Haro Nondo o Kotungagan!

1-3. Nunu o minomogiil dati koinsanai, om poingkuro i Yohuwah do papalabus dati?

SOROHO dot noukuman ko’d solinaid do poimpasi om pinogiil montok karaaton dit a nu winonsoi. Aiso no kosiwatan nu’d poiduon. Kokitanan aiso no kalansanan nu om aiso no milo nu’d wonsoiyon pasal dii. Nga soira natagakan ko daa koinsanai kalansanan, nokoilo ko’d haro sosongulun di kikuasa do papalabus om nakabatos yau’d monguhup diya! Poingkuro topurimanan nu?

² Koinsanai dati pinogiil id kapataiyon. Monotos toko piya nga aiso no ralan do mogidu. Nga, kikuasa i Yohuwah do papalabus dati mantad kapataiyon. Yau no Gampamasi dit obingupus. Om nakabatos Yau dot ‘iri nopo pisangod di kolimpupuson no kopio dot alaon nga kapataiyon.’​—1 Korintus 15:26.

³ Soroho pogi kasanangan dit opurimanan nu soira’d a ko no tagal do tumongob pasal do matai! Nga okon ko kapataiyon noo poiduon di Yohuwah. Posion kaagu Dau i tulun do nangapatai. Soroho pogi nunu rati dilo montok diya. Minamatos Yau dot apasi kaagu nondo i tulun dit “laid no kangapatai.” (Yosaya 26:19) Oo, tulun dit napatai kikosiwatan koimbagu do apasi hiti’d pomogunan. Iti no roitan do Baibol do kotungagan.

SOIRA’D APATAI I KOUPUSAN

4. (a) Nunu kapanahak dati koinsasamadan soira’d apatai o tobpinai toi tambalut toko? (b) Isai o piipiro tambalut tosomok di Yesus?

⁴ Soira’d apatai o tobpinai toi tambalut tosomok, awagat kopio korualan om katangaban toko. Kopuriman toko’d aiso ponguhupan. A toko no milo’d momonsoi do nunu nopo do mamasi do tulun dilo. Nga nonuan toko’d Baibol do koinsasamadan dit otopot. (Basao 2 Korintus 1:3, 4.) Kaino soroho toko iso suntu dit popokito poingkuro kosionuan di Yohuwah om i Yesus do mogowit kawagu koposion sosongulun dit koupusan toko. Soira’d hiti po i Yesus id tana, asaru yau’d monombului di Lasarus om taka dau, i Marta om i Maria, i poingiyon id Kuta Betania poinsomok do Yorusalim. Koinsanai diyolo tambalut tosonong di Yesus. Ka’d Baibol: “Osianan i kopio i Yesus di Marta, om i Maria, om i Lasarus.” Nga, insan tadau, napatai i Lasarus.​—Yohanis 11:3-5.

5, 6. (a) Nunu winonsoi di Yesus soira’d nokito dau sampaganakan di Lasarus om tambalut do tumongob? (b) Nokuro tu koinsasamod do koilo poingkuro topurimanan di Yesus pasal kapataiyon?

⁵ Minoi i Yesus ponginsasamod di Marta om i Maria. Soira’d norongou di Marta dot rumikot i Yesus, minoi yau id labus do kakadaian do rumuba dau. Osonong kopio ginawo dau’d nokoruba di Yesus, nga ka dau: “Ondung hiti ko daa do tontok diri, om atantu no dot a i daa napatai i tobpinai ku.” Nosorou’d Marta dot alaid kopio i Yesus. Katalib iri, nokito di Yesus i Maria taka dau do mihad. Oruol ginawo om minihad nogi yau soira kokito do kolungguian diyolo. (Yohanis 11:21, 33, 35) Opurimanan tomod dau o toruol soira’d atagakan toko sosongulun dit koupusan toko.

