MEKENE 35
Tro Sa Iëne Tune Kaa La Itre Mekune Ka Loi?
Hne së asë hi hna iëne la ketre mekune ngöne la mele së. Tune la troa iëne la föe së, la huliwa së, maine uma së pena. Ame asë hi lai, ke ka hetre thangane kowe la mele së. Ijije hi tro la itre mekune hne së hna xom, a easenyi së koi Iehova, maine ananyi së pena. E tro sa iëne la itre mekune ka loi, tro hë sa madrin, nge ketre tui Iehova fe.
1. Tro la Tusi Hmitrötr a xatua së tune kaa troa iëne la itre mekune ka loi?
Qëmekene troa iëne la ketre mekun, sipo Iehova jë troa amamane koi epun jëne la Tusi Hmitrötr, la aqane waiewekë i Nyidrë. (E jë la Ite Edomë 2:3-6.) Ame itre xaa ijin, tro epuni a öhne la ketre wathebo. Ame e cili, loi e tro epuni a trongën.
Nge tune kaa e tha nyipi mama kö koi epun la hnei Tusi Hmitrötr hna qaja? Tro kö Iehova a xatua epun troa “tro ngöne la gojeny tro [epuni] a trongën.” (Isaia 48:17) Tune kaa? Jëne hi la itre trepene meköt e hnine la Tusi Hmitrötr. Ame la itre trepene meköt ke, itre trenge nyipici ka amamane la mekuna i Akötresie. Easa atre la aqane waiewekë i Nyidrë, jëne la itre hna melëne e hnine la Tusi Hmitrötr. Matre ame hë la easa atre la mekuna i Iehova, celë hi la ka troa xatua së troa iëne la itre mekun ka ihmeku memine la aja i Nyidrë.
2. Nemene la nyine tro sa kuca qëmekene troa iëne la ketre mekun?
Öni Tusi Hmitrötr: “Ame la ate maca mek, te, kola trotrohnine la jë i angeic.” (Ite Edomë 14:15) Kolo hi lai a amamane ka hape, loi e tro sa pane mekune hnyawa, qëmekene troa iëne la ketre mekun. Matre nyipiewekë tro sa isa hnying ka hape: ‘Nemene la trepene meköt nyine tro ni a xom? E tro ni a iëne la mekune celë, tro kö a tingetinge la mekunang? Nemene la thangane koi itre xan? Tro kö lai a amadrinë Iehova?’—Deuteronomi 32:29.
Iehova hi la ka ijij troa qaja koi së la ewekë ka loi me ka ngazo. Ame la easa inine me trongëne hnyawa la itre wathebo me trepene meköti Iehova, easë hi lai a inine la mekuthetheu së. E cili, tro hë la mekuthetheu së a qaja koi së la ewekë ka loi me ka ngazo. (Roma 2:14, 15) Haawe, e tro sa inine hnyawa la mekuthetheu së troa kuca la itre ewekë ka loi, tro hë eje lai a xatua së troa iëne la itre mekune ka loi.
TROA CE ITHANATAN
Tro sa ce wang la enyipiewekëne la itre trepene meköt memine la huliwa ne la mekuthetheu ngöne la easa iëne la ketre mekun.
3. Nue pi la Tusi Hmitrötr troa xatua epun
Nemene la aqane tro la itre trepene meköt qa hnine la Tusi Hmitrötr a xatua epun troa iëne la itre mekune ka loi? Goeëne jë la VIDEO, nge ce ithanatane jë cahu itre hnying:
Nemene la aliene la kola hape, tro sa isa ië mekun?
Hnauëne la Iehova a nue së troa isa ië mekun?
Nemene la ixatua hnei Iehova hna hamë së matre tro sa atreine xomi mekune ka loi?
E jë la Efeso 5:15, 16. Kola amamane hnene la lue xötre celë la ketre trepene meköt, ene la troa “huliwane hnyawane la traeme” i epun. Tro epuni a trongëne tune kaa la trepene meköti cili . . .
göne troa e la Tusi Hmitrötr e nöjei drai?
la epuni a nue traeme kowe la föi epun, me haneköi epun, me keme me thine i epun?
göi troa sine la itre icasikeu?
