Ka Hetre Thangan La Troa Xoue Akötresie

1-2. Tui Lota, nemene la jol hne së hna cile kow enehila?

AME la easa goeëne la aqane ujë ne la itre atr enehila, ke casi hi la hne së hna melën me Lota ekö. Kola “akötrë angeic hnene la itre huliwa nyine hmahmane hna kuca hnei itre ka pë wathebo,” ke atre hi angeic laka, methi Iehova la itre aqane ujë ka ngazo. (2 Pet. 2:7, 8) Pine laka, Lota a hnimi Akötresie me xoue Nyidrë, matre hnei angeic hna thipetrije la aqane ujë ka ngazo ne la itre atrene la nöj. Ketre tu së fe, easa ce mele memine la itre atr ka pë metrötr kowe la itre trepene meköt ka draië i Iehova. Ame pe, ijiji easë hi troa metrötrëne la itre trepene meköti Iehova, e tro sa akökötrene the së la xoue Nyidrë me ihnimi së koi Nyidrë.—Ite edomë 14:2.

² Hnei Iehova hna hamë së la itre eamo ka mama ngöne la tusi Ite Edomë, matre xatua së ngöne la götrane cili. Nge ijije hi tro asë hi la itre keresiano, trahmany me föe, jeunes me qatr, a kepe thangane qa ngöne la itre eamo cili.

KOLA THUPË SË HNENE LA XOUE AKÖTRESIE

3. Thenge la Ite Edomë 17:3, hnauëne laka, tro sa thupëne la hni së? (Wange ju fe la iatr.)

³ Ame la nyipi kepin matre easa thupëne la hni së, ke hnene laka, öhne hi Iehova la itre alien ne hni së. Kolo lai a hape, öhne hi Nyidrë la nyipi pengö së, lo hna tha öhne hnei itre xan. (E jë la Ite Edomë 17:3.) Tro Nyidrëti a hnimi së, e tro sa nyialiene la mekuna së hnene la inamacane i Nyidrë, ka hamë së la mele ka pë pun. (Ioane 4:14) Nge tha tro kö a löthi së hnene la itre aqane ujë ne la fen me itre trengathoi Satana. (1 Ioane 5:18, 19) Ame la easa easenyi catr koi Iehova, ke kola kökötre trootro la ihnim me metrötre së koi Nyidrë. Thatreine kö së troa kuca la ngazo, nge atre hi së laka troa akötrë Iehova. Celë hi matre ame la kola tupathi së, loi e tro sa isa hnying ka hape, ‘Hnauëne laka tro ni a akötrëne tune lai la atre hnimi ni?’—1 Ioane 4:9, 10.

4. Hnene la xoue Iehova hna sawa tune kaa la ketre trejine troa kuci ngazo?

⁴ Hna tupathi Marta, ketre trejine föe qa Croatie troa kuci ngazo. Öni angeic: “Eni a isi memine la ajang troa kuci ngazo. Ngo hna thupë ni hnene la xoue Akötresie.”b Hna tune kaa? Hnei Marta hna lapa mekun la itre thangane ka ngazo, e tro angeic a kei kowe la huliwa cili. Loi e tro fe sa tui angeic. Ame la thangane ka ngazo e tro sa kei kowe la itre huliwa ka sis, ke ene la troa akötrë Iehova me thë la aqane imelekeu së me Nyidrë.—Gen. 6:5, 6.

5. Nemene la ini hne së hna xome qa ngöne la hna melëne hnei Leo?

⁵ Maine easa xoue Iehova, ke tha tro kö sa nyisineene la itre atr ka kuca la ngazo. Celë hi hna öhne hnei Leo, ka mel e Congo. Foa lao macatre thupëne la angeic a bapataiso, hnei angeic hna nyiqane ce tro memine la itre sinatro ka ngazo. Ame koi angeic, e tha angeice kö a kuca la itre huliwa ka sis, ke pëkö ngazo i angeic qëmekei Iehova. Ngo ame hë la pun, hnene la itre sinatro ka ngazo hna huli angeic troa iji gorok me kuci ngazo. Ame e cili, angeic hmaca mekune lo itre ini hna hamën hnei keme me thine i angeic, memine lo madrine i angeic ekö. Nemene hë la thangane lai? Hna saze la aqane waiewekë i angeic. Jëne la ixatua ne la itre qatre thup, lolo hmaca ha la aqane imelekeu i angeic me Iehova. Ame enehila, angeic a madrine troa qatre thup me pionie hut.

