Hnëkë Jë Kowe La Drai Iehova

1. Nemene la nyine tro sa kuca matre troa mele qa ngöne la drai Iehova?

KOLA hapeue la “drai Iehova”? Ame ngöne la Tusi Hmitrötr, kola qaja la ijine tro Iehova a amekötine la itre ithupëjia me amelene la itre hlue i Nyidrë. Nyimu nöje ekö hnei Nyidrëti hna amekötin. (Is. 13:1, 6; Ezek. 13:5; Zef. 1:8) Ame la “drai Iehova” hne së hna lapa treqen, ke kola nyiqane memine la kola apatrenyi Babulona Atraqatr, me nyipune memine la isi Amagedro. Maine aja i easë troa mel, ke loi e tro sa hnëkë enehila. Hnei Iesu hna upi së troa hnëkë kowe la “akötr atraqatr.” Kolo hi lai a hape, loi e tro sa “hnëkë palahi” me hmek.—Mat. 24:21; Luka 12:40.

2. Nemene la hne së hna troa ce wange ngöne la tusi 1 Thesalonika?

² Ame ngöne la pane tusi Paulo kowe la itre keresiano ne Thesalonika, hnei angeic hna huliwane la itre ceitune matre hnëkë angatr kowe la drai ne iameköti Iehova. Atre hi angeic ka hape, tha tro kö la drai cili a canga traqa. (2 Thes. 2:1-3) Ame pe, hnei angeic hna upi angatr troa hnëkë kösë ka tro hi a traqa elany. Nge thatraqai së fe la eamo cili. Tro la itre ceitune i Paulo a xatua së troa trotrohnine: (1) la aqane tro la drai Iehova a traqa, (2) la kepin matre tro la itre xan a mec, memine (3) la aqane tro sa hnëkë matre mel. Tro sa ce wange la itre ini hne së hna xome qa ngöne la tusi Paulo.

TRO LA DRAI IEHOVA A TRAQA TUNE KAA?

3. Pine nemene matre easa qaja ka hape, tro la drai Iehova a traqa tune la atrekënö e jidr? (Wange ju fe la iatr.)

³ “Tune la atrekënö e jidr.” (1 Thes. 5:2) Celë hi pane ceitune hna hamëne hnei Paulo matre qejepengöne la drai Iehova. Itre atrekënö a traqa e jidr, ngöne lo ijine tha hmeke kö la itre atrene la hnalapa. Ketre tune mina fe, troa asesëkötrëne la itre atr elanyi hnene la drai Iehova. Goi tro fe la itre nyipi keresiano a haine la aqane ce traqa nyimenyime la itre ewekë qëmekene la drai Iehova. Ngo ame pe, tha tro kö a apatrenyi angatr tune la itre atr ka ngazo.

4. Pine nemene matre kola aceitunëne la drai Iehova memine la akötr ne la föe ka troa hnaho?

⁴ “Tune la akötr ne la föe ka troa hnaho.” (1 Thes. 5:3) Thatre hnyawa kö la föe ka upune la ijine tro angeic a hnaho, ngo atre hi angeic laka, tro kö lai a traqa. Nge ame hë la kola traqa, ke tro lai a ca tro akötr nge pëkö ka atreine acilën. Ketre tun, thatre kö së la drai me hawa ne traqa la drai Iehova. Ngo xecie koi së ka hape, tro kö a traqa la ijine cili, nge troa asesëkötrëne la itre atr ka ngazo la Akötresie a troa ameköti angatr. Goi pë fe jëne kötre i angatr.

5. Pine nemene matre kola aceitunëne la akötr atraqatr memine la lai?

⁵ Tune la lai. Celë hi hnaakönine ceitune hna hamëne hnei Paulo, nge angeic a qaja la itre ka atrekënö e jidr. Ngo ame celë, Paulo a aceitunëne la drai Iehova memine la kaqa ne lai. (1 Thes. 5:4) Kolo pala pe hi a atrekënö, ngo tha goeë traeme kö. Matre ame la kola mejë la jö, ke kola asesëkötrë angatr me e angatr. Ketre tune mina fe, troa ea la itre ka kuca juetrëne la ngazo ngöne la ijine akötr atraqatr, tune la aqane ea la atrekënö ngöne la kola mejë la jö. Ngo ame së, easa isine troa nuetrije la itre thiina hnei Iehova hna methinën, me “loi hni ngöne la nöjei ewekë asë, me meköt, me nyipici.” (Efe. 5:8-12) Hnei Paulo mina fe hna huliwane la lue xaa ceitun matre qaja la itre atr hna troa apatrene ngöne la drai Iehova. Tro sa ce wange lai.

