Troa Jelemeköti Së Hnene La Lapaune Me Itre Huliwa

1. Ame la easa mekun la lapaune i Aberahama, nemene la hnying hne së hna isa hnyingën?

ALANYIMU la itre ka atre la ëje i Aberahama, ngo ala xalaithe hi la ka atre angeic hnyawa. Ngo ame kö easë, atre catre së la pengöi Aberahama. Tusi Hmitrötr a qeje angeic ka hape, “keme ne la itretre lapaun.” (Rom. 4:​11) Maine jë, easa isa hnying ka hape, ‘Ijijinge fe kö troa hane catre lapaun tui Aberahama?’ Öö, ijiji easë asë hi.

2. Pine nemene matre nyipiewekë tro sa xomi ini qaathei Aberahama? (Iakobo 2:​22, 23)

² Ame la ketre aqane tro sa acatrene la lapaune së tui Aberahama, ke ene la troa xomi ini qaathei angeic. Hnei angeice palahi hna drengethenge Akötresie. Hnei angeic hna fek kowe la ketre nöj gaa nany, nge itre macatre ne lapa itaat angeic. Nge maine tha sewe angeice ju hnene la ketre angela, ke angeice ha huujë Isaaka, nekö hnimina i angeic, koi Iehova. Kolo hi lai a amamane la ecatrene la lapaune i angeic. Hnene la lapaun me itre huliwa i Aberahama, matre hna kepe angeic me nyisinee i angeic hnei Akötresie. (E jë la Iakobo 2:​22, 23.) Aja i Iehova tro easë asë, me eö fe, a hane kapa la itre manathith cili. Celë hi matre, hnei Nyidrëti hna upi Paulo me Iakobo, troa qeje Aberahama ngöne la Tusi Hmitrötr. Tro sa ce wang la hnei nyidro hna cinyanyine ngöne Roma mekene 4 me Iakobo mekene 2. Hnei nyidro hna isa qaja la ketre mekun ka nyipiewekë göi Aberahama.

3. Nemene la xötr hnei Paulo me Iakobo hna isa amexej?

³ Hnei Paulo me Iakobo hna isa amexeje la tusi Genese 15:​6, kola hape: “Aberama a lapaune ju koi Iehova, nge pine lai, hna jelemeköti angeic.” Ame la atr “ka meköt” ngöne la Tusi Hmitrötr ke, kola qaja la atr hna kapa hnei Akötresie, nge ka pë engazon. Ketre ewekë lai nyine hain! Ijije hi tro Akötresie a goeën la ketre atr ka tha pexeje kö, ceitu me ketre atr ka pë engazon. Eje hi, aja i easë tro Iehova a jelemeköti së. Tro sa ce wang la hnei Aberahama hna kuca matre jelemeköti angeice jë, memine la nyine tro fe sa kuca.

TROA JELEMEKÖTI SË E KA LAPAUNE SË KOI IEHOVA

4. Pine nemene matre tha itre atr ka meköti kö së?

⁴ Ame ngöne la tusi Roma, hnei Paulo hna qaja ka hape, itre atr ka ngazo asë hi së. (Rom. 3:​23) Ngo tro Akötresie a jelemeköti së tune kaa, nge atr ka ngazo pe së? Hnei Paulo hna xom la tulu i Aberahama matre sa la hnyinge celë.

5. Hnei nemene matre hna jelemeköti Aberahama hnei Iehova? (Roma 4:​2-4)

⁵ Hnei Iehova hna jelemeköti Aberahama lo angeic a mel ngöne la nöj e Kanana. Tha hnei Iehova kö hna jelemeköti angeic, ke angeic a metrötrën hnyawan la Wathebo i Mose. Hnauën la easa qaja lai? (Rom. 4:​13) Pine laka, hna hamën la Trenge Wathebo koi Isaraela, 400 lao macatre thupen. Haawe, nga hnei nemene matre jelemeköti Aberahama pi hnei Iehova? Atraqatr la ihnimi gufa i Iehova, matre hnei Nyidrë hna jelemeköti Aberahama pine la lapaune i angeic.​—E jë la Roma 4:​2-4.