6. Drei la lue föe hne së hna troa ce wang enehila?

⁶ Tro sa ce wange la Ite Edomë mekene 9, ka qaja la föe ka inamacan me föe ka hmo. (Wange ju fe la Roma 5:14; Galatia 4:24.) Ame la easa ithanatane lai, ke the thëthëhmine kö së laka, hna haöthe la fene i Satana hnei huliwa ka sis me pornographie. (Efe. 4:19) Celë hi matre nyipiewekë tro sa akökötrene the së la xoue Iehova me iananyi memine la ngazo. (Ite edomë 16:6) Eje hi, thatraqai së asë, itre föe me itre trahmany la hna qaja ngöne Ite Edomë mekene 9. Ame lo lue föe hna qaja, ke nyidroti asë hi a hëne la itre atr “ka pë hni.” Nyidroti a isa hëne la itre atr, me hape, ‘Trohemi kowe la hnalapang matre troa xen.’ (Ite edomë 9:1, 5, 6, 13, 16, 17) Ngo isa kö la pun kowe la itre ka kapa la ihë ne la föe ka inamacan me föe ka hmo.

THIPËNE JË LA IHË NE LA FÖE KA HMO

7. Thenge la tusi Ite Edomë 9:13-18, nemene la pun kowe la itre atr ka kapa la ihë ne la föe ka hmo? (Wange ju fe la iatr.)

⁷ Tro sa ce wange la ihë ne la “föe ka hmo.” (E jë la Ite Edomë 9:13-18.) Tha hmahma kö eahlo troa hëne la itre atr ka pë hni. Öni eahlo, “Trohemi” matre tro sa feet. Nemene hë la thangane lai? Ame asë hi lo itre ka kapa la ihë i eahlo, ke itre ka troa mec. Ma easë jë mekune lo föe hna qaja ngöne Ite Edomë mekene 2, ene lo “föe tenyiwa.” Kola hmekë së ka hape: “Kola lö kowe la meci la uma i [eahlo].” (Ite edomë 2:11-19) Nge Ite Edomë 5:3-10 a hmekë së mina fe qa ngöne la ketre “föe tenyiwa” laka, “lue ca i [eahlo] a uti kowe la mec.”

8. Nemene la nyine tro sa isa iën?

⁸ Hetre nyine tro la itre atr ka drenge la ihë ne la “föe ka hmo” a iën. Tro kö angatr a kapa maine thipëne la ihë i eahlo? Ketre tu së fe, hetre nyine tro sa isa iën. Ame la kola mama ngöne tele maine Ëternet la itre huliwa ka sis maine pornagraphie, nemene la nyine tro sa kuca?

9-10. Nemene la itre kepin matre tha tro kö sa kuci ngazo?

⁹ Hane hi la itre kepin matre tha tro kö sa keithenge la itre huliwa ka sis. Önine la “föe ka hmo” ka hape: “Ka hnyapa la timi hna [atrekënö].” Nemene jë lai “timi hna [atrekënö]”? Tusi Hmitrötr a aceitunëne la ce meköle trefën memine la timi ka lepany. (Ite edomë 5:15-18) Kola madrine hnene la trahmany me föe ka faipoipo troa ce meköl trefën. Ngo tha celë kö ka traqa kowe la “timi hna [atrekënö].” Kola qaja la nyixetë. Kola kuca juetrën tune la atrekënö. Ame kowe la lue ka nyixetë, ka hnyapa la “timi hna [atrekënö]” ke, nyidro a mekun ka hape, pëkö ka öhnyi nyidro. Ngo ka tria la mekuna i nyidro! Öhne asë hi Iehova, pëkö ketre ewekë hna juetrën koi Nyidrë. Nge pëkö ketre ewekë ka haitre catr hune la troa nuetriji së hnei Iehova. Pëkö “ehnyapane” lai. (1 Kor. 6:9, 10) Ngo tha eje hmekuje kö lai.

