Eni Pe Hi a Mele Koi Elo Bool!

MELENG EKÖ

Hnenge hna tru e Costa Rica, ezine la traone ne Puerto Limón, ketre götrane hnë xepe hnei he. Ala eitr eahun, nge eni la hnaasevenen. Hna meci hnei kaka, nge eitr lao macatreng. Hnei nenë pë hë hna hetrune casi eahun.

Ka tru catre koi ni la elo bool. Pi tro catre ni a kuci elo ngöne lo eni a nekönatr. Ame la eni a thöth, hnenge hna lö hnine la ketre ekip ka tru. Ame hë la kola truedre lao macatreng, hna hë ni troa hane elo memine la ketre ekip ka hlemu e Nicaragua. Ngo pine laka ka wezipo catre nenë, eni pë hë a lapa ju troa thupë eahlo. Nge ketre, xele ni ma mel e Nicaragua. Celë hi matre eni a thipëne la ihë i angatr. Hnene la ketre atr hna hë ni troa hane elo memine la ekipi ne elo boole i Costa Rica. Ej e hnine la ekipe cili, la itre xaa hna iëne troa sine lai ekip. Ame e cili, hnenge hna nangën. Itre macatre ne elo ni hnine la ekipi cili, qaane lo 1949 uti hë 1952. Hnenge hna elo e Cuba, me Mexico, me Nicaragua. A semidrine lao elo eahun, nge lolo pala hi la aqane elong. Matre madrine catre ni la kola suene me nyimane la ëjeng!

Ngazo pe, hnenge fe hna trune la kuci huliwa ka sis. Ngacama ka ce lapa ni memine la ketre jajiny, ngo eni pala hi a nyenyape thenge la itre xaa föe. Tru catre la hnenge hna iji menu la kahaitr. Ame ngöne la ketre ijin, tru menu pala ha la hnenge hna ij, matre ame la eni a hlë, ke thatre kö ni ka hape ketre drai pena ha. Thatre kö ni la aqane traqa ni ngöne la hnalapang! Ketre, ka elo domino fe ni nge troa miiz, nge pi tro catre ni a elo mani.

Ame ngöne la ijine cili, nenë fe hë a hane hmi thene la Itretre Anyipici Iehova. Hnei eahlo hna tupath troa fe koi ni la lapaune i eahlo, ngo tha ie kö ngöne la qaan pine laka, caasi hi la ka tru koi ni a kuci elo. Ame ngöne la itre traeme ne xen, eni pala hi e kuhu a enij me elo bool, tha drenge pi kö ni la pi xen! Casi hi la hnenge hna lapa mekun, ene la troa elo. Eni pe hi a mele koi elo bool!

Ame hë la kola 29 lao macatreng, hnenge hna eatr ngöne la eni a thele troa xöle la wene bool. Ame hë la kola loi la eatreng, eni ha tro trije la ekip ka tru. Ngo ame pe, hnenge pë hë hna ce elo memine la itre ka elo bool ne la ketre ekip ezine la götran hnenge hna mele ngön.

AQANE SAZE LA MELENG HNENE LA TUSI HMITRÖTR

Ame lo macatre 1957, hnenge hna kapa la ihë troa hane sine la ketre asabele ka tru ne la Itretre Anyipici Iehova. Hna hnen la asabele ngöne la ketre stade hnenge ekö hna elo boole ngön. Eni a lapa me goeëne la itre atr ka sin la asabele. Eni a haine la aqane metrötre i angatr. Tha ka tune kö lo itre ka wai elo bool. Hna ketri ni hnene la hnenge hna öhne ngöne la ijine asabele. Celë hi lai ka upi ni troa inine la Tusi Hmitrötr memine la Itretre Anyipici Iehova, nge troa hane sine fe la itre icasikeu i angatr.

Eni a haine la itre ini ka nyimutre hnenge hna kapa qa hnine la Tusi Hmitrötr. Tune lo hna ahnithe amë hë hnei Iesu göne la itre drai hnapin, laka, tro la itretre drei nyidrë a cainöjëne la maca ka loi ne la Baselaia i Akötresie e cailo fen asë. (Mataio 24:14) Eni fe a atre e cili, ka hape, ame la itre nyipi Keresiano, tre, tha hnei angatre kö hna hë thupene la huliwa i angatr. Öni Iesu: “Hna kapa gufane hnei nyipunie, hamëne gufane pi.”—Mataio 10:8.

