Loi Me Ngazo: Drei La Nyine Tro Sa Dreng?
Itre milio lao atr ka öhne laka, ka lolo nge nyine mejiune kow, la itre eamo qa hnine la Tusi Hmitrötr. Tro sa ce wang la 4 lao götran ka amamane ka hape, nyine loi koi së itre ej.
1. Mele Ne Trefën
Isapengöne kö la hna mekun hnene la itre atr göi faipoipo me aqane troa madrine la lue trefën.
ÖNI TUSI HMITRÖTR: “Ame nyipunie itre trahmany, nyipiewekë troa isa hnimi föen, tune la aqane hnime nyipunie la itre ngönetrei i nyipunie. Nge nyipiewekë mina fe tro la itre föe a metrötrëne hnyawa la itre föi angatr.”—Efeso 5:33.
ALIEN: Akötresie la ka acile la faipoipo, matre atre kö Nyidrë la nyine troa kuca hnene la lue trefën matre troa madrin. (Mareko 10:6-9) Troa cilehut la madrine i nyidro, e tro la trahmanyi a wangatrune la aja i föe, nge tro la föe a wangatrune la aja i trahmany. Troa mama la ihnimi ne la trahmanyi kowe la föe, e tro angeic a thupëne me loi thiina koi eahlo. Ketre tune la föe, troa metrötrën la trahmany hnei aqane ithanata me aqane ujë.
THANGAN KOI ITRE XAN: Pëkö madrine i Quang me Thi, lue trefëne qa Vietname. Ame koi nyidro, hna xomacone la mele i nyidro hnei faipoipo. Ka ngazo palahi la thiina i Quang koi Thi. Öni Quang: “Tha nyipine kö ni la itre mekuna i Thi, nge hnenge palahi hna thaipië angeic.” Matre Thi hë a mekun troa seihnacil. Öni eahlo: “Kösë pëhë mejiuneng me metrötreng kowe la föeng.”
Ame ngöne la ketre drai, hnei Quang me Thi hna öhne la hna qaja hnei Tusi Hmitrötr göi aqane troa trongëne la hna qaja hnei Efeso 5:33, ngöne la mele i nyidro. Öni Quang, “Hna xatua ni hnene la xötre celë troa loi thiina matre tro Thi a öhne laka, tru la ihniming koi angeic, nge ajang troa thupë angeic me nyipiewekë angeic. Ame hë e cili, angeice hë a hnimi ni me metrötrë ni.” Ame pena Thi, öni eahlo, “Ame la eni a trongëne la Efeso 5:33, ene la troa metrötrëne la föeng, ke eni a öhne laka, nyidrëti a thupë ni me hnimi ni, nge tingetinge hë la mele i nyio.”
Maine epuni a aja itre xaa ithuemacany göne la faipoipo, e jë la Hmeke Jë! Na. 2 2018, hna hape, “12 Lao Jëne Madrine Kowe La Fami” ngöne jw.org.
2. Aqane Tro Sa Ujë Koi Itre Xan
Alanyim la itre atr hna qanangazone pine laka, hetre nöje i angatre kö, me hmi, nge ka isapengöne kö angatr. Ame itre xan, hna qanangazo angatr ke, itre ka homosexuels.
ÖNI TUSI HMITRÖTR: “Metrötrëne ju la nöjei atr asë.”—1 Peteru 2:17.
ALIEN: Tha Tusi Hmitrötr kö a qaja ka hape, troa xele ma wang la itre atr pine la race i angatr, me nöje i angatr, me aqane mele i angatr. Ngo kolo pe a ini së troa metrötrëne la nöjei atr asë, ngacama ketre race i angatr kö, me isa nöj, maine ka pë mo itre xan, maine trenamo itre xan. (Itre Huliwa 10:34) Ngacama isa hmi së kö me itre xan, nge tha ka loi kö koi së la aqane ujë i angatr, ngo loi e tro palahi sa hnimi angatr me metrötrë angatr.—Mataio 7:12.
THANGAN KOI ITRE XAN: Hnene la itre hnei Daniel hna dreng, matre nyiqane jë angeic xele ma wang la itre sinoa, ke ame koi angeic, troa angazone elanyi la zi angeic, hnene la itre atr ka tun. Matre angeic ha methinën asë la itre sinoa, goi qaqa angatre fe ngöne la gaa tru atr. Öni Daniel, “Eni hi lai a amamane ka hape, ka sisitria kö la nöjeng hune la itre xan. Tha ase pi kö ni mekun ka hape, ka ngazo catr la hnenge hna kuca.”
E thupen, hnei Daniel hë hna öhne la itre ini qa hnine la Tusi Hmitrötr. Öni angeic, “Hnenge hë hna saze la aqane waiewekëng, eni ha goeëne la itre atr tui Akötresie. Ame koi Nyidrë, ceitu angatr asë hi, ngacama isa nöje i angatre kö.” Ame enehila, tune kaa la aqane goeën Daniel la itre atr? Öni angeic: “Ame enehila, tha eni hmaca kö a goeën ka hape, atre kaa la, ngo eni hë a hnim la nöjei pengöne atr. Nge ame la itre sineeng ke, itre atr ka xulu qa ngöne la nöjei pengöne nöj.”