¹⁰ Ame la atre ka nyixetë, ke angeic a hmahma, me wangaconyi angeic, me upunen la ifekë föen, me thë la itre fami. Haawe, ka inamacane la atr ka thipëne la ihë ne la föe ka hmo. Pëhë imelekeu ne la itre ka nyixetë me Iehova. Nge kolo fe a tithi angatr hnene la itre mec ka pë nyin. (Ite edomë 7:23, 26) Kola nyipune la tusi Ite Edomë mekene 9 hnene la xötre 18, kola hape: ‘Ame la itre ka kapa la ihë i eahlo, ke angatr ngöne la gaa jui ne la hua.’ Hnauëne laka, alanyim la ka kapa la ihë i eahlo, ngo kolo pe a troxomi angatre kowe la mec?—Ite edomë 9:13-18.

11. Pine nemen matre ka ngazo catr troa goeë pornographie?

¹¹ Ame la ketre hnö, ke ene la troa goeë pornographie. Hna mekune hnei itre xan ka hape, tha ka ngazo kö troa goeë pornographie. Ngo kolo pe a thaipië angatr me ahmahmanyi angatr qëmekei itre xan, nge jole troa nuetrije la hna majemine cili. E tro sa goeë pornographie, ke tro lai a jol troa hule hmaca la itre iatr qa ngöne la mekuna së. Ketre, tha eje kö a lep apujene la itre aja ka ngazo, ngo eje pe a ahlëne catrën. (Kol. 3:5; Iako. 1:14, 15) Nyipici laka, alanyim thene la itre ka goeë pornographie, la ka kei kowe la kuci ngazo.

12. Nemene la ka xatua së troa nuetrije la itre iatr ka ngazo ka troa amejëne the së la aja troa ce meköl?

¹² Nemene la nyine tro sa kuca e traqa mama la ketre iatr ka sis ngöne la tablete maine mobilisi së? Meke ju! Tha tro pi kö sa goeën. Tro sa atreine nuetrije la itre iatre cili, e troa xecie koi së ka hape, pëkö ketre ewekë ka sisitria hune la imelekeu së me Iehova. Ame la itre xaa iatr ke, tha itre iatr ka sisi kö, ngo itre ej a amejëne the së la aja troa ce meköl. Pine nemen matre tha tro kö sa goeën itre ej? Pine laka, tha aja i easë kö troa traqa kowe la kuci ngazo. (Mat. 5:28, 29) Öni David, ketre qatre thup qa Thaïlande: “Eni a ketre hnying ka hape: ‘Ngacama tha iatr ka sisi kö la hnenge hna goeën, ngo hapeu, madrine kö Iehova koi ni?’ Ame la eni a hnyinge tun, ke kola xatua ni troa inamacan.”

13. Nemene la ka troa xatua së troa ujë tune la itre ka inamacan?

¹³ Maine tro sa akökötrene the së la xoue troa akötrë Iehova, ke tro lai a xatua së troa ujë tune la itre ka inamacan. Ame la xoue Akötresie, ke, “qane” maine trepen ne “la inamacan.” (Ite edomë 9:10) Celë hi ka mama ngöne la pane götrane la tusi Ite Edomë mekene 9. Kola qaja e cili, lo ketre föe ka nyihatren “la inamacan.”

KAPA JË LA IHË NE LA FÖE KA INAMACAN

14. Nemene la ketre ihë hna qaja ngöne Ite Edomë 9:1-6?

¹⁴ E jë la Ite Edomë 9:1-6. Ame e celë, kola qaja la ihë i Iehova, lo Atre Xupi së me Qaane la inamacan. (Ite edomë 2:6; Rom. 16:27) Kola qejepengöne la ketre uma atraqatr ka 7 lao ikapa. Kolo hi lai a amaman ka hape, ka hame Iehova nge Nyidrëti a kapa la nöjei atr ka thel la inamacane i Nyidrë.