⁶ Koinsasamod kopio dati do nokoilo dot i Yesus nga kopuriman miagal dati pasal kapataiyon. Iti monuduk dati dot araatan kopio i Yesus om i Yohuwah kumaa kapataiyon. (Yohanis 14:9) Kikuasa i Yohuwah do mongidu do kapataiyon sogigisom om a no alaid do wonsoiyon Dau iti.

“LASARUS, SOLIWAN!”

7, 8. Nokuro tu a manu i Marta do popoidu di watu mantad lobong di Lasarus, nga nunu winonsoi di Yesus?

⁷ Soira nokorikot i Yesus id pinamalabangan di Lasarus, sinompon do watu do tagayo o wawayaan sumuang do lobong. Ka’d Yesus: “Iduwo ilo watu’d pinonompon.” Nga noduhan i di Marta iyolo. Apat no tadau rata di Lazarus do poinlobong. (Yohanis 11:39) A i Marta koilo nunu wonsoiyon di Yesus do monguhup do tadi dau.

⁸ Ka’d Yesus di Lasarus: “Soliwan!” Koimayaan kopio i nokito di Marta om i Maria. “Om soliwan no i tulun di napatai’ddi. Om iri nopo longon om gakod dau nga nongorilitan pod kain di pomorilit do rata.” (Yohanis 11:43, 44) Pinasi kawagu i Lasarus! Pinaamung kawagu yau miampai’d sampaganakan om tambalut dau. Koigit, kakama, om koboros iyolo dau. Iso koimayaan! Pinasi di Yesus i Lasarus.

“OI TANAK DO TONDU, MORO-BOROS OKU DIYA: TUNGAG!”

9, 10. (a) Isai minanahak di Yesus do kuasa popotungag do tulun? (b) Nokuro tu oponting kopio susuiyan kotungagan kumaa dati?

⁹ Monungag nangku i Yesus do tulun maya kuasa dau sondiri? Amu. Pogulu id pinotungag dau i Lasarus, suminambayang po yau kumaa di Yohuwah om nonuan di Yohuwah yau’d kuasa do popotungag di Lasarus. (Basao Yohanis 11:41, 42.) Okon ko songulun no i Lasarus o tinungag. Minomisunud o Baibol dati pasal songulun tanak tondu kiumur 12 toun dit adalaan do sumakit. Mokiinsian tomod i tapa dau, i Yairus di Yesus do momolingos do tanak tondu dau. Iyau no o iso-iso tanak dau. Daamot dau’d monongkiboros di Yesus, piipiro tulun ruminikot om minoboros: “Napatai no i tanak nu’d tondu, oi Tuan. Om kada no ponusa dilo Guru.” Nga ka’d Yesus kumaa di Yairus: “Kada kooris, nga kotumbayaai nopo tu olingasan i i tanak nu.” Om pamanau no iyolo kumaa hilo’d walai di Yairus. Soira’d nokoinsomok iyolo hilo’d walai, okito om orongou dau o tulun do mihad. Ka’d Yesus: “Kada kou ihad, tu a i napatai ilo tanak dilo, koodop no iyau.” Tantu no’d osuaian i molohing do tanak tondu diri do nunu komoyon di Yesus. Sinuhu di Yesus o koinsanai tulun do sumoliwan om oito no dau i molohing do tanak do hilo’d koiyonon di tanak do poinlii. Igitai no’d Yesus o longon di tanak diri om boro-boros no’d: “Oi tanak do tondu, moro-boros oku diya: tungag!” Hondomo pogi kaandasan do molohing dau soira’d tuminungag yau om tuminimpuun do mamanau! Pinotungag di Yesus o tanak tondu diyolo. (Markus 5:22-24, 35-42; Lukas 8:49-56) Mantad tadau dilo, soira’d kokito yolo tanak tondu diyolo, kosorou nodi yolo nunu nowonsoi di Yohuwah kumaa diyolo maya di Yesus.a

¹⁰ Tulun dit pinasi di Yesus, matai i kaagu. Nga iti toi komoyon dot aiso guna dot kinotungagan diyolo? Amu. Nunu i nabasa toko pasal tulun diti nopo nga oponting kopio, sabap kapanahak dati do kalansanan dit otopot. Manu i Yohuwah dot popotungag do tulun om tantu no’d wonsoiyon Dau.