4. Inine jë la mekuthetheu i epun matre troa iëne la itre mekun ka loi
Tha ka jole kö tro sa iëne la ketre mekune ka lolo, e mama hi koi së la hnei Tusi Hmitrötr hna qaja. Ngo tune kaa e tha nyipi mama hnyawa kö? Goeëne jë la VIDEO, nge ce ithanatane jë cahu hnying:
Nemene la hnei Emma hna kuca troa inine la mekuthetheu i angeic matre xomi mekune ka loi?
Pine nemene matre tha ka loi kö tro sa nue la itre xan troa ië mekune koi së? E jë la Heberu 5:14, nge ce ithanatane jë cahu itre hnying:
Maine tro sa hnyingëne la mekuna i itre xan, nemene la nyine tro sa isa wangatrehmekune hnyawa?
Nemene la itre zuti ka troa xatua së troa inine la mekuthetheu së, matre xomi mekune ka loi?
Tune la ketre carte, ijije hi tro la mekuthetheu së a xatua së troa xomi mekune ka loi
5. Loi e tro sa wangatrune la mekuthetheu ne la itre xan
Tha ceitu kö la aqane xomi mekune së. Tro sa amamane tune kaa laka, easa mekune la mekuthetheu ne la itre xan? Tro sa ce wang la lue ceitun:
Ceitune 1: Ame la ketre trejine föe, aja i angeic tro pala hi a otreë trauziz. Ngazo pe, hna athixötrëne la itre xaa trejine föe ne la ekalesia.
E jë la Roma 15:1 me 1 Korinito 10:23, 24, nge ce ithanatane jë cahu itre hnying:
E trotrohnine hi lai trejine föe la itre xötre celë, nemene hë la hnei angeic hna troa kuca? E traqa ju epuni porotrik memine la ketre atr ka tha ce mekune kö me epun, nemene la hnei epuni hna troa kuca?
Ceitune 2: Ngacama tha Tusi Hmitrötr kö a wathebone troa iji kahaitr, ngo hnene la ketre trejin hna mekune troa nue la kahaitr. Nge ame ju hi la ketre ijin, hnene la itre xaa trejin hna hë angeic troa ce xeni me angatr. Ame e cili, angeic a öhnyi angatr a iji kahaitr.
E jë la Ate Cainöj 7:16 me Roma 14:1, 10, nge ce ithanatane jë cahu itre hnying:
Nemene la aqane troa xatuane lai trejin hnene la itre xötre celë? E traqa ju epuni öhne la ketre trejin a kuca la ketre ewekë nge ka tha loi kö koi epun, tune kaa la aqane tro epuni a ujë?
Qëmekene troa iëne la ketre mekun
1. Sipo Iehova jë troa xatua epun.—Iakobo 1:5.
2. Thele jë hnine la Tusi Hmitrötr me itre itusi së, la itre trepene meköt ka ihmeku memine la hnei epuni hna melën. Loi e tro fe epuni a sipo ixatua kowe la itre trejin ka macaj.
3. Mekune hnyawa ju la thangane la itre mekune hnei epuni hna troa xom, göne la mekuthetheu i epun, me itre xan.
HNE SË HNA MAJEMINE DRENG: “Melenge kö. Ma tro angatr a uën?”
Pine nemene matre nyipiewekë troa atre hnyawa la mekuna i Akötresie me itre xaa atr?
HANE HI LA HNE SË HNA CE WANG
Qëmekene troa iëne la itre mekune ka loi, nyipiewekë troa atre hnyawa la mekuna i Iehova, memine fe la thangane koi itre xan.
Nyine Amekunën
Tune kaa la aqane tro epuni a ië mekune ka amadrinë Iehova?
Tro epuni a inine tune kaa la mekuthetheu i epun?
Tro epuni a amamane tune kaa ka hape, epuni a wangatrune la mekuthetheu ne la itre xan?
ITRE XAA NYINE WANG
Tro sa iëne tune kaa la itre mekune ka troa easenyi së koi Akötresie?
“Prenons des décisions qui honorent Dieu” (Ita Ne Thup 15 Eiperem 2011)
Nyimu aqane eamo së hnei Iehova. Nemen la itre eamo cili?
Hna xatuane la ketre nekötrahmany troa xome la ketre mekun ka jole koi angeic.
Nemene la aqane tro sa iëne la itre mekune ka amadrinë Iehova e pëkö hna qaja hnei Tusi Hmitrötr?
“Vous faut-il un commandement pour tout ?” (Ita Ne Thup 1 Diseba 2003)