Tro Sa Mel Epine Palua

1. Nemene la thangan la easa lapa mekun la mel ka pë pun hnei Iehova hna troa hamë së?

ASE hë Iehova qaja ka hape, tro la itre ka drengethenge Nyidrë a kapa la “mele ka pë pun.” (Rom. 6:23) Ame la easa lapa mekune lai, ke kola kökötre la ihnimi së koi Nyidrë. Pane mekune jë la: Tru catr la ihnimi Iehova matre Nyidrëti a ajan tro sa casi me Nyidrë epine palua.

2. Troa xatua së tune kaa hnene la mejiune kowe la mele ka pë pun?

² Tro la mejiune së kowe la mele ka pë pun a xatua së troa cil kowe la itre jol. Ame la kola pi humuthi së hnene la itre ithupëjia, ke tha easë kö a xou me keithenge la mekuna i angatr. Pine nemen? Pine laka, maine tro sa mele nyipici utihë la mec, tro kö Iehova a amele së hmaca, me hamë së la mel ka pë pun. (Ioane 5:28, 29; 1 Kor. 15:55-58; Heb. 2:15) Pine nemene matre xecie koi së laka, ijije hi tro sa kapa la mele ka pë pun? Tro sa ce wang la itre kepin.

KA EPINE PALUA IEHOVA

3. Pine nemene matre ijije hi tro Iehova a hamë së la mele ka pë pun? (Salamo 102:12, 24, 27)

³ Iehova la Qeqe ne mel, nge ka epine palua Nyidrë matre ijiji Nyidrëti hi troa hamë së la mele ka pë pun. (Sal. 36:9) Anyimua qaja hnei Tusi Hmitrötr ka hape, ka hekö hë Iehova, nge tro palahi Nyidrëti a ej. Öni Salamo 90:2, ame Iehova ke, ka ej “qan’ ekö palua uti hë epine palua.” Celë fe hi mekun ka mama ngöne Salamo 102. (E jë la Salamo 102:12, 24, 27.) Öni Habakuka göi Iehova ka hape: “Iehova fe, Akötresieng, me Kahmitrötreng, hapeu, tha ka hekö kö nyipëti lo? Tha tro kö nyipëti a mec.”​—Hab. 1:12, MN.

4. Pine nemene matre tha tro kö sa seseu e tha nyipi trotrohnine kö së laka, ka epine palua Iehova? Qejepengöne jë.

⁴ Ka jole kö koi epun troa trotrohnine ka hape, “ka epine palua” Iehova? (Is. 40:28) Tha epuni casi kö la ka mekune tun. Öni Elihu göi Akötresie ka hape: “Thatreine kö së e la itre macatre i nyidrë.” (Iobu 36:26, MN) Tha hnene kö laka, tha trotrohnine kö së la ketre ewekë, matre tha ka nyipici kö la ewekë cili. Ka tune la lai, tha trotrohnine hnyawa kö së la aqane trongene ej, ngo tha kolo kö lai a hape, pëkö lai e celë fen! Maine jë, tha nyipi trotrohnine kö së la pengöi Iehova laka, ka epine palua Nyidrë. Ngo tha kolo kö lai a hape, tha ka epine palua kö Nyidrë. Hna nyi ifegone hi la inamacane së, ngo ame Iehova, pëkö sai Nyidrë. (Rom. 11:33-36) Ka hekö catre kö Nyidrë hune la jö me itre wëtresij. Nge xecie koi së laka, Iehova la ka “xupe la fene hnene la mene i nyidë.” Nyidrëti lo ka “sheluthe la hnengödrai.” (Iere. 51:15; Itre hu. 17:24) Nemene la ketre kepine ka amamane ka hape, ijije hi tro sa kapa la mele ka pë pun?

