Iahnikeu i Iakobo Kowe La Itre Nekö i Nyidrë Trahmany​—Götrane 1

1-2. Nemene la hnei Iakobo hna kuca qëmeken tro nyidrëti a mec, nge pine nemen? (Wange ju fe la ngöne icetrön.)

TRAQA koi 17 lao macatre hnei Iakobo ketre hlue i Iehova, hna fek qa Kanana a tro Aigupito memine la fami nyidrë. (Gen. 47:28) Ame ngöne la itre macatre cili, madrine catre nyidrë troa iöhnyi hmaca memine la nekö i nyidrë, Iosefa, nge casi hmaca angatr. Ngo easenyi hë tro nyidrëti a mec. Matre hnei nyidrëti hna hëne la itre nekö i nyidrëti trahmany, ke hetre nyine tro nyidrëti a qaja koi angatr ka nyipiewekë.​—Gen. 49:28.

² Hna majemin ekö, tro la he ne fami a icasinekeune la fami nyidrë, qëmekene troa mec, matre ahnith koi angatr la itre mekuna i nyidrë. (Isa. 38:1) Nge nyidrëti fe a qaja koi angatr la ka troa nyihna i nyidrë.

3. Thenge la Genese 49:​1, 2, pine nemene matre ka ketrepengöne kö la itre trengewekë hnei Iakobo hna qaja qëmekene tro nyidrëti a mec?

³ E jë la Genese 49:​1, 2. Ngo ka ketrepengöne kö la icasikeu cili, ke ketre perofeta Iakobo. Jëne la ixatua i Iehova, hnei Iakobo hna qaja kowe la itre nekö i nyidrëti trahmany, la itre ewekë ka tru ka troa traqa elany koi angatr me fami angatr. Celë hi matre, ame la hnei Iakobo hna qaja qëmekene tro nyidrëti a mec, ke ketre hna perofetan.

4. Nemene la nyine tro sa lapa mekun, la easa wange la hna perofetan hnei Iakobo qëmekene tro nyidrëti a mec? (Wange ju fe la hna eköhagen “Fami Iakobo.”)

⁴ Ame ngöne la tane mekune celë, tro sa ce wange la hnei Iakobo hna qaja kowe la foa lao nekö i nyidrë, ene Reubena, Simeona, Levi, me Iudra. Nge ame ngöne la tane mekun thupen, tro sa ce wange la itre hnei nyidrëti hna qaja kowe la itre xaa nekö i nyidrëti trahmany. Tro së lai a öhne laka, ame la itre hna perofetan hnei Iakobo, ke tha thatraqane hmekuje kö la itre nekö i nyidrë, ngo kowe fe la itre matra i angatr, ka troa nyiatrene la nöje Isaraela. Tro sa ce wange la itre ewekë ka traqa kowe la nöje cili, ka amamane laka, hna eatr la hna perofetan hnei Iakobo. Nge tro la itre ini cili a xatua së troa amadrinë Iehova, Keme së e koho hnengödrai.

REUBENA

5. Nemene la itre ewekë hnei Reubena hna mekun troa kapa qaathene la keme i angeic?

⁵ Hnei Iakobo hna pane ithanata koi Reubena. Öni nyidrë: “Eö la pane neköng.” (Gen. 49:3) Reubena a mekune ka hape, tro angeic a kapa la lue edrö qa ngöne la itre ewekë i kem, ke angeic la pane nekö i Iakobo. Angeice fe a mekune ka hape, tro angeic a hane xome la hnëqa ne he ne fami, me itre matra i angeic e thupen.

6. Hnauëne laka tha kapa ju kö Reubena la edrö ne ka tru? (Genese 49:​3, 4)

⁶ Ngo tha hnei Reubena kö hna kapa la edrö ne ka tru. (1 Aq. Jo. 5:1) Pine nemen? Pine laka ame lo itre macatre qëmeken, hnei angeic hna ce meköl me Bila, ketre föi Iakobo. Eahlo la hlue i Rakela, föe hna hnime catrëne hnei Iakobo. (Gen. 35:​19, 22) Nge ame Reubena, ke nekö i Lea, lo ketre föi Iakobo. Hapeu, hnei angeic kö hna kei kowe la aja ka ngazo? Maine pena, hnei angeic hna angazo Bila, matre tha tro kö Iakobo a hnim catrë eahlo hune la thine i angeic. Ame pe, tha madrine kö Iehova me Iakobo kowe la hnei angeic hna kuca.​—E jë la Genese 49:​3, 4.