DREI LA HNA TROA APATREN NGÖNE LA DRAI IEHOVA?

6. Pine nemen matre easa qaja ka hape, alanyim la itre atr ka meköl? (1 Thesalonika 5:6, 7)

⁶ “Itre ka meköl.” (E jë la 1 Thesalonika 5:6, 7.) Hnei Paulo hna aceitunëne la itre atr hna troa apatrene ngöne la drai Iehova memine la itre ka meköl. Pine nemen? Pine laka, tha wangatrehmekune kö angatr la itre ewekë ka traqa ngöne la hneijine së. Tha öhne kö angatr la enyipiewekëne la itre ewekë ka traqa ngöne la fen, matre tha enije kö angatr. Ame enehila, alanyim la itre atr ka pë imelekeu me Akötresie, kösë angatr a meköl. (Rom. 11:8) Ame koi angatr, tha easë kö melëne la “itre drai ne la pun,” nge tha tro kö a traqa la akötr atraqatr. Ngo ame pena la itre xan a öhne la itre ewekë ka traqa enehila, ke kola thue aja i angatr troa atre la maca ne la Baselaia. Ame pe, alanyim thei angatr la ka meköle hmaca e thupen. Nge ame thene la itre ka atre la drai Akötresie, ke hetre ka mekune ka hape, nanyi palakö. (2 Pet. 3:3, 4) Ame pe, easa öhne la enyipiewekën tro sa trongëne la eamo i Paulo, ene la troa hmek.

7. Pine nemen matre kola aceitunëne la itre hna troa apatrene hnei Akötresie me itre ka hmo hnei ka haitr?

⁷ “Itre ka hmo hnei ka haitr.” Hnei Paulo hna aceitunëne la itre atr hna troa apatrene hnei Akötresie me itre ka hmo hnei ka haitr. Ame la atre ka hmo hnei ka haitr, ke tha canga wangatrehmekune kö angeic la itre ewekë ka traqa xötreithi angeic, nge angeic a axecië mekun menu. Ketre tun, tha wangatrune kö la itre atr ka ngazo la itre eamo qaathei Akötresie, ngo angatr a iëne la mel ka troxomi angatr kowe la mec. Ame pe, kola ithuecatr kowe la itre keresiano troa hmek me atreine waiewekë. (1 Thes. 5:6) Önine la ketre atr ka qejepengöne la Tusi Hmitrötr ka hape, ame la atre ka tha hmo hnei ka haitr ke “ka atreine waiewekë, nge ka axecië mekune ka loi.” Pine nemen matre tha tro kö sa hnehengazo, ngo tro pe sa atreine waiewekë hnyawa? Ke celë hi lai ka xatua së troa iananyi memine la kuci politik. Pine laka easë easenyi trootro kowe la drai Iehova, tro la itre atr a uku së troa hane lö hnine la kuci politik. Ngo tha tro kö sa seseu göne la aqane tro sa ujë elany. Tro kö la uati hmitrötre i Iehova a xatua së troa catr me axecië mekune ka loi.—Luka 12:11, 12.

TRO SA HNËKË TUNE KAA KOWE LA DRAI IEHOVA?

8. Thenge la 1 Thesalonika 5:8, nemene la itre thiina ka xatua së troa hmek me atreine waiewekë, nge Paulo a aceitunë itre ej me nemen? (Wange ju fe la iatr.)

⁸ “Hetrëne [jë] la imano së hnene la lapaun me ihnim, me petrëne lo itrapetr, ene la mejiun kowe la iamele.” Paulo a aceitunë së me itre sooc ka heetrëne la hnaheetr ne isi, nge ka hmek. (E jë la 1 Thesalonika 5:8.) Ame ngöne la kola isi, nyipiewekë tro la sooc a hnëkë matre troa atreine cile kowe la ithupëjia. Ketre tu së mina fe, nyipiewekë tro sa hnëkë kowe la drai Iehova, me heetrëne la imano së hnene la lapaun me ihnim, memine la itrapetr, ene la mejiune së. Itre thiina lai ka troa xatua së.