HNA XUPI SË TROA MEL EPINE PALUA

5. Nemene la aja i Iehova ekö koi Adramu me Eva?

⁵ Tha hnei Iehova kö hna hamën la mele ka pë pun kowe la itre öni me itre feja. Ngo kowe la atr hmekuje hi. Hnei Iehova hna xupi Adramu matre tro angeic a mel epine palua, nge tha tro kö angeic a hane mec. Ngo öni Nyidrë koi angeic: “Tha tro pi kö eö a xeni la wene ne la isinöe ne atrehmekune la loi me ngazo, ke e traqa eö xen, tro hë eö a meci ngöne la drai cili.” (Gen. 2:17) Maine drei Iehova ju hnei Adramu me Eva, tha tro kö nyidroti a mec. Matre trotrohnine hi së ka hape, tro kö Iehova a nue nyidro e ketre ijin troa xeni wen qa ngöne la “sinöe ne mel.” Tro hë nyidroti e cili a “mele epine palua.”b​—Gen. 3:22.

6-7. (a) Nemene la ka amamane ka hape, tha hna xupi së kö troa mec? (b) Qaja jë la itre ewekë hnei epun hna pi kuca ngöne la fene ka hnyipixe. (Goeëne ju la itre iatr.)

⁶ Önine la itre ka inamacan ka hape, tru catre kö la itre ithuemacanyi hna atreine xawan hnene la atuate së hune la hnene ej hna kuca enehila. Hane hi la hna qaja hnene la ketre zonal (Scientific American Mind) lo 2010 ka hape, ijiji hi tro la atuate së a xawan la itre ithuemacanyi ngöne la 2.5 millio lao gigaoctets, kösë 3 millio lao hawa (maine hna sasaith la 300 lao macatre) ne enregistré la ketre emisio ngöne tele. Ngo co hi lai hune la hna atreine kuca hnene la atuate së. Haawe, easa trotrohnine laka, hnei Iehova hna xup la atuate së matre troa xawan la itre ithuemacanyi koi nyimu macatre, ngo tha koi 70 hi maine 80 lao macatre.​—Sal. 90:10.

⁷ Hnei Iehova fe hna amë e kuhu hni ne la atr la aja troa mel epine palua. Öni Tusi Hmitrötr, hnei Akötresie hna amë “e kuhu hni ne la atr la mekune kowe la itre drai ka epine palua.” (Ate cai. 3:11, MN) Celë hi matre ithupëjia me easë la mec. (1 Kor. 15:26) Hapeu la easa wezipo, easë kö a lapa treqene la mec? Waea. Tro së lai a canga wai droketre me thele drösinöe. Eje hi, easa isine troa thele nyin la meci së, ke easa pi mel. Nge tru la akötre së la kola mecitriji së hnene la ketre sinee së hne së hna hnim, nekönatre ju hë maine qatr. (Ioane 11:32, 33) Hapeu, tro kö la Atre Xupi së a amë e kuhu hni së la aja troa mel epine palua, nge tha ijiji së pe? Hetre xaa kepine ka amamane ka hape, ijije hi tro sa mel epine palua. Tha saze kö lo aja i Iehova ekö. Tro sa ce wang la itre hnei Nyidrëti hna kuca ekö me enehila ka anyipicine lai.

THA SAZE KÖ LO AJA I IEHOVA

8. Nemene la hna qaja ngöne Isaia 55:11 göne la aja i Iehova ngöne lo qaan?

⁸ Ngacama hnei Adramu me Eva hna tha idrei, me hamë mec kowe la itre matra i nyidro, ngo tha saze kö lo aja i Iehova ekö. (E jë la Isaia 55:11.) Aja i Nyidrëti palahi tro la itre ka lapaun koi Nyidrë a kapa la mele ka pë pun. Mama catre lai ngöne la itre ewekë hnei Nyidrëti hna qaja me kuca matre eatr la aja i Nyidrë.