7. Tune kaa la aqane eatre la itre trengewekë i Iakobo koi Reubena? (Wange ju fe la hna eköhagen “Itre Hna Perofetan Hnei Iakobo Qëmeken Tro Nyidrëti a Mec.”)

⁷ Öni Iakobo koi Reubena: “Tha tro kö eö a draië hune la itre trejin me eö.” Hna eatr la itre trengewekë celë. Pëkö matra i Reubena ka joxu, me atre huuj maine perofeta. Ngo tha hnei Iakobo kö hna nuetrij la nekö i nyidrë. Hnene la itre matra i Reubena hna nyi atrene la ketre tribu ne Isaraela. (Ios. 12:6) Eje hi, hnei Reubena hna huliwane la itre thiina ka loi ngöne la itre xaa götran. Nge tha hnei angeic hmaca kö hna kuca la ketre huliwa la sis.​—Gen. 37:​20-​22; 42:37.

8. Nemene la itre ini hne së hna xom qa ngöne la ka traqa koi Reubena?

⁸ Ini koi së. Nyipiewekë tro sa isi memine la itre aja së ka ngazo, me atreine xomehnöth, me nuetrij la itre aqane ujë ka sis. Maine kola tupathi së troa kuca la ngazo, pane mekune jë laka, tro la itre huliwa së a akötrë Iehova, me fami së me itre xane ju kö. Nge the thëthëhmine kö laka, “ame asë hi la hna tran hnei atr, celë hi hnei angeic hna troa menuën.” (Gal. 6:7) Kola amaman hnene la ka traqa koi Reubena laka, ka utipine Iehova. Ngacama tro kö së a xeni pun la itre huliwa së, ngo Iehova a amanathithine la itre trengecatr hne së hna nu, matre kuca la loi.

SIMEONA ME LEVI

9. Hnauëne laka tha madrine kö Iakobo koi Simeona me Levi? (Genese 49:​5-7)

⁹ E jë la Genese 49:​5-7. E thupen, hnei Iakobo hna ithanata koi Simeona me Levi. Hnei nyidrëti hna pane qaja ka hape, tha madrine kö nyidrëti koi nyidro. Itre macatre qëmeken, hna angazo Dina xa i nyidro, hnene la ketre atre Kanana, Sekema la ëje i angeic. Hnene la itre nekö i Iakobo hna wesitr, pine la ewekë ka traqa kowe la xa i angatr. Ngo ame kö Simeona me Levi, ke hnei nyidroti hna ihumuth. Hnei nyidroti hna qaja kowe la itre trahmany ne Sekema ka hape, loi e tro angatr a xötrehatren, matre tro nyidroti a iloi me angatr. Ngo nyidroti pe a thoi. Hnene la itre trahmany ne Sekema hna kapa troa xötrehatren. Ngo, kolo pala kö a akötr la itre trahmany, ame hnei Simeona me Levi “hna isa xomi taua, me tro juetrë ngöne la traon, me humuthi angatr asë.”​—Gen. 34:​25-​29.

10. Hna eatre tune kaa la hnei Iakobo hna qaja koi Simeona me Levi? (Wange ju fe la hna eköhagen “Itre Hna Perofetan Hnei Iakobo Qëmeken Tro Nyidrëti a Mec.”)

¹⁰ Tha madrine kö Iakobo kowe la aqane ujë i Simeona me Levi. Hnei nyidrëti hna qaja ka hape, troa isaijen la itre matra i nyidro ngöne la lapa e Isaraela. Hna eatre la itre trengewekë cili 200 lao macatre thupen, lo angetre Isaraela a lö ngöne la Nöj Hna Thingehnaean. Hnene la tribu i Simeona hna kapa la itre götran ngöne la teritoare i Iudra. (Ios. 19:1) Nge ame la tribu i Levi, 48 lao traon hna lapan ngöne la teritoare Isaraela.​—Ios. 21:41.