Maine epuni a aja itre xaa ithuemacany, e jë la Hmeke Jë! Na. 3 2020, hna hape, “Y a-t-il un remède contre les préjugés ?” ngöne jw.org.
3. Mani
Tru la itre atr ka isine troa trene mani, matre troa madrin me troa hetre mele ka loi elany.
ÖNI TUSI HMITRÖTR: “Inamacan a thupë së, tune la mani, ngo hane hi la enyipiewekëne la atrehmekune: troa amelene la atr ka inamacan.”—Atre Cainöj 7:12, NWT.
ALIEN: Ngacama ka nyipiewekë la mani, ngo thatreine kö eje hamë madrin me mele ka lolo elany. (Itre Edromë 18:11; 23:4, 5) Waea, tro sa kapa la nyipi madrin me mele ka lolo elany, e hne së hna trongën la itre ini qa hnine la Tusi Hmitrötr.—1 Timoteo 6:17-19.
THANGAN KOI ITRE XAN: Ame Cardo, atre Indonésie, ke mele i angeic pe hi la mani. Öni angeic, “Hetrenyi asë hi ni la itre hna piine hnene la itre atr. Ka ihamë palahi ni ngöne la itre nöj, me itöne la itre ewekë ka tru thupen, me itre loto me itre uma.” Ame ju hi la ketre drai, lapa ju pe hi Cardo, nge pë hnyawa ewekë i angeic. Öni Cardo, “Hna atrekënö ni, matre ame lo manieng, hnenge hna huliwa koi itre macatre, ke sameke hi la kola patr. Hnenge hna nue la meleng troa thele mani, ngo e thupene hë, ke hleuhleu me akötr, me mel ka pë aliene la hnenge hna kapa.”
Hnei Cardo hna nyiqane trongëne la itre eamo qa hnine la Tusi Hmitrötr göi mani. Tha angeic hmaca kö a isine troa thele mani, ngo angeice pë hë enehila a melën la ka ijij. Nge öni angeic, “Ame la nyipi mo koi ni enehila, ke ene la imelekeung me Akötresie. Nge pëkö ka atreine troa thapa hmaca lai qaatheng. Meköle hnyawa ha ni itre jidr, nge ka madrin palahi ni.”
Maine epuni a aja itre xaa ithuemacany göne la hna qaja hnei Tusi Hmitrötr göi mani, e jë la tane mekune “L’instruction et l’argent garantissent-ils un bel avenir ?” ngöne la Ita Ne Thup Na. 3 2021, ngöne jw.org.
4. Ce Meköl Trefën
Isa mekunane kö la itre atr göi ce meköl trefën.
ÖNI TUSI HMITRÖTR: “Iananyi [pi] memine la kuci ngazo. Nge nyipiewekë tro nyipunie a atre la aqane troa isa xomehnöthi ngönetrei, matre tro pala hi ej a pë ethan, nge troa kapa hnei Akötresie. Nge the tro kö a nyinyape thele la itre aja ka sis, tune la aqane ujë ne la itre ka thatre Akötresie.”—1 Thesalonika 4:3-5.
ALIEN: Tusi Hmitrötr a qaja hnyawa la ijine ka loi troa ce meköl trefën. Ame la hnëewekë “kuci ngazo” ke, kolo fe a qaja la nyixetë, me nyi föe ne gojeny, me ce meköl i lue atr ka tha faipoipo kö, me ce meköl i lue trahmanyi maine lue föe, me ce meköle i atr me öni. (1 Korinito 6:9, 10) Ketre ahnahna qaathei Akötresie la troa ce meköl trefën, nge thatraqane hmekuje hi la trahmanyi me föe ka faipoipo.—Itre Edromë 5:18, 19.
THANGAN KOI ITRE XAN: Öni Kylie, ketre föe qa Australie ka hape: “Öning pena kö ka hape, e tro ni a ce meköl trefën, nge tha ka faipoipo kö, ke tro hë lai a hnimi ni, nge tro fe hë a tingeting la meleng. Ngo triane kö la mekunang ke, pëkö ka hnimi ni, nge kösë ka luzi hë ni.”
Hnei Kylie hna nyiqane inin me trongën la hna qaja hnei Tusi Hmitrötr göi ce meköl trefën. Öni angeic, “Hnenge hna öhne laka, ame la itre trepene meköt i Akötresie, ke kola thupë së matre tha tro kö a traqa la itre akötr. Hnene laka, eni hë a drengethenge Iehova, lolo hë la meleng, nge hetre ka hnimi ni hë. Ame hë la eni a trongëne la itre trepene meköt qa hnine la Tusi Hmitrötr, kolo hi lai a thupë ni qa ngöne la itre akötr!”
Maine epuni a aja itre xaa ithuemacany, e jë la tane mekun hna hape, “Vivre en couple sans être mariés : Qu’en dit la Bible ?” ngöne jw.org
Kola xatua së hnene la Atre Xupi së troa atre la ka loi me ka ngazo. Ngacama tha ka hmaloi kö troa trongëne la itre trepene meköt, ngo ame pe, nyine loi koi së. Ka xecie hnyawa koi së laka, e tro sa trongëne itre ej, ke tro hë së lai a madrin epine palua.