Ame la eni a inine la Tusi Hmitrötr, eni fe a goeëne la aqane melëne la Itretre Anyipici Iehova la nyipici. Eni a haine la itre trengecatre hnei angatr hna kuca, matre troa cainöjëne la maca ka loi e cailo fen. Eni a öhne thei angatr la hni ne ham, nge celë hi lo lai hnei Iesu hna upe la itre Keresiano troa amaman. Matre ame la eni a e la Mareko 10:21 me öhne la aqane ihë i Iesu ka hape, ‘Xötrethenge ni jë’, eni fe hë a hane pi nyihlue i Iehova.

Tha hna aca tro saze kö la meleng. Nyimutre la itre macatre ne eni a elone pala hi la numero ka caas. Ngo hnenge hna inine e hnine la Tusi Hmitrötr ka hape, methi Akötresie la itre ka thili koi “Gada,” me itretre meciun. (Isaia 65:11; Kolose 3:5) Matre hnenge hna mekune hnyawa, ka hape, tha tro hmaca kö ni a elo mani. Thupene lo lai pane sabathi eni a mekun troa nue la elo mani, kola uthe lo itre numerong! Kola hnyimasai ni hnene la itre atr pine laka tha hnenge kö hna elo lai wiike cili, matre hnei angatr hna iele ni troa elo hmaca, ngo xele hë ni. Tha elo manie hmaca kö ni.

Hnenge hna cile kowe la ketre itupath ngöne la eni a saze matre ketre “ate ka hnyipixe”. Kolo hi lo hmekune lo drai ne eni a ase xomi bapataiso, ngöne la ketre asabele ka tru ne la Itretre Anyipici Iehova. (Efeso 4:24) Ame ngöne lo lai heji cili, hnenge hna bëeke a tro ngöne hôtel, nge traqa ju hi ni a öhne la kola treqe ni hnene lo sine ce elong ekö e kuhu qëhnelö. Nge öni angeice jë hi koi ni ka hape, “Sammy, nyiso hmaca petre hi la iöhny, trohemi!” Ngo eni a canga sa koi angeic ka hape, “Tro pi!” Hnenge hna amekunë angeic ka hape, eni ha trongëne la itre trepene meköti ne la Tusi Hmitrötr. (1 Korinito 6:18) Öni angeic jë hi koi ni ka hape, “Nemen?” Thupene lai, hnei angeic hna qaja angazone la mekuna i Tusi Hmitrötr, göne la huliwa ka sis me iele ni matre tro hmaca nyio a ce lapa. Ngo hnenge hna lö hnine la hnahageng me kiine la qëhnelöng. Ame hë enehila, madrine catre ni troa qaja ka hape, qane lo macatre 1958 lo eni a hane Anyipici Iehova, hnenge hna nyipici ngöne la meleng.

ITRE MANATHITHI HNENGE HNA KAPA

Eni a mekun, ka hape, ijijinge hë troa cinyihane la ketre tusi ka qaja la itre manathithi hnenge hna kapa, ngöne la eni a trongëne la itre trepene meköti ne la Tusi Hmitrötr! Nyimutre catre hë hnei nyipi sineeng, hetre aliene hë la meleng, nge öhne hë ni la nyipi madrin.

Ka pi elo bool pala hi ni, ngo tha tune hmaca kö ekö. Ame lo eni a elo bool ekö ke, ka hlemu catre ni me ka trenamo, ngo tha ka cile huti kö la itre ewekë cili. Ngo ame pe la aqane imelekeunge me Akötresie memine la itre trejin, ke, itre ewekë lai ne la melenge ka troa cile hut uti hë epine palua. Öni Tusi Hmitrötr: “Kola pate la fene hnengödrai, memine la hna aja kow ; ngo troa cile huti epine palua la ate kuca la aja i Akötesie.” (1 Ioane 2:17) Ame enehila, pëkö ewekë ka sisitria hune la ihniminge koi Iehova memine la nöje i Nyidrë!