11. Nemene la ewekë ka lolo hna kuca hnene la itre matra i Simeona me Levi?

¹¹ Tha hnene kö la itre matra i Simeona me Levi hna ujë tune la itre xötrapane i angatr. Hnene la tribu i Levi hna catre xatuane la hmi ka wië. Ame lo Mose a kapa la Wathebo i Iehova ngöne la Wetr e Sinai, alanyim la angetre Isaraela ka thil kowe la kau gol. Ngo hnene la angetre Levi hna ce xöl me Mose, me xatua nyidrë troa lep apatren la hmi ka thoi, qaa ngöne la nöj. (Eso. 32:​26-​29) Hnei Iehova hna hamëne kowe la tribu i Levi la ketre hnëqa ka tru, ene la troa atre huuj. (Eso. 40:​12-​15; Num. 3:​11, 12) E thupen, ame la angetre Isaraela a lö kowe la Nöj Hna Thingehnaean, hnene la itre nekö i Levi hna ce tro memine la itre atrene la tribu ne Iudra, matre isi memine la angetre Kanana, thenge lo aja i Iehova.​—Ang. A. 1:​3, 17.

12. Nemene la itre ini hne së hna xom qaathei Simeona me Levi?

¹² Ini koi së. The kuca kö la ketre ewekë me xomi mekun la easë a elëhni. Tro së lai a akötr la kola ujë angazonyi koi së, maine kowe la ketre sinee së. (Sal. 4:4) Ngo the thëthëhmine kö laka, tha tro kö Iehova a madrin, e tro sa qaja maine kuca la ketre ewekë ka ngazo, kowe la atr ka akötrë së. (Iako. 1:​20) Ka nyihlue i Iehova ju hë maine atrene fen la atr ka akötrë eö, ngo nyipiewekë tro pala hi a trongëne la itre trepene meköt. Tro lai a xatua eö, matre tha tro kö a qaja maine kuca la ketre ewekë ka troa akötrë itre xan. (Roma 12:​17, 19; 1 Pet. 3:9) Ketre, maine ka ngazo la aqane ujë ne la kem me thine i eö, ngo ijiji eö hi troa amadrinë Iehova. Nge the mekune kö laka, ka luzi hë eö, nge tha tro kö Iehova a hane kepe eö. The luelue kö laka, tro kö Nyidrëti a amanathithine la itre trengecatr hnei eö hna nu, matre troa kuca la loi.

IUDRA

13. Hnauëne la Iudra a seseu la Iakobo a nyiqane ithanata koi angeic?

¹³ E thupen, hnei Iakobo hna ithanata koi Iudra. Thupene la hnei angeic hna dreng la iahnikeu i keme i angeic kowe la itre mama i angeic, ma Iudra jë a seseu. Eje hi hnei angeice fe hna hane kuca la itre ewekë ka ngazo. Hnei angeice fe hna thapa la itre mo ngöne la traon e Sekema. (Gen. 34:27) Ce angeice fe hi lo, lo kola salemë Iosefa troa nyi hlu, me thoi kowe la keme i angatr laka, meci hë angeic. (Gen. 37:​31-​33) Nge e thupen, hnei angeic hna ce meköl memine la föe ne la nekö i angeic, ene Tamara, ke kola mekune ka hape, ketre föe ne gojeny.​—Gen. 38:​15-​18.

14. Nemene la itre ewekë ka loi hna kuca hnei Iudra? (Genese 49:​8, 9)

¹⁴ Ngo jëne la uati hmitrötr i Akötresie, hnei Iakobo hna qaja atrunyi Iudra, me perofetan la itre ewekë ka loi thatraqai angeic. (E jë la Genese 49:​8, 9.) Tru catr la hnei Iudra hna mekune la keme i angeic ka qatre hë. Nge hnei angeice fe hna utipin la neköi jini angeic, ene Beniamina.​—Gen. 44:​18, 30-​34.