6. Pine nemene matre Iehova a jelemekötine la atr ka ngazo?

⁶ Paulo a qaja ka hape, “tro ha jelemekötine” la atr ka lapaune koi Akötresie. (Rom. 4:5) Öni angeic hmaca: “Ka ihmeku memine lo aqane qejepengöne Dravita la madrine ka ej thene la hna jelemekötin hnei Akötresie, ngacama tha hna jelemekötine pine la itre huliwa i angeic. Öni Dravita: ‘Madrine la itre atr hna nue ngazon, me itre hna köletriji ngazon. Nge madrine la atre hnei Iehova hna thëthëhmi ngazon.’ ” (Rom. 4:​6-8; Sal. 32:​1, 2) Iehova a nu, maine köletrij la ngazo ne la itre ka lapaune koi Nyidrë. Nyidrëti a nue hnyawan, me thëthëhmine la itre ngazo cili. Pine la lapaune i angatr, matre ame koi Nyidrë, itre atr ka meköt, nge ka pë engazon angatr.

7. Pine nemene matre hnei Akötresie hna jelemekötine la itre hlue i Nyidrëti ekö?

⁷ Ngacama tha ka pexeje kö Aberahama, me Dravita memine la itre xaa hlue i Nyidrë, ngo hnei Nyidrëti hna jelemeköti angatr. Pine laka, itre ka lapaun angatr, matre ame koi Iehova, pëkö engazo i angatr. Tha ceitui angatre kö memine la itre ka tha nyihlue i Nyidrë. (Efe. 2:​12) Tune la aqane qaja i Paulo ngöne la tusi angeic, ka nyipiewekë la lapaun matre troa hetre imelekeu me Akötresie. Ame Aberahama me Dravita, ke lue sinee i Iehova, ke nyidro a lapaun koi Nyidrë. Ijiji easë asë hi troa hane tui nyidro.

KA CE TRO KÖ LA LAPAUN ME HULIWA?

8-9. Nemene la mekuna ne la itre xan göne la hna cinyanyine hnei Paulo me Iakobo, nge pine nemen?

⁸ Qaan ekö, ka isazikeu la aqane goeëne la itre he ne hmi la lapaun me itre huliwa. Itre xan a qaja ka hape, tro sa mel, e tro hi sa lapaun koi Iesu Keriso Joxu së. Ma ase fe hë epun dreng ka hape, “Tro hi sa lapaune koi Iesu, nge mele hë së.” Angatr a acatrene la mekuna i angatr memine lo hna qaja hnei Paulo, ka hape: “Hna jelemekötin hnei Akötresie, ngacama tha hna jelemekötine pine la itre huliwa i angeic.” (Rom. 4:6) Ngo itre xaa he ne hmi a qaja ka hape, tro sa mel e tro sa vizitën la itre götran ka hmitrötr, me kuca la itre ewekë ka loi. Angatr a xom la tusi Iakobo 2:​24 matre acatrene la mekuna i angatr. Kola hape: “Troa jelemekötine la atr hnene la itre huliwa, ngo tha hnei lapaune hmekuj.”

⁹ Pine laka ka isazikeu la hna qaja, itre xaa théologiens a mekun ka hape, ka icilekeu la mekuna i Paulo me Iakobo. Ame koi angatr, ke Paulo a qaja ka hape, lapaune hi la ka troa jelemekötine la atr, ngo Iakobo pe a qaja ka hape, nyipiewekë tro la lapaun a ce tro me itre huliwa, matre kepe së hnei Akötresie. Önine la ketre porofesör ne théologie ka hape: “Tha trotrohnine kö Iakobo la kepin matre Paulo a qaja ka hape, troa jelemekötine la atr hnene la lapaune i angeic, ngo tha nyipiewekë kö la itre huliwa.” Ngo ame la tusi Iakobo memine la tusi Paulo koi angetre Roma, ke qaathene la ua i Akötresie. (2 Tim. 3:​16) Matre hetre aqane tro sa trotrohnine la hnei nyidro hna qaja. Troa tune kaa? Loi e tro sa ce wang la itre xötr qëmeken me e thupen.

