Hna Thuane La Lue Kuling
ÖNI Nick, ketre trahmanyi ka mel e Oregon (Etazini): “Ame lo kola nyiqane la macatre 2014, hnenge hna ngenu sane la lue neköi kuling ngöne la traon. Öhne palahi ni la itre Temoë Iehova kola cile ezine la itre ikatre i angatr, nge ka heetre hnyawa. Hnei angatr palahi hna ibozu memine la itre atr.
“Lolo la thiina ne la itre Temoë Iehova kowe la itre atr, me kowe fe la lue kuling. Ame la ketre drai, hnei Elaine, ketre föe ka cil ezine la ikatr, hna hamë ai kuli kowe la lue sing. Ame hë e thupen, majemi hë lue eje kowe la ka thu ai lue ej.”
“Kola tro la itre treu, nge majemine hë ni porotrik memine la itre Temoë. Ketre, majemine hë la lue sing, troa xeni lai ai kuli hna hamën hnei angatr. Ngo eni a hnehengazo. Eje hi, 70 hë lao macatreng, nge thatre hnyawa kö ni la itre hnei angatr hna mejiune kow. Hnenge hna nue la hmi protestant, matre öning, ka loi tro ni a ini tusi caas.
“Ketre, hnenge hna öhne la itre xaa hlue i Iehova ka cainöje fë ikatr ngöne la itre xaa götran. Nge lolo fe la itre thiina i angatr. Angatre fe a sa la itre hnying jëne la Tusi Hmitrötr, matre eni a mejiune koi angatr.
“Ame la ketre drai, öni Elaine, ‘Ame koi nyipë, ahnahna i Akötresieti kö la itre öni?’ Öning, ‘Öö!’ Thupene lai, hnei Elaine hna xome la Isaia 11:6-9. Xele palakö ni troa xome la itre itus, ngo hetre ajange hë troa atre la Tusi Hmitrötr.
“Itre drai thupen, eni hë a porotrik me Elaine me Brent, föi angeic. Hnei nyidro hna upi ni troa e la Mataio uti hë Itre Huliwa, matre trotrohnine la aqane troa nyitipu Keriso. Celë hi hnenge hna kuca. Ame hë lo pune macatre 2016, hnenge hna nyiqane ini Tus me Brent me Elaine.”
“Eni palahi a lapa treqene la itre ijine eahuni a ini Tus me hane sine la itre icasikeu. Ame koi ni, manathithi ka tru e troa inine la Tusi Hmitrötr, nge eni a madrin troa atre la itre hna qaja. Thupene la caa macatre, hnenge hna xomi bapataiso. Ame enehila, 79 hë lao macatreng. Ngo tru la madrineng ke, eni hë ngöne la nyipi hmi. Hnei Iehova hna amanathithi ni me aijijë ni troa sine la lapa i Nyidrë.”