TANE MEKUN 25
NYIMA 96 Mo Ka Tru Alamekene—La Wesi Ula i Akötresie
Iahnikeu i Iakobo Kowe La Itre Nekö i Nyidrë Trahmany—Götrane 2
“Hnei nyidrëti hna isa amanathithi angatr thenge la ka ihmeku me angatr.”—GEN. 49:28.
MEKUN KA TRU
Tro sa xomi ini qa ngöne la iahnikeu i Iakobo kowe la itre xaa nekö i nyidrëti trahmany.
1. Nemene la hne së hna troa ce wang ngöne la tane mekun celë?
ITRE nekö i Iakobo trahmany a lapa xötreithi nyidrë, me drenge hnyawane la hnei nyidrëti hna troa qaja koi angatr isa ala cas. Tune lo hne së hna ce wang ngöne la tane mekun hnapan, hna asesëkötrëne la itre nekö i Iakobo hnene la hnei nyidrëti hna perofetan göi Reubena, Simeona, Levi, me Iudra. Matre itre xan a isa hnying ka hape, ‘Nemene fe la hnei nyidrëti hna troa qaja koi eahun?’ Tro sa xomi ini qa ngöne la iahnikeu i Iakobo koi Zebulona, Isakara, Dana, Gada, Asera, Nafatali, Iosefa, me Beniamina.a
ZEBULONA
2. Nemene la manathith hnei Iakobo hna hamën koi Zebulona, nge hna eatr tune kaa? (Genese 49:13) (Wange ju fe la hna eköhagen.)
2 E jë la Genese 49:13. Hnei Iakobo hna qaja amë ka hape, tro la itre matra i Zebulona, a lapa ngöne gejë trootro, ngöne la götrane kolopi ne la Nöj Hna Thingehnaean. Thupen la 200 lao macatre, hnene la itre matra i Zebulona hna kapa la götrane i angatr. Tha angatre kö ezin la hnagejë, ngo angatre pe nyipine la hnagejë e Galilaia me Méditerranée. Hnei Mose hna perofetan ka hape: “Zebulona fe, madrine jë ngöne la itre tronge i ö.” (Dreut. 33:18) Pine laka, Zebulona nyipine la lue hnagejë, ijiji angatre hi troa itö me salem. Matre madrine catre la itre matra i Zebulona.
3. Nemene la ka troa xatua së troa melëne la hne së hna hetreny?
3 Ini koi së. Ngacama mele ju hë së ngöne la ketre götran, maine hetre mo së maine pëkö, ngo ijije hi tro sa madrin. Maine aja së troa madrin, nyipiewekë tro sa melëne la hne së hna hetreny. (Sal. 16:6; 24:5) Hapeu, easë kö a goeëne catrëne la ka pë the së, hune la itre ewekë ka mingöming ka traqa koi së? Haawe, isine jë troa goeëne catrën la itre ewekë ka loi ngöne la mele së.—Gal. 6:4.
ISAKARA
4. Nemene la manathith hnei Iakobo hna hamëne koi Isakara, nge hna eatre tune kaa? (Genese 49:14, 15) (Wange ju fe la hna eköhagen.)
4 E jë la Genese 49:14, 15. Hnei Iakobo hna qaja aloinyi Isakara, ke ka catre huliwa angeic, tune la boliko ka catre ijun me ka thue ehnef. Hnei nyidrëti hna qaja ka hape, tro Isakara a kapa la ketre nöj ka lolo. Thenge la itre trengewekë cili, hnene la itre matra i Isakara hna kapa la ketre teritoar gaa hmelek ezine la Hneopegejë Ioridrano. (Ios. 19:22) Hnei angatr hna nue trengecatr matre eëny ngöne la itre götrane i angatr, me huliwa catre koi itre xan. (1 It. Jo. 4:7, 17) Ka hnëkë fe angatr troa isigöline la nöj. Tha cile kö angatr troa isi ngöne la ijine i Baraka atre amekötin me Debora perofeta föe.—Ang. A. 5:15
5. Hnauëne la tro sa isine troa catre huliwa?
5 Ini koi së. Hnei Iehova hna wangatrune la itre huliwa hna kuca hnene la tribu i Isakara. Ketre tun, Nyidrëti a wangatrune la huliwa hne së hna kuca koi Nyidrë. (A. Cai. 2:24) Pane mekune jë la itre trejin trahmany ka huliwa catr matre thupëne la ekalesia. (1 Tim. 3:1) Tha ka isi kö angatr, ngo angatre pe a nue trengecatr, matre thupëne la itre trejin qa ngöne la itre ewekë ka troa thë la imelekeu i angatr me Iehova. (1 Kor. 5:1, 5; Iudra 17-23) Angatre fe a nue trengecatr, matre hnëkën me cile fë la itre cainöj ka troa acatrene la ekalesia.—1 Tim. 5:17.
