Nunu o Pokiwawansayan do Kinorohingan Montok Pomogunan Diti?

1. Nokuro tu’ winorun do Kinorohingan iti pomogunan?

Pinatahak di Yohuwah o pomogunan kumaa tongoulun. Iti no o tiyonon toko’. Iri no dot a’ pinoiyon di Yohuwah i Adam om i Hawa hilo’d surga, tu’ noworun no Dau o moloikat do miyon hilo. (Ayub 38:​4, 7) Pinoiyon di Yohuwah i tulun di koiso’ id Kabun dot Idon. (Kinawansayan 2:​15-17) Noonuan di Yohuwah i Adam om sinakagon dau kaharapan do masi poingompus id pomogunan.​—Basao’ Sinding 37:29; 115:16.

Okooro o Kabun dot Idon di timpuun i’. Manu i Yohuwah di Adam om Hawa do sumakag om monongkop diti pomogunan. Poinggoyoon daa’ndo diyolo o kabun diri gisom dot otongkop iti pomogunan. (Kinawansayan 1:28) Poinggirot kasari o pomogunan do tiyonon toko’ gisom do poingompus.​—Basao’ Sinding 104:5.

Intangai video diti Nokuro tu Winonsoi do Kinorohingan iti Pomogunan?

2. Nokuro tu’ a’ miagal do Kabun dot Idon o pomogunan do baino?

A’ minumboyo’ i Adam om i Hawa di Yohuwah, om uyungo diri Dau iyolo mantad hiri’d kabun. Katagak dii o Kabun dot Idon, om aiso’ o tulun milo’d popotonduli kawagu’ddi. Boros ka do Baibol, pinatahak dot id tulun dit angaraat iti “pomogunan.”​—Ayub 9:24.​—Basao’ Kinawansayan 3:​23, 24.

Notingkadan nangku di Yohuwah i pokiwawansayan Dau montok tongoulun? Amu, tu’ Iyau nopo nga’ osundu! (Yosaya 45:18) Potondulion kawagu Dau o tongoulun om kabun dit olumis miagal di pokiwawansayan Dau mantad.​—Basao’ Sinding 37:​11, 34.

3. Poingkuro kotonduli kawagu i kabun dot olumis?

Potondulion kawagu o kabun dit olumis hiti’d pomogunan maso do momorinta i Yesus sabaagi raja’ do Pomorintaan do Kinorohingan. Id iso’ o pisangadan di roitan do Harmagidon, woyoon nondo di Yesus i tongomoloikat do momupus koinsanai di sumaap di Yohuwah. Kurungan nondo di Yesus i Rogon solinaid 1,000 toun. Nga’ angapasi i’ o tulun di songonuon di Yohuwah tu’ woyoon om intirungan iyolo di Yesus. Kaanu nondo iyolo koposion di poingompus hiti’d pomogunan.​—Basao’ Pinointalang 20:​1-3; 21:​3, 4.

4. Soira’ opupusan o koinggoritan?

Soira’ do pupusan di Yohuwah o koinsanai’d kaaraton hiti’d pomogunan? Minomisunud i Yesus do “tanda’’’ soira do muhai-ruhai o kopupuson diti pomogunan. Katangaban hiti’d pomogunan baino popokito do poimpasi toko’ no id “kopupuson diti pomogunan.”​—Basao’ Matius 24:​3, 7-14, 21, 22.

Pupusan nondo di Yesus o koinsanai’d koinggoritan maso dau momorinta diti pomogunan mantad hilo’d surga solinaid 1,000 o toun. (Yosaya 9:​6, 7; 11:9) Suwai ko’ Raja’, sumiliu nogi i Yesus sabaagi Boyoon dot Agayo dot Imam do mananus dusa tulun dit osianan di Yohuwah. Maya’ di Yesus, tonuson nondo di Yohuwah o toruol, tinan di lumohing, om kapatayon.​—Basao’ Yosaya 25:8; 33:24.

5. Isai o masi id kabun dot olumis?

Tulun di tumanud do korohian di Yohuwah apasi nondo hiti’d pomogunan. (1 Yohanis 2:17) Monuhu i Yesus do tumatanud dau do mogihum tulun dit osiriba o ginawo om monuduk diyolo poingkuro do poposonong ginawo di Yohuwah. Baino, monuduk i Yohuwah do tulun ginumuan do manganu koposion di poingompus id kabun dot olumis hiti’d pomogunan. (Sipania 2:3) Id Walai Panambayangan do Sasi-Sasi’ Yohuwah, minsingilo o tongoulun poingkukuro do sumiliu sawo, tapa’, om tina’ di lobi’ osonong. Tangaanak om komolohingan miwoyo’ do tumuku’ om minsingilo poingkukuro do kaanu kasanangan mantad habar dot osonong.​—Basao’ Mika 4:​1-4.