9. Nemene la hna thingehnaean hnei Akötresie? (Daniela 12:2, 13)

⁹ Hnei Iehova hna thingehneane laka, tro Nyidrëti a amelene hmaca la itre ka mec, me hamë angatr la mel ka pë pun. (Itre hu. 24:15; Tito 1:1, 2) Xecie koi Iobu laka, tru la aja i Iehova troa amelene hmaca la itre ka mec. (Iobu 14:14, 15) Atre hi Daniela perofeta laka, troa amelene hmaca la itre atr me hamë angatr la mele ka pë pun. (Sal. 37:29; e jë la Daniela 12:2, 13.) Ketre, atre fe hi la angetre Iudra ngöne la hneijine i Iesu laka, tro Iehova a hamëne kowe la itre hlue i Nyidrë la “mele ka pë pun.” (Luka 10:25; 18:18) Anyimua qaja Iesu la hna thingehnaean celë, nge hna amele nyidrëti fe hnene la Keme i nyidrë.​—Mat. 19:29; 22:31, 32; Luka 18:30; Ioane 11:25.

10. Nemene la hna amamane hnene la itre melehmaca ekö? (Goeëne ju la iatr.)

¹⁰ Pine laka, Iehova la Qeqe ne mel, ijiji Nyidrëti hi troa amelene hmaca la itre atr ka mec. Hnei Nyidrëti hna aijijë Elia troa amelene la nekön ne la sine föe ne Sarepeta. (1 Ite jo. 17:21-23) E thupen, jëne la ixatua i Akötresie, hnei Elisaia perofeta hna amelene la nekön ne la ketre föe ne Sunema. (2 Ite jo. 4:18-20, 34-37) Kola amamane hnene la itre iamamanyikeu celë laka, atreine hi Iehova amelene hmaca la itre ka mec. Ame lo Iesu e celë fen, hnei nyidrëti hna amamane ka hape, hnei Iehova hna hamë nyidrëti fe la mene cili. (Ioane 11:23-25, 43, 44) Ame enehila, Iesu hë e hnengödrai, nge hna nue nyidrë “troa musi hune la nöjei ewekë e hnengödrai me e celë fen.” Matre, ijiji nyidrëti hi troa ahlëne “la itre ka meköl hnine la itre hua ne amekunën,” me hamë angatr la mele ka pë pun.​—Mat. 28:18; Ioane 5:25-29.

11. Pine nemene matre ka nyipiewekë la thupene mel matre tro sa kapa la mele ka pë pun?

¹¹ Pine nemene matre hnei Iehova hna nue troa humuth la Nekö hnimina i Nyidrë? Iesu kö a qaja la kepin la nyidrëti a hape: “Atraqatre la ihnimi Akötresie kowe la fen, matre hnei nyidrëti hna upe la Nekö hnimina i nyidrë ka cas, matre tha tro kö a meci la atre amamane la lapaune i angeic kowe la Nekön, ngo tro pe a hetrenyi la mele ka pë pun.” (Ioane 3:16) Hnei Iehova hna nue la Nekö i Nyidrë troa meci pine la itre ngazo së, matre tro sa hane kapa la mele ka pë pun. (Mat. 20:28) Hane hi la aqane qejepengöne lai hnei Paulo: “Pine laka, hna xulu la mec qaathene la trahmany, matre kolo fe a traqa la iamele jëne la trahmany. Eje hi, kola meci la nöjei atr asë hnei Adramu, nge tune fe, jëne Keriso, tro ha mele la nöjei atr.”​—1 Kor. 15:21, 22.

12. Nemene la nyine troa kuca hnene la Baselaia matre eatrëne la aja i Akötresie kowe la itre atr?

¹² Hnei Iesu hna inine la itretre drei nyidrë troa thith matre traqa pi la Baselaia i Akötresie, nge tro fe a ej la aja i Nyidrë e celë fen. (Mat. 6:9, 10) Aja i Akötresie tro la itre atr a mel epine palua e celë fen. Celë hi matre hnei Iehova hna acili Iesu troa Joxu ne la Baselaia. Ketre, hnei Nyidrë hna iën la ala 144 000 lao atr troa mel e hnengödrai, me xatua Iesu troa eatrëne la aja i Nyidrë.​—Hna ama. 5:9, 10.