DANA
6. Nemene la hnëqa hna ahnith kowe la tribu i Dana? (Genese 49:17, 18) (Wange ju fe la hna eköhagen.)
6 E jë la Genese 49:17, 18. Hnei Iakobo hna aceitunë Dana me ketre un ka hej la itre ithupëjia ka catre kö hui angeic, tune la hoos ne isi memine la ka tithi ej. Ka catre la tribu i Dana, nge tha ka xoue kö angeic troa isi memine la itre ithupëjia ne la nöj Isaraela. Ame lo angetre Isaraela a tro kowe la Nöj Hna Thingehnaean, hnene la tribu i Dana hna thupëne la nöj, ke angatr “la ka thingi tro.” (Num. 10:25) Ngacama tha öhne kö hnene la nöj la hna kuca hnene la tribu i Dana, ngo ka nyipiewekë la hnëqa i angatr.
7. Nemene la nyine tro sa mekune hnyawan la easa huliwa i Iehova?
7 Ini koi së. Hapeu, hetre ka öhne kö la hnei eö hna kuca? Maine jë hnei eö hna nyidrawan maine nyihnyawan la Uma Ne Baselaia, maine saene troa huliwa ngöne la ijine asabele ne sirkoskripsio maine asabele katru, maine xatua itre xane pena. Ka lolo catr la hnei eö hna kuca! The thëthëhmine kö laka, öhne hi Iehova la hnei eö hna kuca, nge ka tru lai koi Nyidrë. Tha aja i Iehova kö tro eö a kuca la itre huliwa matre troa pi mama. Ngo loi e tro pe a amaman la ihnimi eö koi Nyidrë.—Mat. 6:1-4.
GADA
8. Pine nemene matre kola lepe la itre nekö i Gada hnene la itre atrekënö? (Genese 49:19) (Wange ju fe la hna eköhagen.)
8 E jë la Genese 49:19. Hnei Iakobo hna qaja ka hape, troa lepi Gada hnene la itre atrekënö. Thupene la 200 lao macatre, hnene la tribu i Gada hna xome la teritoar ngöne la götrane koië ne la Hneopegejë Ioridrano, ifego memine la itre nöj ka icilekeu me Iehova. Celë hi matre tha ka jole kö kowe la itre nöje cili troa lepi angatr. Ngo, pi tro kö la itre nekö i Gada a lapane la götrane cili, ke ka cia hnyawa la itre feja kowe la itre öni angatr. (Num. 32:1, 5) Itre ka catrecatre angatr. Ketre, xecie koi angatr laka, tro kö Iehova a xatua angatr troa isi memine la itre ka atrekënö. Ame ngöne la itre macatre, hnene la itre trahmanyi ne Gada hna xatuane la itre xaa tribu, matre thapa la itre teritoar ngöne la götrane kuë ne la Hneopegejë Ioridrano. (Num. 32:16-19) Xecie koi angatr laka, tro kö Iehova a thupëne la itre föi angatr, me itre nekö i angatr, ngacama patre kö la itre trahmany. Hnei Iehova hna amanathithin la trengecatre i angatr, me aqane nue mel.—Ios. 22:1-4.
9. Nemene la aqane tro sa amamane ka hape, ka mejiune së koi Iehova?
9 Ini koi së. Nyipiewekë tro pala hi së a mejiune koi Iehova, matre catre nyihlue i Nyidrë ngacama kola traqa la itre jol. (Sal. 37:3) Alanyimu enehila la ka amamane la mejiune i angatr koi Iehova, la angatr a nue trengecatr troa xup la itre Uma Ne Baselaia, me cainöj ngöne la itre götrane ka aja ixatua, maine kuca la itre xaa huliwa thatraqane la organizasio. Xecie koi angatr laka, tro palahi Iehova a thupë angatr.—Sal. 23:1.