10. Nemene “huliwa” hnei Paulo hna qaja e celë? (Roma 3:​21, 28) (Wange ju fe la iatr.)

¹⁰ Nemene “huliwa” hnei Paulo hna qaja ngöne Roma mekene 3 me 4? Kolo “itre huliwa ne la wathebo,” ene la Wathebo i Mose, lo hnei Akötresie hna hamën koi Isaraela ngöne la Wetr e Sinai. (E jë la Roma 3:​21, 28.) Ame ngöne la hneijine i Paulo, itre xaa keresiano ne Iudra a mekun ka hape, ka nyipiewekë palahi troa xötrethenge la Wathebo i Mose. Matre, hnei Paulo hna xome la tulu i Aberahama göi troa amamane ka hape, troa jelemekötine la atr hnene la lapaune i angeic koi Akötresie, ngo tha hnene kö la “itre huliwa ne la wathebo.” Ketre mekune lai ka ithuecatre koi së! Ke kola amamane laka, troa kepe së hnei Iehova, e tro sa lapaune koi Nyidrë me koi Iesu.

11. Nemene la itre “huliwa” hnei Iakobo hna qaja?

¹¹ Nge nemene la itre “huliwa” hnei Iakobo hna qaja ngöne la mekene 2 ne la itusi angeic? Tha angeice kö a qaja la “itre huliwa ne la wathebo” tui Paulo. Iakobo pe a qaja la itre huliwa hna kuca hnene la keresiano, nge ka amamane la lapaune i angeic koi Akötresie. Tro sa ce wang la lue ceitun hnei Iakobo hna xom, matre qejepengöne la mekuna i angeic.

12. Nemene la aqane amamane Iakobo laka, ka ce tro la lapaun me itre huliwa? (Wange ju fe la iatr.)

¹² Ame ngöne la pane ceitune i Iakobo, angeic a qaja kowe la itre keresiano la enyipiewekën tha tro kö a ië hna hnim. Angeic a xom la ceitun ne la ketre atr ka hnim la atr ka trenamo, me methinën la ka pë ewekë. Iakobo a amamane laka, maine tro la atre cili a qaja ka hape, ka lapaun angeic koi Akötresie, ke troa jelethoi angeic hnene la itre huliwa i angeic. (Iako. 2:​1-5, 9) Ame ngöne la hnaaluene ceitun, Iakobo a qaja la ketre atr ka öhne la trejin me angeic ka pë iheetr me nyine xen, ngo pëkö hnei angeic hna kuca. Maine tro la atre cili a selën ka hape, ka lapaun angeic, nge pë pe huliwa, ke gufa kö la lapaune i angeic. Öni Iakobo, “maine pëkö huliwa, ka meci lai lapaun.”​—Iako. 2:​14-​17.

13. Drei la hna qaja hnei Iakobo matre troa amamane la enyipiewekën troa ce tro la lapaun me itre huliwa? (Iakobo 2:​25, 26)

¹³ Hnei Iakobo hna qeje Rahaba matre troa amamane ka hape, ka nyipiewekë troa ce tro la lapaun me itre huliwa. (E jë la Iakobo 2:​25, 26.) Hnei Rahaba hna drei mejen la itre huliwa ka mene i Iehova, nge atre hi angeic ka hape, ce Nyidrë memine la angetre Isaraela. (Ios. 2:​9-​11) Ame lo ketre ijin, hnei angeic hna amamane la lapaune i angeic, la angeic a juetrëne la lue atre Isaraela ka kötre mel. Ame e cili, hna jelemeköti angeic tui Aberahama, ngacama tha ka pexeje kö angeic, nge tha föe ne Isaraela pena kö. Kolo hi lai a amamane hnene la tulu i Rahaba laka, nyipiewekë tro sa amamane la lapaune së hnene la itre huliwa.