15. Qaja jë la itre xaa aqane eatr la hna perofetan hnei Iakobo koi Iudra?

¹⁵ Hnei Iakobo hna perofetan laka, tro Iudra a mus kowe la itre trejin me angeic. Ngo tha canga eatre ju kö la hna perofetane celë. Thupen la 200 lao macatre, hna nyiqane eatre la hna perofetan göne la tribu ne Iudra. Ame lo angetre Isaraela a tro qa Aigupito, ke tribu ne Iudra lo, la ka elemeken la tronge i angatr, ngöne la hnapapa uti hë la angatr a traqa kowe la Nöj Hna Thingehnaean. (Num. 10:14) Itre macatre thupen, hnei Iehova hna upe la tribu i Iudra troa tro pa troa isi memine la angetre Kanana, matre thapa la Nöj Hna Thingehnaean. (Ang. A. 1:​1, 2) Nge e thupen, ame la ka joxu e Isaraela, ke Dravita, ketre matra i Iudra. Ngo tha eje hmekuje kö lai.

16. Hna eatre tune kaa la hna perofetan ngöne Genese 49:10? (Wange ju fe la hna eköhagen “Itre Hna Perofetan Hnei Iakobo Qëmeken Tro Nyidrëti a Mec.”)

¹⁶ Hnei Iakobo fe hna qaja ka hape, ame la ka troa musinëne la itre atr uti hë epine palua, ke ketre matra i Iudra. (E jë la Genese 49:10 me ithuemacany.) Ame la atre cili ka troa mus, hnei Iakobo hna hëne ka hape, Silo, ene Iesu Keriso. Önine la ketre angela koi Iesu ka hape: “Tro Iehova Akötresie a hamë nyëne la therone i Dravita, keme i nyën.” (Luka 1:​32, 33) Hna hë Iesu fe ka hape “Liona ne la lapa i Iudra.”​—Hna Am. 5:5.

17. Tune kaa la aqane tro sa goeë itre xan tui Iehova?

¹⁷ Ini koi së. Ngacama hnei Iudra hna kuca la itre ewekë ka ngazo, ngo hnei Iehova hna amanathithi angeic. Maine jë, itre trejin me Iudra a isa hnyinge ka hape, ‘Nemene jë la ewekë ka loi hnei Iehova hna öhne thei angeic?’ Eje hi, hetre ewekë ka loi hnei Iehova hna öhne thei angeic, matre hnei Nyidrëti hna amanathithi angeic. Tro sa nyitipu Iehova tune kaa? Ame la kola hamëne la ketre hnëqa ka tru kowe la ketre trejin me easë, ke canga tro hi sa goeëne la itre tria i angeic. Ngo the thëthëhmine kö së laka, Iehova a thele la ka loi thene la itre hlue i Nyidrë. Nge hetre thiina ka lolo hnei Nyidrëti hna öhn thei angeic. Matre catre jë së nyitipu Nyidrë.

18. Pine nemen matre loi e tro së a atreine itreqe?

¹⁸ Nemene la ketre ini hne së hna xome qaathei Iudra? Loi e tro sa atreine itreqe. Iehova pala hi a eatrëne la itre hnei Nyidrëti hna qaja, ngo tha thenge kö la aja së, me ijin hne së hna mekun. Ame ngöne la itre macatre ka nyimutre, ke tha itre matra i Iudra kö la ka elemeken la nöje i Akötresie. Ngo hnei angatr pala hi hna ce xöl memine la atr hnei Iehova hna iën, tui Mose atre Levi, me Iosua atre Eferaima, maine Saulo joxu atre Beniamina. Ketre tu së fe, catre jë së ce huliwa memine la itre atr hnei Iehova hna acil enehila.​—Heb. 6:​12.

19. Nemene la itre ini hne së hna xom qa ngöne la hna perofetan hnei Iakobo qëmeken tro nyidrëti a mec?

¹⁹ Nemene la itre ini hne së hna xom qa ngöne la hna perofetan hnei Iakobo qëmeken tro nyidrëti a mec? “Tha ceitu kö la aqane waiewekë i atr me Akötresie.” (1 Sam. 16:7) Iehova la Akötresie ka atreine itreqe me utipin. Tha Nyidrëti kö a kapa la itre huliwa ka ngazo. Ketre, tha Nyidrëti kö a treqene tro sa pexej. Nyidrëti fe a amanathithine la itre atr ka kuca la itre huliwa ka ngazo ekö, ngo ka ietra me saze la aqane ujë. Ame ngöne la tane mekun e thupen, tro sa ce wange la hnei Iakobo hna qaja kowe la itre xaa nekö i nyidrëti trahmany.