13. Nemene la hna kuca hnei Iehova enehila, nge nemene la nyine tro sa kuca?

¹³ Ame enehila, Iehova a hnëkëne “la ka ala nyimu atraqatr” matre troa mel fene la Baselaia i Nyidrë. (Hna ama. 7:9, 10; Iako. 2:8) Ngacama easa mel ngöne la xou, me isi, ngo easa isine troa nuetrij la imethinë pi nöj, me hane ngönetrei, me tribu. Kösë hnei easë hna nyihnan la itre taua matre nyine uja dro. (Mika 4:3) Tha easë kö a lö hnine la itre isi, ngo easë pe a xatuane la itre atr troa atre Akötresie memine la aja i Nyidrë matre kapa la “nyipi mel.” (1 Tim. 6:19) Pine laka, easa isigöline la Baselaia i Akötresie, matre kola icilekeu la fami së, nge kola traqa la itre jol göi mani. Ngo Iehova palahi a hamë së la ka nyipiewekë. (Mat. 6:25, 30-33; Luka 18:29, 30) Kolo hi lai a anyipicine laka, ka ej la Baselaia i Akötresie, nge tro kö ej a eatrëne la aja i Nyidrë.

MELE KA LOLO HNE SË HNA TREQEN

14-15. Tune kaa la aqane tro Iehova a apatrene paluane la mec?

¹⁴ Ase hë Iesu xom la hnëqa i nyidrë e hnengödrai, nge qaane ju hi lai, nyidrëti a eatrëne la itre hna thingehnaean hnei Iehova. (2 Kor. 1:20) Qaane lo 1914, nyidrëti a nyiqane musinëne la itre ithupëjia me nyidrë. (Sal. 110:1, 2) Easenyi catre hë tro Iesu me itre ka ce musi me nyidrë a ngaan la itre ithupëjia me nyidrë, me apatrene la itre atr ka ngazo.​—Hna ama. 6:2.

¹⁵ Ame ngöne la 1 000 lao macatre, troa amelene la itre ka mec, nge tro ha pexej la itre atr ka idrengethenge. Thupene la itupath tixenuë, tro la itre ka mele nyipici a “hetenyi la [ihnadro], me lapa palua kö ngön’ ej.” (Sal. 37:10, 11, 29) E thupen, “tro ha apatrene la mec, lo ithupëjia tixenuë.”​—1 Kor. 15:26.

16. Nemene la nyipi kepine matre easa nyihlue i Iehova?

¹⁶ Tune la hne së hna ce wang, ame la mejiune së troa mel epine palua, ke hna nyitrepene hnene la Tusi Hmitrötr. Tro la mejiune cili a xatua së troa mele nyipici ngöne la itre drai ne la pun. Tha easë kö a amadrinë Iehova, matre troa kapa la mel ka pë pun. Ame la nyipi kepine matre easa mele nyipici koi Iehova me Iesu, ke tru la ihnimi së koi nyidro. (2 Kor. 5:14, 15) Pine laka easa hnimi nyidro matre easa nyitipu nyidro, me qaja la mejiune së koi itre xan. (Rom. 10:13-15) E tro sa catre ham, me amë panëne la aja i itre xan, ke tro hë Iehova lai a nyisinee së epine palua.​—Heb. 13:16.

17. Nemene la nyine tro së isa ala cas a kuca? (Mataio 7:13, 14)

¹⁷ Tro kö së a hane kapa elanyi la mel ka pë pun? Ase hë Iehova hnëkëne koi së la mele cili. Ngo isa qanyi së pë hë isine troa lapa ngöne la gojenyi ne mel. (E jë la Mataio 7:13, 14.) Ka tune kaa la mele së elanyi ngöne la easa mele epine palua? Tro pë hë a sa la hnyinge celë ngöne la tane mekun ka troa xulu.