joxu hna alö ni ngöne la itre hnahag i nyidrë!
Ce madrine jë, ce madrine jë so.
Ce atrune* jë so la itre hatrene ihnim i ö ka sisitria hune la waina.
Nyipici angatr* la angatr a hnimi ö.
5 Itre nekö jajinyi ne Ierusalema fe, ngacama ka wetrewetre ni ngo ka mingöminge kö ni,
Tune la itre itat ne Kedara, me tune la itre imaano ne la itre itate i Solomona.
6 The goeën amenyi ni kö, ke ka wetrewetre ni,
Hnene la jö hna goeën huti ni.
Hnene la itre nekö i nenë trahmany hna wesitre koi ni;
Hnei angatr hna upi ni troa thupën la itre vin,
Ngo ame pë hë la vineng, tha hnenge kö hna thupën.
7 Hniminange fe, qaja jë koi ni,
Ekaa la hnei ö hna engëne la itro öni i ö?
Ekaa la hnei ö hna engë angatr troa mano e hnaipajö?
Hnauëne laka, tro ni a tun la ketre föe ka atu ialamek*
Nyipine la hnënge öni ne la itre sinee i ö?”
8 “Maine thatre kö eö, eö föe ka mingöming hune la nöjei föe,
Xötrethenge jë la itre thupa ca ne la itre öni
Nge engëne jë la itre neköi nani i ö ezin la itre itat ne la itretre thupë öni.”
9 “Hniminange fe, mingöminge catr eö, tune la ketre hose föe* ka hule la itre ikariota i Farao.
10 Hna thaipin la lue itrasitre i ö hnene la itre nyine amingömingön,*
Memine la nyinawa i ö hnei fini penina.
11 Tro huni a kuca thatraqai ö la itre nyine amingömingön* gool
Hna nyixan hnei sileva.”
12 “Ame la joxu a lapa ngöne la laulau i nyidrë ka raon,
Kola punepun xötreithe la senitreng.*
13 Ceitune hi la hniminang me trengene muro* ka pui lolo
Hneng hna meköle fë nyipine la lue thing e jidr.
14 Ceitune hi la hniminang memine la ketre feja ka pui lolo*
Nyipine la itre vin e Enigedi.”
15 “Mingöminge catr eö jajinyi hniminang!
Mingöminge catr eö! Ceitune hi la luemeke i ö memine la luemeke ne piny.”
16 “Nekö trahmanyi hniminang, mingöminge catr eö e tro na wang!
Itre dröne hnitr la ili i nyiso.
17 Itre sinöe arasi la itre agö ne la uma* i nyiso,
Nge itre göti la ka nyi iplafo.