Drei La Ka Xupi Akötresie?

Kem a ithanata kowe la kuku, ka sevene lao macatre. Öni nyidrë: “Ame ekö petre kö, hnei Akötresie hna xup la ihnadro me nöjei ewekë e celë fen, me jö, me treu, me itre wëtresij.” Kola pane goe hnene la nekönatr, nge öni nyëne jë hi: “Kaka, nga drei kö la ka xupi Akötresie?”

Öni kem e sa: “Pëkö ka hane xupi Akötresie. Ame Akötresie, ke ka pëkö qaan.” Loi ju hi koi nyën la aqane sa i kem. Ngo e tru hë nyën, tro hmaca kö nyëne lai a hnying. Nango jole koi nyën troa mekune ka hape, pëkö ka hane xupi Akötesie, ke hna xup asë hi la nöjei ewekë. Ma tro nyëne lai a thele ka hape, ‘Ka fetra pe kö qa kaa lae Akötresie?’

Nemene la aqane sa hnei Tusi Hmitrötr? Ka ihmeku hi la aqane sa ne la Tusi Hmitrötr, memine lo hna qaja hnei kem. Öni Mose: “JOXU fe . . . e tha hna hnahone pete kö la ite wet, nge tha ’se pete kö cilieti traqane la fene hnengödrai me hune i hnadro, nge qan’ ekö palua uti hë epine palua cilieti la Akötesie.” (Salamo 90:1, 2) Öni Isaia perofeta mina fe: “Hape u, tha ’te kö eö ? tha denge kö eö ? Iehova la Akötesie ka epine palua, ate xupe la ite cane la fene hnengödrai”! (Isaia 40:28) Nge kolo fe a qaja hnine la tusi Iuda ka hape, ka “epine palua” Akötresie.—Iuda 25.

Kola amamane hnene la itre xötr celë ka hape “Joxu ka eje palua kö” lae Akötresie, tune la aqane qaja i Paulo aposetolo. (1 Timoteo 1:17) Haawe, ka qaane ekö palua kö lae Akötresie. Nge tro pala hi Nyidrëti a mele uti hë epine palua. (Hna Amamane 1:8) Ame Akötresie, tre ka pë qaan, nge ka pë pun.

Hnauëne laka, jole e tro sa mekune la ewekë cili? Pine laka, hna nyi ifegone hi la atreine së troa mekun; celë hi matre, isa aqane e drai së kö me Iehova. Ame la ca thauzane lao macatre, tre kösë ca drai hi lai koi Akötresie, ke ka epine palua Nyidrë. (2 Peteru 3:8) Ka tune la sipa: ka mele hi ej koi 50 lao drai; ka jole lai kow ej e troa mekune ka hape, traqa koi 70 maine 80 lao macatre ne mele së! Ngo Tusi Hmitrötr a qaja ka hape, ceitui easë hi memine la itre sipa xajawa i Nyidrë, Atre Xupi së. Ka thatrehmekune la inamacane i Nyidrë, hune la hne së hna atrein. (Isaia 40:22; 55:8, 9) Celë hi kepine matre thatreine kö së troa trotrohnin la itre pengö i Iehova asë.

Nyipici laka, jol e troa mekune ka hape, pëkö atre xupi Akötresie, ngo tro hi së lai a trotrohnin. Maine hetre ka xupi Akötresieti ju, tre tro lai a hëne ka hape Atre Ixup. Ngo Tusi Hmitrötr a qaja ka hape, Iehova hmekuje hi la Atre “xupe la nöjei ewekë asëjëihë.” (Hna Amamane 4:11) Ketre, atre hi së ka hape pëkö hnengödrai ekö. (Genese 1:1, 2) Hnei drei hna axulun la hnengödrai? Hnei Akötresie. Traqa ha la Hupuna i Nyidrë me itre angela, nge pa i Nyidrëti hë. (Iobu 38:4, 7; Kolose 1:15) Nyidrëti casi petre kö ekö. Haawe, tha ijije kö tro la ketre hna xup a xupi Nyidrë.

Mama hnyawa ha jëne la pengö së, me pengöne la hnengödrai me fene hnengödrai asë ka hape, ka pë qaane nge ka pë pune Akötresie. Nyidrëti la Atre Xup la hnengödrai me fen, me acil la itre wathebo nyine nyi ifegone la itre ewekë hnei Nyidrëti hna xup. Nge easa mel jëne la mano ne mel qaathei Nyidrë.—Iobu 33:4.