9. Tro la lapaun a thupë së tune kaa?

⁹ Kola thupëne la wenethëhmi ne la sooc hnene la imano. Ketre tun, tro la lapaune me ihnim a thupëne la hni së matre tro palahi sa catre nyihlue i Iehova me xötrethenge Iesu. Jëne la lapaun, xecie koi së laka, tro kö Iehova a amanathithi së la easa thele Nyidrë. (Heb. 11:6) Nge eje fe a uku së troa mele nyipici koi Iesu e nöjei drai, me ngöne la kola traqa la itre itupath ka tru. Tro sa acatrene la lapaune së, e tro sa xomi ini qa ngöne la tulu ne la itre hlue i Iehova enehila, ka mele nyipici ngacama kola axösisi angatr maine pë mani. Nge loi e tro sa nyitipune la itre trejin ka ahmaloeëne la mele i angatr me amë panëne la Baselaia i Akötresie matre tha tro kö sa hnimi mani.b

10. Tro la ihnimi së koi Akötresie me kowe la itre atr a xatua së tune kaa troa cile catr?

¹⁰ Ka nyipiewekë fe la ihnim matre troa hmek me atreine waiewekë. (Mat. 22:37-39) Tro la ihnimi së koi Akötresie a xatua së troa catre cainöj, ngacama traqa ju hë la itre jol. (2 Tim. 1:7, 8) Nge pine laka, easë mina fe a hnime la itre atr ka tha nyihlue i Iehova kö, easa catre cainöj ngöne la itre teritoare së jëne telefone maine tus. Mejiune së laka, tro kö la itre atr hne së hna cainöje kow a saze me kuca la loi.—Ezek. 18:27, 28.

11. Pine nemene matre nyipiewekë tro sa hnime la itre trejin? (1 Thesalonika 5:11)

¹¹ Ame la troa hnime la atre lapa easenyi së, ke kolo fe hi lai a hape, troa hnime la itre trejine me easë. Easa amamane la ihnimi së, la easa “ithuecatrekeu me itö ixatua.” (E jë la 1 Thesalonika 5:11.) Tune la itre sooc a cas ngöne la isi, easa ithuecatrekeu. Nyipici, ame ngöne la hna isi, ijije hi tro la ketre sooc a eatrëne la sinatronge i angeic, ngacama tha hna thë kö. Ketre tu së fe, tha ajane kö së troa akötrëne la itre trejine me easë maine itëkeune la ngazo. (1 Thes. 5:13, 15) Ketre, easë mina fe a amamane la ihnimi së la easa metrötrëne la itre ka elemekene la ekalesia. (1 Thes. 5:12) Hnei Paulo hna cinyanyine lo pane tusi angeic kowe la ekalesia ne Thesalonika, ca macatre thupen la kola acili ej. Matre ame la itre trejin trahmanyi hna acil, ke angatr petre hi a hane kapa la hmi keresiano, nge maine jë, hnei angatre fe hna hane tria. Ame pe, loi e tro la ekalesia a metrötrë angatr. Ame ngöne la ijine akötre atraqatr, maine jë tha tro hmaca kö sa kapa la itre hna amekötine qaathene la Lapa Ne Xomi Meköti maine qaathene pena la Bethela. Tro pe hi sa kapa la itre hna amekötin qaathene la itre qatre thup ne la ekalesia së, matre nyipiewekë tro sa hnim me metrötrë angatr enehila. Ngacama traqa ju hë la nöjei pengöne jol, ngo loi e tro sa atreine waiewekë. Tha tro kö sa goeëne la itre tria i angatr, ngo tro pe a goeëne la aqane huliwa angatr hnei Iehova jëne Iesu.

12. Tro la mejiune së a thupëne tune kaa la itre mekuna së?

¹² Tune la aqane thupëne la he ne la sooc hnene la itrapetr, tro la mejiune së a thupëne la itre mekuna së. E ka catre la mejiune së, tha tro kö sa wangatrune la itre ewekë ne fen. (Fil. 3:8) Tro fe la mejiune së a xatua së troa lapa tingeting. Celë hi hna öhne hnei Wallace me Laurinda, ka nyihlue i Iehova e Afrik. Ngöne hi la köni wiik, hna ce mec la thine i Laurinda me keme i Wallace. Nge hnene la COVID-19, tha bëeke ju kö nyidro kowe la nöje i nyidro matre troa ce lapa memine la fami nyidro. Öni Wallace: “Hnene la mejiune kowe la mele hmaca hna xatua ni troa lapa mekune la pengöi nyidro elanyi ngöne la fene ka hnyipixe, ngo tha ene kö lo pengöi nyidro qëmeken tro nyidroti a mec. Kola akeukawanyi ni hnene la mejiune cili la eni a hleuhleu me akötr.”

