Angetre Amekötin

1 Thupene la hna mec hnei Iosua, hnene la angetre Isaraela* hna hnyingë Iehova ka hape: “Drei qaathe hun la ka troa tro pa troa isi memine la angetre Kanana?” 2 Öni Iehova jë hi: “Tro la tribu i Iudra a tro pa. Goeën: eni a nue* la nöj kowe la ime i angatr.” 3 Ame hnene la itre trahmanyi ne Iudra hna qaja kowe la itre trahmanyi ne Simeona, lo itre trejin me angatr ka hape: “Trohemi matre tro sa lep la angetre Kanana ngöne la götran* hna hamë hun. Thupene lai, tro sa ce tro kowe la götran hna hamë epun.” Matre hnene pë hë la itre trahmanyi ne Simeona hna ce tro me angatr.

4 Ame hë la angetre Iudra a tro troa isi, hnei Iehova hna aijijë angatr troa ngaane la angetre Kanana me Perizi, me lep la 10 000 lao trahmany e Bezek. 5 Hnei angatr hna öhnyi Adonibezek e Bezek me isi me angeic, me lepe la angetre Kanana me Perizi. 6 Ngo hnei Adonibezek hna kötr. Matre hnei angatr hna weji angeic, me e angeic, me thupa la lue hene wanakoime* i angeic, me lue hene wanakoca* i angeic. 7 Nge öni Adonibezek jë hi: “Traqa koi 70 lao joxu hna thupa la itre hene wanakoim me itre hene wanakoca, ka hlem la xen ka mala fene la laulaung. Hnei Akötresieti hna kuca koi ni, tune lo hnenge hna kuca koi angatr.” Thupene lai, hna tro sai angeic a tro Ierusalema, nge hnei angeic hna mec e cili.

8 Ketre, hnene la itre trahmanyi ne Iudra hna lepi Ierusalema, me thapa la traon; hnei angatr hna humuth la itre atren hnei taua, me dreuthetrije la traon. 9 Thupene lai, hnene la itre trahmanyi ne Iudra hna tro troa isi memine la angetre Kanana ka lapa ngöne la itre wetr, memine la Negeb memine la Sefela. 10 Ame hnene la itre trahmany ne Iudra hna tro troa isi memine la angetre Kanana ka lapa e Heberona. Nge hnei angatre hna lepi Sesai, me Ahiman, me Talemai. (Hna hë Heberona ekö, Kiriath-Areba.)

11 Qa cili, hnei angatr hna tro troa isi me angetre Debira. (Hna hë Debira ekö, Kiriatha-Sefer.) 12 Matre öni Kaleba jë hi: “Tro ni a hamë Akesa lo neköng jajinyi kowe la atr ka troa lep me thapa la traon ne Kiriatha-Sefer.” 13 Ame hnei Otheniela nekö i Kenaza, jini Kaleba, hna thapa la traon. Matre hnei Kaleba hna hamë Akesa nekö i nyidrë, nyine föi Otheniela. 14 Nge ame hë la Akesa a tro koi Otheniela, hnei angeic hna ielene la föi angeic troa sipo hnepadro kowe la keme i angeic.* Thupene lai, hnei angeic hna uti* qa hune la boliko i angeic. Matre öni Kaleba jë hi: “Nemene la aja i ö?” 15 Sa jë hi angeic ka hape: “Epi amanathithi ni hnei nyipë kaka, ke ase hë nyipëti lo hamë ni la ketre götran e kolojë.* Hamë ni pi fe la götran e Guloth-Maim.”* Ame hnei Kaleba hna nue Guloth e Koho, me Guloth e Kuhu koi angeic.

