MEKENE 43
Aqane Goeëne La Kahaitr Hnene La Itre Keresiano
Tha ceitu kö la aqane ije la kahaitr hnene la itre atr. Ame itre xan, kolo hi a nango ij la kola iöhnyi me itre sinee. Ame itre xan, ke tha ka iji kö. Ngo ame pena la itre xan, angatr a ij uti hë la hmo. Nemene la mekuna i Tusi Hmitrötr göi kahaitr?
1. Ka ngazo kö la troa iji kahaitr?
Tha hnei Tusi Hmitrötre kö hna wathebone la troa ij. Ngo eje pe a qaja ka hape, ame la waina, ahnahna ka ‘amadrinëne la hni ne la atr.’ (Salamo 104:14, 15) Eje mina fe a qaja ka hape, ame la itre hlue i Iehova ekö, ke itre ka iji kahaitre fe angatr.—1 Timoteo 5:23.
2. Nemene la mekuna i Tusi Hmitrötr kowe la itre ka iji kahaitr?
Iehova a wathebone la troa hmo hnei kahaitr. (Galatia 5:21) Öni Tusi Hmitrötr: ‘The ce tro kö me itre ka iji waina atrun.’ (Ite Edomë 23:20) Maine easa nango iji cas ngöne la hnalapa së, tha tro kö sa ij uti hë la thatre koilo, me ithanata me huliwa menu, maine angazone la mele së. Nge, e thatreine kö së ij ngöne la tulu, loi e tha tro hmaca kö sa ij.
3. Tune kaa la aqane tro sa goeëne la itre mekun hna xome hnei itre xan göi kahaitr?
Isa qanyi së kö iën: troa ij, maine tha iji pena. E tro la ketre atr a mekune troa ij ngöne la tulu, loi e tro sa metrötrëne la mekuna i angeic. Nge e traqa ju mekune hnei ketre atr ka hape, tha tro hmaca kö angeic a ij, tha tro kö sa uku angeic. (Roma 14:10) Ketre tune fe, tha ka loi kö tro sa ij nge atre hi së ka hape, tro lai a athixötrëne la itre xan. (E jë la Roma 14:21.) “The tro pi kö [së] a catre thele la loi koi [së] kö, ngo koi itre xane pe.”—E jë la 1 Korinito 10:23, 24.
TROA CE ITHANATAN
Tro sa ce wange la itre trepene meköt ka troa xatua epun troa ië mekun göi troa iji kahaitr. Nge, e maine jole koi epuni troa nuetrije la kahaitr, tro sa ce wange la ka troa xatua epun ngöne la götrane cili.
4. Pane mekune hnyawa jë ka hape, tro kö epuni a ij maine tha iji pena
Nemene la mekuna i Iesu göne la kahaitr? Maine easa ajane troa atre, tro sa ce wange la pane iamamanyikeu i nyidrëti ekö. E jë la Ioane 2:1-11, nge ce ithanatane jë cahu itre hnying:
Nemene la hna ini së hnene la iamamanyikeu i Iesu, göne la aqane goeëne nyidrë la kahaitr memine la itre ka ij?
Pine laka, tha hnei Iesu kö hna wathebon troa iji kahaitr, tune kaa la aqane tro la keresiano a goeëne la ketre atr ka pi ij?
Tha hna wathebone kö hnei Tusi Hmitrötr tro la keresiano a iji kahaitr, ngo ame itre xaa ijin, loi e tha tro kö sa ij. E jë la Ite Edomë 22:3, nge ce ithanatane jë la aqane troa trongëne la trepene meköti celë ngöne la itre hna melëne e cahu:
Maine epuni a xomi loto maine huliwane la ketre masin.
Maine epuni a upune.
Maine droketre a qaja koi epun ka hape, tha tro hmaca kö a ij.
E thatreine kö epuni tuluth la aqane tro epuni a ij.
Maine kola wathebo epuni hnei mus troa iji kahaitr.
E ce epuni memine la ketre atr ka mekune troa nue la kahaitr pine laka, tru la itre jol ka traqa koi angeic ekö.