ASERA
10. Nemene la ewekë hna tha kuca hnene la tribu i Asera? (Genese 49:20) (Wange ju fe la hna eköhagen.)
10 E jë la Genese 49:20. Hnei Iakobo hna perofetane ka hape, troa mana la xen thene la tribu i Asera, nge celë hi ka traqa. Pëkö ketre götran ngöne la Nöje Hna Thingehnaean ka cia hlöeë tune la teritoare i Asera. (Dreut. 33:24) Ketre, angatr a lapa ezine hnagejë trootro, nge ngöne la götrane i Asera, hetrenyi la hna xepe hnei he, nge hnë salem ngöne la traon ne Foinike e Sidona. Ngo tha hnene kö la tribu i Asera hna helëne la angetre Kanana qa ngöne la teritoar i angatr. (Ang. A. 1:31, 32) Maine jë, hnene la itre mo i angatr me iajojezi i angetre Kanana, matre tha catre hë angatr ngöne la hmi i Iehova. Ame lo Baraka atre amekötin, a sipone kowe la angetre Isaraela, troa ce tro me nyidrë troa isi memine la trongene isi angetre Kanana, tha hnene kö la tribu i Asera hna xatua nyidrë. Triane ju kö angatr la manathithi qaathei Iehova, ke tha xatuane kö angatr la angetre Isaraela “ezine la itre tim ne Megido.” (Ang. A. 5:19-21) Hmahma catre angatr, la angatr a drenge la nyima i Baraka me Debora, kola hape: “Hnei Asera hna lapa menu ezine la hnagejë.”—Ang. A. 5:17.
11. Pine nemen matre nyipiewekë tro sa atreine waiewekë göne la itre mo?
11 Ini koi së. Aja i easë troa nu mel kowe la huliwa i Iehova. Matre nyipiewekë tro sa nuetrij la aqane goeëne la fen la itre mo me aqane mel. (It. Ed. 18:11) Isine jë së troa atreine waiewekë göi mani. (A. Cai. 7:12; Heb. 13:5) The aluzine pi kö la traeme së, troa thele la itre mo ka tha nyipiewekë kö, ke tro itre eje lai a akucakucanyi së ngöne la huliwa i Akötresie. Loi e tro pe së a xomi ijine me nue trengecatr troa huliwa koi Iehova. Eje hi, ame elany, tro së lai mele tingeting me mele ka loi.—Sal. 4:8.
NAFATALI
12. Hna eatr tune kaa la hnei Iakobo hna qaja koi Nafatali? (Genese 49:21) (Wange ju fe la hna eköhagen.)
12 E jë la Genese 49:21. Hnei Iakobo hna qaja ka hape, troa “mingöminge la aqane ithanata” i Nafatali. Hna eatre hnyawa lai lo ijine Iesu a cainöj e celë fen. Hna atre Iesu hnene la aqane hamë ini nyidrë. Nge hnei nyidrëti hna lapa aqeany ngöne la traon e Kaperenauma, ka ej ngöne la teritoare i Nafatali. Matre hna hëne la traone cili ka hape, “zi nyidrë.” (Mat. 4:13; 9:1; Ioa. 7:46) Ketre, hnei Isaia hna perofetan ka hape, tro Iesu a “lai atraqatr” kowe la tribu i Zebulona me Nafatali. (Isa. 9:1, 2) Hnene la itre ini Iesu matre nyidrëti “la nyipi lai, atre thinane la nöjei pengöne atr asë.”—Ioa. 1:9.
13. Nemene la nyine tro sa kuca matre tro la aqane ithanata së a amadrinë Iehova?
13 Ini koi së. Ka tru koi Iehova la hne së hna qaja me aqane qaja. Tune kaa la aqane troa “mingöminge la aqane ithanata” së matre amadrinë Iehova? Troa qaja la nyipici. (Sal 15:1, 2) Nge nyipiewekë fe tro sa ithuecatr kowe la itre xan. Troa tune kaa? Loi e tro sa felisite angatr, ngo tha tro kö sa iqejegele, maine eetre lapa. (Efe. 4:29) Ketre, loi e tro fe sa thele troa atreine porotrik, matre cainöj hnyawa.
IOSEFA
14. Hna eatre tune kaa la hnei Iakobo hna qaja koi Iosefa? (Genese 49:22, 26) (Wange ju fe la hna eköhagen.)
14 E jë la Genese 49:22, 26. Madrine catre Iakobo koi Iosefa, lo “atre hna thapa qaathene la itre trejin me angeic,” nge hna huliwa angeic hnei Iehova. Hnei Iakobo hna qeje Iosefa ka hape, “picine sinöe ka wa.” Iakobo la sinöe, nge Iosefa la picin. Angeic la pane nekö i Rakela, föi Iakobo hna hnime catrën. Hnei Iakobo hna qaja ka hape, tro angeic a kapa la lue edrö i Reubena, lo pane nekö i Lea. (Gen. 48:5, 6; 1 Aq. Jo. 5:1, 2) Hna eatr la hna perofetane cili lo Eferaima me Manase, lue nekö i Iosefa a isa hetre teritoar.—Gen. 49:25; Ios. 14:4.