14. Pine nemene matre tha ka icilekeu kö la mekuna i Paulo me Iakobo?

¹⁴ Haawe, isa kö la aqane qejepengöne Paulo me Iakobo, la lapaun me itre huliwa. Ame Paulo, aja i angeic troa amamane kowe la itre keresiano ne Iudra ka hape, tha hnene kö laka, angatr a trongëne la Wathebo i Mose, matre troa kepe angatr hnei Iehova. Nge ame pena Iakobo, ke angeic a qaja la enyipiewekën tro la nöjei keresiano a amamane la lapaune i angatr, jëne la hna kuca la loi koi itre xan.

15. Qaja jë la itre xaa huliwa ka troa amamane la lapaune së? (Wange ju fe la iatr.)

¹⁵ Tha Iehova kö a qaja ka hape, tro sa kuca asë la nöjei huliwa i Aberahama matre tro fe a hane jelemeköti së. Ame enehila, nyimu aqane tro sa amamane la lapaune së. Tune la tro sa kapa la itre ka xötrei traqa kowe la itre icasikeu, maine xatuan la itre trejin ka aja ixatua, maine hnim la itre atrene la fami së. Itre huliwa lai hna amanathithin hnei Akötresie. (Rom. 15:7; 1 Tim. 5:​4, 8; 1 Ioane 3:​18) Ame la ketre aqane tro sa amamane la lapaune së, ke ene la troa catre cainöjëne la maca ka loi. (1 Tim. 4:​16) Ijiji së asë hi troa amamane laka, tro kö a eatr la itre hna thingehnaean hnei Iehova, nge ka meköt palahi la itre aqane ujë i Nyidrë. Maine celë hi hne së hna kuca, xecie koi së laka, tro Akötresie a jelemeköti së me hane nyisinee së.

E TRO SA CATRE MEJIUN TRO FE HA CATRE LA LAPAUNE SË

16. Nemene la mejiune i Aberahama, nge pine nemene matre ka nyipiewekë troa lapaun?

¹⁶ Ame ngöne Roma mekene 4, hetre ketre ini hne së hna xom qa ngöne la tulu i Aberahama, ene la enyipiewekëne troa mejiun. Hnei Iehova hna sisinyi koi Aberahama ka hape, “Jëne eö, tro la nöjei fami e cailo fen a manathith.” Ketre manathith ka tru la hnei Aberahama hna lapa treqen! (Gen. 12:3; 15:5; 17:4; Rom. 4:​17) Ngo 100 hë lao macatre i Aberahama, nge 90 lao macatre i Sara, nge pë palakö nekö i nyidro. Ame koi easë itre atr, ke tha ijiji nyidro hmaca kö troa hnaho. Ketre itupath ka tru lai koi Aberahama. Ngo “hnei Aberahama hna mejiun me lapaun laka, tro kö nyidrëti a keme ne la itre nöj.” (Rom. 4:​18, 19) E thupen, hna eatre lo hna lapa treqen, nge hna hnaho Isaaka, lo matran hna thingehnaean.​—Rom. 4:​20-​22.

17. Nemene la ka amamane ka hape, ijije hi troa jelemeköti së hnei Iehova me hane nyisinee i Nyidrë?

¹⁷ Ijije fe hi troa kepe së hnei Akötresie me nyisinee i Nyidrë, tui Aberahama. Celë hi hnei Paulo hna qaja la kola hape: “Tha koi Aberahama hmekuje kö lo hna hape: ‘Hna jelemekötin,’ ngo koi easë mina fe, itre hnei Akötresieti hna jelemekötin pine la hne së hna lapaune kowe la Atre amele Iesu Joxu së qa hna mec.” (Rom. 4:​23, 24) Tui Aberahama, loi e tro sa lapaune koi Iehova, me amamane la lapaune së hnei itre huliwa, me catre mejiun. Ame ngöne Roma mekene 5, Paulo palahi a qaja la mejiun. Nge ame ngöne la tane mekun e thupen, tro sa ce wang la itre pane xötr ne la mekene cili.