15. Nemene la aja i Akötresie koi së?

¹⁵ Ka hame Iehova. Kola mama la thiina cili thene la föe ka nyihatrene la nyipi “inamacan,” hna qaja ngöne Ite Edomë mekene 9. Kola qaja ngöne la mekene cili ka hape, ase hë eahlo ati peleitr, me lomëne la waina, me hnëkëne la miitr. (Ite edomë 9:2) Ketre, ame ngöne la xötre 4 me 5 kola hape: “Öni [eahlo] kowe la ate pë hni, ka hape: ‘Trohemi, ma hane xeni la [falawang].’ ” Pine nemene matre loi e tro sa kapa la ihë ne la föe cili, me xeni la hnei eahlo hna hnëkën? Aja i Iehova tro la itre nekö i Nyidrë a ujë tune la itre ka inamacan me mel. Xele kö Nyidrë tro sa axecië mekune menu, me xeni pun e thupen. Celë hi matre “nyidëti a amë la inamacane thatraqai ange ka meköt.” (Ite edomë 2:7) Tro la xoue Akötresie a uku së troa amadrinë Nyidrë. Celë hi matre easa kapa la itre eamo qaathei Nyidrë me trongën itre ej.—Iako. 1:25.

16. Nemene la aqane xatua Alain hnene la xoue Akötresie troa axecië mekune hnyawa, nge nemene la thangane lai?

¹⁶ Hnene la xoue Akötresie hna xatua Alain troa axecië mekune hnyawa. Alain la ketre qatre thup, nge ka porofesör fe nyidrë. Öni nyidrë: “Alanyim la itre sine huliwang ka qaja ka hape, hetre ini hnei angatr hna xom qa ngöne la itre film ka ngazo.” Ngo atre hi nyidrë ka hape, tha ka nyipici kö lai. Öni nyidrë, “Pine laka eni a xoue Akötresie, matre xele kö ni ma hane goeëne la itre film cili. Nge hnenge fe hna qaja kowe la itre sine huliwang la kepin matre tha eni kö a goeën la itre film ka ngazo.” Hnei nyidrëti hna trongëne la itre eamo ne la föe ka inamacan, memine la “jëne trotrohnin.” (Ite edomë 9:6) Hna ketr la itre xaa sine huliwa i Alain hnene la aqane ujë i angeic, matre angatre hë enehila a ini Tus me sine la itre icasikeu.

17-18. Nemene la itre manathith hna kapa hnene la itre ka drenge la ihë ne la föe ka inamacan, nge nemene la itre manathith hnei angatr hna treqen elany? (Wange ju fe la iatr.)

¹⁷ Hnei Iehova hna xome la ceitun ne la lue föe matre troa amamane koi së la aqane tro sa madrine elany. Ame la itre ka kapa la ihë ne la “föe ka hmo,” ke angatr a ajane la madrine ‘ka hnyapa’ ngo hna juetrën. Ame pe, tha mekune kö angatr la pune ka ngazo koi angatr elany, ene la troa ut kowe “la gaa jui ne [la hua].”—Ite edomë 9:13, 17, 18.

¹⁸ Ngo tha celë kö ka traqa kowe la itre ka kapa la ihë ne la föe ka inamacan! Angatr a madrine ke, hetrenyi asë hi angatr la itre ewekë ka troa easenyi angatr koi Iehova. (Is. 65:13) Öni Iehova jëne Isaia: “Drei eni hnyawa ju, nge xeni jë la ka loi, nge tro epuni lai a madrin hnene la aqane lolo la xen.” (Is. 55:1, 2, NWT) Easa inine troa hnime la hnei Iehova hna hnim, me sisine la hnei Nyidrëti hna sisin. (Sal. 97:10) Ketre, easa madrine troa hane hëne la itre xan troa kapa la nyipi “inamacan.” Kösë easa “hë hune la ite ga draië ne la lapa, ka hape: ‘E ka la ate [ka thatrein], tropi e kolemi.’ ” Ame la itre manathith hne së me itre xan hna troa kapa, ke tha koi enehila hmekuje kö. Ngo ka epine palua la itre manathithe cili, nge ka xatua së troa “mel,” me “trongëne la jëne trotrohnin.”—Ite edomë 9:3, 4, 6.

19. Thenge la Ate Cainöj 12:13, 14, nemene la nyine tro sa kuca? (Wange ju la hna eköhagen, hna hape “Ka Hetre Thangane La Xoue Akötresie.”)

¹⁹ E jë la Ate Cainöj 12:13, 14. Epi tro la xoue Akötresie a thupëne la hni së qa ngöne la itre aja ka ngazo, me acatrene la aqane imelekeu së me Iehova ngöne la itre drai ne la pun. Tro fe la xoue cili, a uku së troa hëne la itre xan matre hane kepe thangan qa ngöne la nyipi “inamacan.”