15. Tune kaa la aqane ujë i Iosefa qëmekene la itre itupath?
15 Hnei Iakobo fe hna qaja la itre ka huji pehna, ka “pehna [Iosefa,] me methinë angeic.” (Gen. 49:23) Kolo lai a qaja la itre trejin me angeic ka zalu, nge zöi angatr la itre akötre i angeic. Tha hnei Iosefa kö hna lapa fë trengehni koi angatr, me koi Iehova. Ngo öni Iakobo: “Hnei angeice kö hna ea catrëne la tane pehna i angeic, nge ka catre pala hi me maca la lue ime i angeic.” (Gen. 49:24) Ngöne la itupath, hnei Iosefa hna mejiune koi Iehova. Hnei angeic hna nue la ngazo ne la itre trejin me angeic, me hnimi angatr. (Gen. 47:11, 12) Hnei angeic hna nue la itupath troa ini angeic. (Sal. 105:17-19) Celë hi matre, hnei Iehova hna ië angeic troa kuca la itre huliwa ka tru.
16. Tune kaa la aqane tro sa nyitipu Iosefa la easa cil kowe la itre itupath?
16 Ini koi së. The nue pi kö la itre itupath troa ananyi së qaathei Iehova me itre trejin. The thëthëhmine kö së laka, Iehova a nue së troa cile kowe la itre jol, matre ini së. (Heb. 12:7, ith.) Tro la ini cili a xatua së troa huliwane la itre thiina ka mingöming, tune la troa nue la ngazo i ketre. (Heb. 12:11) Tro kö Iehova a amanathithine la aqane catre së, tune la aqane kuca i nyidrë koi Iosefa.
BENIAMINA
17. Hna eatre tune kaa la hnei Iakobo hna qaja koi Beniamina? (Genese 49:27) (Wange ju fe la hna eköhagen.)
17 E jë la Genese 49:27. Hnei Iakobo hna qaja ka hape, tro la itre matra i Beniamina a catre isi, tune la itre luko. (Ang. A. 20:15, 16; 1 Aq. Jo. 12:2) Öni Iakobo mina fe: “E hmakany, tro angeic a öni la tha i angeic.” Eje hi lai ka traqa lo kola acile la pane joxu e Isaraela, ene Saulo ka fetra qa ngöne la tribu i Beniamina. Hnei Saulo hna catre isi me angetre Filisiti. (1 Sam. 9:15-17, 21) Öni Iakobo hmaca: “E hej, tro angeic a thawa la tha i angeic.” Hna eatr lo Isola Esetera me Modikai, lue ka fetra qaathene la tribu i Beniamina, a amelene la angetre Isaraela qa ngöne la ihumuth atraqatr.—Eset. 2:5-7; 8:3; 10:3.
18. Tro sa nyitipune tune kaa la angetre Beniamina?
18 Ini koi së. Madrine catr la itre nekö i Beniamina la kola acile la ketre nekö i angatr troa joxu. Ngo hnei angatr hna cilëgöli Dravita, lo joxu hna iën hnei Iehova, ka xulu qa ngöne la tribu i Iudra. (2 Sam. 3:17-19) Nge itre macatre thupen, lo kola icilekeu hnene la itre xaa tribu ne Isaraela, hnei angatr hna mele nyipici kowe la joxu ne Iudra, lo hnei Iehova hna iën. (1 It. Jo. 11:31, 32; 12:19, 21) Ketre tu së fe, catre jë së nyipici kowe la itre atr hnei Iehova hna acil enehila troa iujine la nöje i Nyidrë.—1 Thes. 5:12.
19. Nemene la nyine tro sa kuca matre kepe thangane qa ngöne la hna perofetan hnei Iakobo?
19 Hetre ini nyine tro sa xom qa ngöne la itre hna perofetan hnei Iakobo, qëmeken tro nyidrëti a mec. Maine tro sa lapa mekune la aqane eatr itre ej, tro lai a acatrene la mejiune së kowe la itre xaa hna perofetan hnei Tusi Hmitrötr. Nge e tro sa lapa mekune la itre manathith hna kapa hnene la itre nekö i Iakobo, ke tro lai a xatua së troa atre la aqane troa amadrinë Iehova.
NYIMA 128 Cile Huti Ju Uti Hë La Pun
a Hnei Iakobo hna amanathithine la foa lao pane nekö i nyidrëti trahmany ene, Reubena, Simeona, Levi, me Iudra, qane lo ka tru uti hë la ka co. Ngo tha celë kö la hnei nyidrëti hna kuca kowe la itre xaa nekö i nyidrëti trahmany.