13. Nemene la nyine tro sa kuca matre troa kapa la uati hmitrötr?

¹³ “The ajolëne kö la huliwa ne la ua i Akötresie thei nyipunie.” (1 Thes. 5:19) Öni Paulo, kola huliwa la uati hmitrötr thei easë. Ame la easa nue ej troa huliwa the së, ke kola uku së troa kuca la loi me catre nyihlue i Iehova. (Rom. 12:11) Nemene la nyine tro sa kuca matre troa kapa la uati hmitrötr? Sipone jë koi Iehova, inine jë la Tusi Hmitrötr, nge hane jë sine la itre huliwa ne la organizasio i Nyidrë. Celë hi aqane tro sa huliwane “la wene ne la ua.”—Gal. 5:22, 23.

14. Maine easa ajane tro palahi a kapa la uati hmitrötr, nemene la nyine tha tro kö sa kuca? (Wange ju fe la iatr.)

¹⁴ Maine easa ajane troa kapa la uati hmitrötr, ke ‘tha tro kö sa ajolëne la huliwa ne la ua.’ Tro hi Iehova a hamëne la uati hmitrötre i Nyidrë, e ka wië la mekun me aqane ujë së. Tha tro kö Nyidrëti lai a hamë së, e tro palahi sa mekun maine kuca la ngazo. (1 Thes. 4:7, 8) Nge maine easa ajan troa kapa la uati hmitrötr, ke ‘tha tro kö sa wange sixane la itre hna perofetan.’ (1 Thes. 5:20) Ame la “itre hna perofetan” celë, ke kola qaja la maca i Iehova, göne la drai Nyidrë memine la itre drai ne la pun. Tha tro kö sa mekune ka hape, nanyi palakö la drai cili, maine tha tro kö a traqa la isi Amagedro. Ngo easë pe a mekune lapane la drai cili, me loi thiina, me catre kuca e nöjei drai “la itre huliwa ka nyipici koi Akötresie.”—2 Pet. 3:11, 12.

“WAIPENGÖNE HNYAWA JU LA ENYIPICINE LA NÖJEI EWEKË ASË”

15. Nemene la nyine troa kuca matre tha tro kö a amenu së hnene la itre trengewekë ne dremoni? (1 Thesalonika 5:21)

¹⁵ Easenyi hë tro la itre ithupëjia me Akötresie a suene ka hape: “Tingetinge hë nge pë hë hna mecin!” (1 Thes. 5:3) Alanyim la itre atr ngöne la fen hna troa amenune hnene la itre trengewekë ne dremoni. (Hna ama. 16:13, 14) Nge ame easë ke? Tha tro kö lai a amenu së e hne së hna ‘waipengöne hnyawa la enyipicine la nöjei ewekë asë.’ (E jë la 1 Thesalonika 5:21.) Ame la hnaewekë qene Geres hna hape, “waipengöne hnyawa ju” ke, kola qaja la kola waipengöne la gool matre wange ka hape, nyipi gool kö. Ketre tune mina fe, loi e tro sa wange ka hape, ame la itre hne së hna dreng maine e, ke ka nyipici kö. Ka nyipiewekë lai kowe angetre Thesalonika ekö, ketre tui easë mina fe enehila, ke easenyi catre hë la akötre atraqatr. Tha tro kö sa canga mejiune kowe la hna qaja hnei itre xan. Loi e tro pe sa atreine waiewekë, me wang ka hape, ka ihmeku kö la itre hne së hna dreng me e memine la hna qaja hnei Tusi Hmitrötr me organizasio i Iehova. E cili, tha tro kö lai a amenu së hnene la itre trengewekë ne dremoni.—Ite edomë 14:15; 1 Tim. 4:1.

16. Nemene la mejiun hne së hna lapa treqen, nge nemene la nyine tro sa kuca?

¹⁶ Atre hi së laka, tro kö a mel la nöje i Akötresie ngöne la ijine akötr atraqatr. Ngo thatre kö së la ka troa traqa elany koi së isa ala cas. (Iako. 4:14) Ngacama meci ju hë së qëmeken maine ngöne la ijine akötr atraqatr, ngo ka xecie koi së laka, tro sa kapa la mele ka pun e tro sa mele nyipici. Tro la itre hna iëne a ce mele me Keriso e hnengödrai, nge tro la itre xaa mamoe a mele ngöne la paradraiso e celë fen. Haawe, catre jë së lapa mekune la mejiune së me hnëkë kowe la drai Iehova!