Akötresieti Kö a Kapa La Nöjei Feet?

Aja i Iehova tro sa madrine ngöne la mel, nge tro fe sa hane feet. Ngo hapeu, Akötresieti kö a kapa la nöjei feet asë? Tune kaa la aqane tro sa amamane la ihnimi së koi Iehova ngöne la götrane cili?

1. Pine nemene matre tha nöjei feet asë kö la ka amadrinë Iehova?

Tro epuni lai a sesëkötr ka hape, nyimutre catr la itre feet ka tha ihmeku kö memine la hna qaja hnei Tusi Hmitrötr, nge itre hna acile hnene la itre atr ka thatre Akötresieti kö. Ame la itre xaa feet, hna löth hnene la itre dremoni, nge ka sajuëne lo mekune hna hape, e meci hë la atr ke, mele kö la u. Itre hna nyitrepene hnei trengathoi, tune la xoue hnëjin me kepe manathith. (Isaia 65:11) Celë hi kepine matre Iehova a hmekëne la itre hlue i Nyidrë ka hape: “Iananyi pi . . . nge the ketr hmaca kö la ewekë ka sis.”—2 Korinito 6:17.a

2. Tune kaa la aqane goeëne Iehova la itre feet ka atrunyi atr?

Öni Iehova ka hape, ka hetre engazone catr la troa ‘mejiune kowe la itre atr.’ (E jë la Ieremia 17:5.) Ame la itre xaa feet ke, kola atrune la itre hene politik me itre sooc. Ame la itre xan, kola feetëne la darapo i nöj me ëdepadas. (1 Ioane 5:21) Ame itre xaa feet ke, kola atrune la itre parti politik. Nemene la mekuna i Iehova e tro sa atrune la ketre atr maine ketre parti ka tha cilëgöline kö la aja i Nyidrë?

3. Nemene la itre aqane ujë ka amamane ka hape, tha ka loi kö la feet?

Tusi Hmitrötr a wathebone troa “hmo hnei ka haitr, me feete qenahmo, me ithikeu troa iji menu la ka haitr.” (1 Peteru 4:3) Ame la itre xaa feet, kola upe la itre atr troa kuci ngazo. Maine easë a ajane troa nyisinee i Iehova, loi e tro sa ananyine la nöjei ewekë ka sis.

TROA CE ITHANATAN

4. Nuetrije pi la itre feet ka tha amadrinë Iehova

E jë la Efeso 5:10, nge ce ithanatane jë cahu itre hnying:

• Qëmekene troa sine la ketre feet, nemene la nyine tro sa pane wange hnyawa?

• Nemene la itre feet hna majemine kuca hnene la itre atr ngöne la nöje i epun?

• Ame koi epun, ka amadrinë Iehova kö la itre feet cili?

Atre kö epun la mekuna i Iehova göne la itre aniverser? Ame ngöne la Tusi Hmitrötr, pë fe kö hlue i Iehova ka feetëne la drai ne hnaho. Ame hi la ka feetën la drai ne hnaho ke, lue atr ka tha nyihlue i Iehova kö. E jë la Genese 40:20-22 me Mataio 14:6-10. Nge ce ithanatane jë cahu itre hnying:

• Nemene la ewekë ka traqa ngöne la lue aniverser cili?

• Nemene la hna ini së göne la aqane goeëne Iehova la itre aniverser?

Maine jë epuni a hnyinge ka hape, ‘Nyipici kö lai ka hape, ame la troa sine la aniverser me itre xaa feet, ke ka ngazo koi Iehova?’ E jë la Esodro 32:1-8. Nge, goeëne jë la VIDEO nge ce ithanatane jë cahu itre hnying:

VIDEO: Itre Feet Me Itre Hna Majemine Kuca Ka Tha Amadrinë Akötresieti Kö (5:07)

• Pine nemene matre nyipiewekë troa wange hnyawa ka hape, ka loi kö la feete ce koi Iehova?

• Troa kuca tune kaa?

