Aqane Troa Öhne La Tingeting Ngacama Hetre Isi Me Ihumuth
Öni Gary ketre sooc ekö, “Qëmeken tro eni a ini Tusi Hmitrötr, thatre kö ni la kepin matre tru catr hnei akötr, me itre ewekë ka tha meköti kö me itre jol ngöne la fen. Ngo enehila, tingetinge hë ni. Atre hë ni laka, tro kö Iehova a saze la fen, matre tro sa mele tingeting.”
Tune la hna qaja hnei itre xan e cahu, tha Gary casi kö la ka öhnyi tingeting jëne la Tusi Hmitrötr.
ÖNI TUSI HMITRÖTR: “Ame nyipë Iehova fe, ka lolo nyipë nge nyipëti a treqen troa nue la ngazo.”—Salamo 86:5.
KA IAKEUKAWANY: “Kola amamane hnene la xötre celë laka, Iehova a nue la ngazo së. Atre hi ni laka, tro Nyidrëti a köletrij la itre ngazo hnenge hna kuca ekö, lo eni a sooc.”—Wilmar, Colombie.
ÖNI TUSI HMITRÖTR: “Eni a xupe la hnengödrai ka hnyipixe me fene hnengödrai ka hnyipixe; tha tro hmaca kö a mekune la itre ewekë hnapan, tha tro hmaca kö itre ej a ajolëne la hni.”—Isaia 65:17.
KA IAKEUKAWANY: “Pine laka, hneng hna sooc ekö, matre eni a meci fë stress post-traumatique me dépression enehila. Ngo, kola amekunë ni hnene la xötre celë laka, easenyi hë tro Iehova a apatrene la itre mekun ka ajolë ni me apatrene trij la itre pung ka ngazo. Tha tro hmaca kö itre ej lai a angazone la hning me mekunang. Epi canga traqa pi la ijine cili!”—Zafirah, États-Unis.
ÖNI TUSI HMITRÖTR: “Fene la mus i angeic, tro ha eng la itre atr ka meköt, nge tro ha tru la tingeting uti hë la troa patre la treu.”—Salamo 72:7.
KA IAKEUKAWANY: “Eni pala hi a lapa mekun la itre trengewekë cili. Easenyi hë troa apëne la itre isi, nge tha tro hmaca kö së a hnehengazone la itre sinee së.”—Oleksandra, Ukraine.
ÖNI TUSI HMITRÖTR: “Tro ha mele hmaca la itre wezipo i ö. . . . Hlë jë nge sue madrine jë, epun itretre lapa ngöne la xaxau!”—Isaia 26:19.
KA IAKEUKAWANY: “Ame la kola humuth la angetre Tutsi, tru catr la itre atrene la faming hna humuth. Ngo, kola amaman hnene la xötre celë laka, tro hmaca kö ni a iöhnyi me angatr. Eni a lapa treqene la ijin tro hmaca ni a drenge la itre nine i angatr, la ijine kola amele angatre hmaca!”—Marie, Rwanda.
ÖNI TUSI HMITRÖTR: “Haawe panacas, nge tro ha patr la itre atr ka ngazo . . . Ngo tro ha lapane la ihnadro hnene la itre ka ipië, nge tro hë angatr a madrine la tingeting atraqatr.”—Salamo 37:10, 11.
KA IAKEUKAWANY: “Ngacama pëhë isi, ngo hetrenyi pala hi la itre ewekë ka tha meköti kö, me itre atr ka ngazo thiina. Kola akeukawanyi ni hnene la itre xötre celë. Öhne asë hi Iehova, nge trotrohnine hi Nyidrë la hnenge hna melën. Ase hë Nyidrëti qaja ka hape, easenyi hë troa apatrene la itre akötr, nge tro hë së a thëthëhmine itre ej.”—Daler, Tajikistan.
Ame la itre atr hna qaja e caha ke itre Temoë Iehova hë angatr, nge itre ka tingetinge hë hnene la ixatua i Tusi Hmitrötr. Hnene la Tusi Hmitrötr hna ini angatr troa elë hun la imethinë pi hane ngönetrei, me pi nöj, me pi tribu, memine la ixele ma iwai. (Efeso 4:31, 32) Ketre, ame la itre Temoë Iehova, ke tha ka kuci politik kö, nge tha ajane kö angatr troa lö hnine la nöjei pengöne isi.—Ioane 18:36.
Ketre, itre Temoë Iehova a öhnyi ixatua thene la itre sine hmi angatr e cailo fen, nge hna acasi angatr hnene la ihnim. (Ioane 13:35) Ame Oleksandra, lo hne së hna qaja e caha, hnei angeic me trejin me angeic hna kötre mel qa ngöne la nöjei nyidro pine la isi. Öni angeic: “Ame la nyio a traqa ngöne la ketre nöj, hnei nyio hna öhne la itre Temoë ka traqa troa kepe nyio. Hnene la ixatua i angatr, matre hnei nyio hna atreine melëne la mele ka hnyipixe e cili.”
Eahuni a hë epun kowe la itre icasikeu i eahun, nge tro epuni a öhne e cili la maca qa hnine la Tusi Hmitrötr, memine la aqane troa trongën ej. Tro jë kowe la sit jw.org matre troa öhne la hnë icasikeu ka easenyi koi epun, maine sipone jë troa ini Tusi Hmitrötr memine la ketre Temoë Iehova jëne la itus Gojenyi Kowe La Nyipi Mel!