Tro kö epuni a ami kahaitr ngöne la laulau ngöne la ijine faipoipo? Qëmekene troa sa la hnyinge celë, goeëne jë la VIDEO.
E jë la Roma 13:13 me 1 Korinito 10:31, 32. Thupene la hna e la xötr, ce ithanatane jë cahu hnying:
Tro la trepene meköti celë a xatua epuni tune kaa troa iëne hnyawane la mekun ka troa amadrinë Iehova?
Ame göi troa iji kahaitr, ke isa qanyine kö la itre keresiano iën. Ngo, ame itre xaa ijine ke tha angatr kö a ij
5. Troa ij ngöne la tulu
Nyipici laka, tha ase kö Iehova wathebone troa iji kahaitr. Ngo tha tro kö epuni a thëthëhmine ka hape, tha aja i Nyidrëti kö tro epuni a hmo. Pine nemen? E jë la Hosea 4:11, 18, nge ce ithanatane jë cahu hnying:
Nemene la ewekë ka traqa, e tru palaha la hna iji kahaitr?
Tune kaa la aqane tro sa atreine ije ngöne la tulu? Loi e tro sa atre la ifego së, matre tha tro kö a sasaithi tulu. E jë la Ite Edomë 11:2, nge ce ithanatane jë cahu hnying:
Pine nemene matre loi e tro sa tuluth la aqane troa iji la kahaitr?
6. Tune kaa la aqane tro la itre ka majemine ij a nue la kahaitr?
Goeëne jë la video ka amamane la aqane xatuane la ketre trahmany troa nue la kahaitr. Goeëne jë la VIDEO, nge ce ithanatane jë cahu itre hnying:
Nemene la thangane la kahaitr thei Dmitry?
Ka hmaloi kö koi angeic troa nue la kahaitr?
Nemene la ka xatua angeic troa nue hnyawane la kahaitr?
E jë la 1 Korinito 6:10, 11, nge ce ithanatane jë cahu itre hnying:
Nemene la engazone e troa iji atrunyi la kahaitr?
Nemene la ka amamane ka hape, ijije hi troa saze la mele ne la atr ka iji lapa la kahaitr?
E jë la Mataio 5:30, nge ce ithanatane jë cahu hnying:
Ame la kola hape troa thupatrije la ime, kolo lai a hape, troa isine troa nue la kahaitr, matre amadrinë Iehova. Nemene la nyine tro epuni a kuca, e thatreine kö epuni nue la kahaitr?a
E jë la 1 Korinito 15:33, nge ce ithanatane jë cahu hnying:
Nemene la thangane e tro epuni a lapa ce tro me itre sinatro ka ij?
IJIJE HI TROA HNYINGË EPUN: “Ka ngazo troa iji kahaitr?”
Tro epuni a sa tune kaa?
HANE HI LA HNE SË HNA CE WANG
Ame la aja Iehova ke, tro sa ije la kahaitr matre tro sa madrin. Ame pe, tha aja i Nyidrëti kö tro sa hmo me wezipo hnei kahaitr.
Nyine Amekunën
Nemene la mekuna i Tusi Hmitrötr göi kahaitr?
Nemene la engazone e tro sa iji atruny?
Tune kaa la aqane tro sa goeëne la mekuna itre xan göi kahaitr?
ITRE XAA NYINE WANG
Tune kaa la aqane tro la ketre jeune a ië mekune hnyawa göi kahaitr?
Itre mekune ka troa xatuane la ketre atr troa nue la kahaitr.
“Quelle place l’alcool a-t-il dans votre vie ?” (Ita Ne Thup 1 Januare 2010)
Tro kö la keresiano a xeji ver?
Ixatua kowe la ketre trahmany ka thatreine nue la kahaitr ngöne la hna melën, “J’étais une barrique sans fond.”
a Maine jole kowe la ketre atr troa nue la kahaitr, ijije hi troa sipo ixatua thei droketre. Alanyim la itre droketre ka qaja ka hape, loi e tha tro hmaca kö a ije la kahaitr.