Aqane troa atre la itre feet ka amadrinë Akötresie

• Ka ihmeku kö ej memine la hnei Tusi Hmitrötr hna qaja? Thele jë troa atre la qaane lai feet.

• Eje kö a atrune la itre atr, maine organizasio, maine pena la itre darapo? Ame la hne së hna troa atrune ke, Iehova hmekuje hi, nge tro sa mejiun laka, Nyidrë casi hi la ka atreine troa nyinyine la itre jol ngöne la fen.

• Tune kaa la itre aqane ujë ngöne la itre feet, ka ihmeku kö memine la hna qaja hnei Tusi Hmitrötr? Loi e tro palahi a wië la itre mekuna së.

5. Xatuane jë la itre atr troa metrötrëne la itre ini hnei epun hna kapa

VIDEO: Qejepengöne Hnyawa Ju La Itre Ini Hnei Epun Hna Kapa (2:01)

E jë la Mataio 7:12, nge ce ithanatane jë cahu itre hnying:

• Jëne caha trepene meköt, tro kö epuni a qaja kowe la itre sinee i epun ka tha Temoë kö ka hape, tha tro kö a feetëne la ketre feet?

• Tro epuni a qejepengöne tune kaa kowe la itre atrene la fami epun ka hape, ngacama tha epuni hmaca kö a hane sine la ketre feet me angatr ngo, epuni palahi a hnimi angatr?

6. Aja i Iehova tro sa madrin

Aja i Iehova tro sa madrin memine la fami me itre sinee së. E jë la Ate Cainöj 8:15, nge ce ithanatane jë cahu hnying:

• Tune kaa la aqane amamane hnene la xötr ka hape, aja i Iehova tro sa madrin?

Aja i Iehova tro la itre hlue i Nyidrëti a iöhny matre troa ce madrin. Goeëne jë la VIDEO ka amamane lai ngöne la itre asabele koi itre nöje ka nyimutre.

VIDEO: Tha Thëthëhmine Kö Hun La Aqane Kepe Hun Lo Itre Ijine Asabele Internationales (5:40)

E jë la Galatia 6:10, nge ce ithanatane jë cahu itre hnying:

• Tro pala kö sa “kuca la loi” koi itre xan, e tro sa ce feet me angatr?

• Nemene la ka upi epun troa hamë ahnahna: hnene la feet, maine sipu aja i epun kö?

• Hnene la itre Temoë hna hane ce feet memine la itre nekö i angatr, nge angatre fe a hane hamë ahnahna koi nyudren. Maine hetre nekö i epun, tro epuni a amadrinë nyudren tune kaa?

HANE HI LA HNE SË HNA CE WANG

Aja i Iehova tro sa ce madrin memine la fami, me itre sinee së. Ngo Nyidrëti pe a sisine la itre feet ka tha ihmeku kö memine la aja i Nyidrë.

Nyine Amekunën

• Nemene la itre hnyinge ka troa xatua së troa atre ka hape, ka ngazo la feete celë koi Iehova?

• Nemene la aqane tro sa xatuane la fami me itre sinee së troa trotrohnine la mekuna së göne la itre xaa feet?

• Tro sa atre tune kaa ka hape, aja i Iehova tro sa madrin me hane feet?

ITRE XAA NYINE WANG

Itre feet hna tha atrune kö hnene la itre keresiano.

“Pourquoi les Témoins de Jéhovah ne célèbrent-ils pas certaines fêtes ?” (Itus jw.org)

Foa lao kepin matre tha madrine kö Iehova la easa feetëne la itre aniverser.

“Pourquoi les Témoins de Jéhovah ne fêtent pas les anniversaires de naissance ?” (Itus jw.org)

Goeëne ju la aqane amadrinë Iehova hnene la ketre jeune ngöne la ketre drai ne feet.

Tha Ka Co Kö Hmunë Koi Iehova (11:35)

Itre milio lao keresiano ka tha feetëne hmaca kö la noel. Tune kaa la mele i angatr enehila?

“Ils ont trouvé mieux” (Ita Ne Thup 1 Diseba 2012)