16 Hnene la itre matra ne la atre Keni, lo hmihmi* i Mose, hna tro qa ngöne la traon ne la itre pama* memine la nöje Iudra, matre tro kowe la hnapapa ne Iudra, ngöne la götrane kolojë ne Arada. Nge e cili, hnei angatr hna ce lapa memine la nöj. 17 Nge hnene la itre trahmanyi ne Iudra hna ce tro memine lo itre trejin me angatr qa Simeona, matre lep la angetre Kanana ka lapa e Zefath. Hnei angatr hna lep apatren la traon, celë hi matre hna hën la traone cili ka hape, Horema.* 18 Thupene lai, hnei Iudra hna thepe Gaza me itre götran ej, me Asekelona me itre götran ej, me Ekerona me itre götran ej. 19 Ce Iehova memine la itre atre Iudra, matre hnei angatr hna thapa la itre wetr. Ngazo pe, thatreine kö angatr troa helën la itre atr ka lapa ngöne la gaa paapa, ke hetrenyi angatr la itre ikatr hna acatrene la itre fao ka ixöj* ngöne la itre wil. 20 Nge hna hamë Heberona koi Kaleba, tune lo hna amekötin hnei Mose, nge hnei Kaleba hna helën qa cili la köni nekö i Anaka.

21 Ngo tha hnei angetre Beniamina kö hna helëne la angetre Iebusi ka lapa e Ierusalema. Matre uti pala hi enehila, angatr a ce mel memine la angetre Iebusi e Ierusalema.

22 Ngöne la ijine cili, hnene la itre matra i Iosefa hna tro troa lepi Bethela, nge ce Iehova me angatr. 23 Hnene la itre matra i Iosefa hna tro juetrë troa waipengön e Bethela. (Luza ekö la ëjen la traone cili.) 24 Ngöne la ketre drai, hnene la itre espio hna öhne la ketre trahmanyi ka tro qa ngöne la traon. Matre öni angatre jë hi koi angeic: “Pane amamai huni jë la aqane troa lö kowe la traon, nge tro hë huni a utipi ö.”* 25 Ame hnei angeic hna amamai angatr la aqane troa lö kowe la traon. Matre hnei angatr hna humuth asë la itre atren la traon hnei taua, ngo hna nue pe kö lo trahmanyi memine la fami i angeic. 26 Thupene lai, hnene la atre cili hna tro kowe la nöj i angetre Heth, me xupe la ketre traon me ati ëjen, Luza, nge tha saze kö la ëjene la traone cili uti pala hi enehila.

27 Tha hnene kö la tribu i Manase hna thepe Bethe-Seana me itre götran ej, me Tanaka me itre götran ej, me Dora me itre atren me itre götran ej, me Ibeleama me itre atren me itre götran ej, me Megido me itre atren me itre götran ej. Ngo xele kö la angetre Kanana ma mejë qa lai. 28 Matre ame hë la kola catr hnene la angetre Isaraela, hnei angatr hna folosan la angetre Kanana. Ngazo pe, tha hnei angatre kö hna helën asë la angetre Kanana.

29 Ketre tune la tribu i Eferaima, tha hnei angatre kö hna helëne la angetre Kanana ka lapa e Gezera. Matre hnene pala hi la angetre Kanana hna ce mel me angatr e Gezera.

30 Ketre tune fe la tribu i Zebulona, tha hnei angatre kö hna helëne la itre atrene Kiterona, me Nahalol. Matre hnene pala hi la angetre Kanana hna ce mel me angatr, ngo hna thahluë angatre pe.

31 Ketre tune fe la tribu i Asera, tha hnei angatre kö hna helëne la itre atrene Ako, me Zidona, me Akelab, me Akeziba, me Heleba, me Afeka, me Rehoba. 32 Matre hnene la angetre Asera hna ce mel memine la angetre Kanana ngöne la nöj, ke tha hnei angatre kö hna helëne la angetre Kanana.

33 Ketre tune fe la tribu i Nafatali, tha hnei angatre kö hna helëne la itre atrene Bethe-Semes, me Beth-Anath. Matre hnene la angetre Nafatali hna ce mel memine la angetre Kanana ngöne la nöj, ngo hna thahluëne pe la angetre Bethe-Semes, me Beth-Anath.

34 Hnene la angetre Amora hna sawa la angetre Dana troa lapane la götran trön la itre wetr; eje hi, tha hnei angatr hna nue la angetre Dana troa ut kowe la gaa paapa. 35 Qa ngöne lai, hnene la angetre Amora hna xel ma fek qa ngöne la wetre Heres, me Aialona, me Salebim. Ngo ame ju hi la kola catr* hnene la itre matra i Iosefa, ke hnei angatr hna folosan la angetre Amora. 36 Ame la götran ne la angetre Amora, ke ej a tro qa Akerabima me Sela a elë draië.