Atre Fe Hi Epun?

Hna xupe hmaca kö la ēnē e Ierusalema thupene lo macatre 70, thupe i Keriso?

HNEI Iesu hna qaja amë hë ka hape, troa thë trije asë la ēnē i Iehova. Hna eatre lai ngöne lo macatre 70, lo kola lepi Ierusalema hnene la itre soce i angetre Roma hna weje mekene hnei Titus. (Mat. 24:2) E thupene hë, hnei Julien, Joxu i Angetre Roma hna mekune troa xupe hmaca la ēnē.

Julien hi la joxu tixenuë i angetre Roma, nge wanaithihlë. Nyidrëti la neköne la trejine me Constantin le Grand, nge hna ini nyidrë hnene lo itre ka sipu qaja ka hape, itre Keresiano angatr. Cile jë hi nyidrëti ngöne la hna nyijoxu lo macatre 361, nge nyidrëti hi lai a nuetrije ju lo itre hna ini nyidrë. Hnene la itre itusi ka edromëne la itre drai hnapan hna ati ëje i nyidrë ka hape, Julien l’Apostat (Julien Atre Iamenu) pine laka hnei nyidrë hna trije la hmi.

Xele catre Julien ma wange la itre ka qaja ka hape, itre Keresiano angatr. Ame la kepin, tre, hnei nyidrëti hna öhne la itre atr cili a humuthe la keme i nyidrë me itre sinee i nyidrë la kola sikisi lao macatre i nyidrë. Hnene la itretre edromëne la itre drai hnapan ka hmi katolik hna qaja ka hape, hnei Julien hna ukune la itretre Iudra troa xupe hmaca la ēnē i angatr. Hnei nyidrë hna mekune ka hape, nyine tro hi lai a anyipicine ka hape, ame Iesu tre, perofeta thoi.a

Mama catre la trenge aja i Julien troa xupe hmaca la ēnē. Nge eje hi, ma hnei nyidrëti jë hi hna nyiqaan. Nge maine hnei nyidrëti hna nyiqaane la huliwa, ngo ame la ka xecie hnyawa, tha nyipune ju kö nyidrë. Pine laka, hna canga humuthi Julien, nge tha traqa ju kö kowe la lue macatre thupene la hna acili joxu nyidrë, nge tha hna xupe hmaca ju kö lo la ēnē.

[Ithueamacany]

[Iatr ne la götran 32]

Hane hi la iatr nyine amamane la ēnē ngöne lo hneijine i Iesu

[Foto]

Hune ekö lo wetr hna acile lo ēnē, hetrenyi la ketre Sine Git Ka Wakukup, hna xupe hnyawane nyine hnë hmi ne la itre Musulman enehila

[Hna xome ngön la foto]

Photo: Todd Bolen/BiblePlaces.com