NUNU NOPINSINGILAAN TOKO MANTAD SUSUIYAN DO KOTUNGAGAN

11. Nunu ponudukan id Gomponuduk 9:5 kumaa dati pasal di Lasarus?

¹¹ Atalang kopio boros do Baibol dot “tulun do napatai om aiso noo o toila-ilaan dau.” A iyolo poimpasi toi hino id kinoiyonon do suai. Iti no katapatan pasal di Lasarus. (Gomponuduk 9:5) Miagal noboros di Yesus iyodti no nung nokoodop no i Lasarus. (Yohanis 11:11) Daamot dau id lobong, “aiso noo o toila-ilaan dau.”

12. Poingkuro toko’d koilo dot nosiliu kopio i kinotungagan di Lasarus?

¹² Ogumu tulun nokokito soira pinasi kawagu di Yesus i Lasarus. Noilaan nogi di sangod di Yesus dot winonsoi dau o koimayaan diti. Poimpasi no i Lasarus, om popokito iti dot nosiliu kopio o kinotungagan. (Yohanis 11:47) Om nogi, ogumu tulun minoi ponombului di Lasarus, om tuminimpuun dii yolo do minumboyo dot pinaatod do Kinorohingan i Yesus. A orohian o sangod di Yesus do miagal dilo, i pogi, nokopomusorou iyolo do mamatai di Yesus om i Lasarus.​—Yohanis 11:53; 12:9-11.

13. Nokuro tu otumbayaan toko dot tungagon kawagu di Yohuwah i nangapatai?

¹³ Ka’d Yesus “i tulun di nangapatai” tungagon kawagu. (Yohanis 5:28) Komoyon, koinsanai diyolo it id suang do pomusarahan di Yohuwah tantu no posion kawagu. Nga, nung monungag i Yohuwah sosongulun, mositi hondomon Dau koinsanai pasal tulun diri. Milo toi Yau momonsoi miagal dilo? Ogumu o rombituon hilo’d tawan. Boros ka’d Baibol dot otutunan di Yohuwah o ngaran do pointikid-tikid do rombituon. (Basao Yosaya 40:26.) Nung osorou Dau ngaran do pontikid-tikid do rombituon, atantu no asanang kopio Iyau do kosorou pasal koinsanai tulun dit posion kawagu Dau. It lobi’d oponting, i Yohuwah no minomonsoi do nunu nopo, i pogi, oilaan toko dot kikuasa tomod Iyau do mamasi kawagu do tulun.

14, 15. Nunu ponudukan do boros di Ayub kumaa dati kokomoi do kotungagan?

¹⁴ Poingkuro topurimanan di Yohuwah kokomoi monungag do tulun dit napatai? Minonuduk o Baibol dot manu kopio Yau do monungag do tulun dit napatai. I Ayub tulun dit obintumboyo nga otumbayaan i kokomoi do kotungagan. Minoguhot yau: “Ondung apatai o tulun om milo po tuu iyau do masi kawagu?” Ka dau di Yohuwah: “Om momolohou ko nondo doho om sumimbar oku indo diya, om olisiu ko indo doho i tulun di winonsoi nu.” Oo, noilaan di Ayub dot natantu no di Yohuwah o maso do kotungagan do tulun di nangapatai.​—Ayub 14:13-15.

¹⁵ Poingkuro topurimanan nu kokomoi do kalansanan do kotungagan? Momusorou ko doti, “Poingkuro sampaganakan om tambalut ku dit napatai, tungagon kawagu nangku iyolo?” Iti koinsasamod dati do mongilo dot manu kopio i Yohuwah do mamasi kawagu dit napatai. Kaino intangai toko nunu ka’d Baibol kokomoi do hinonggo iyolo’d miyon om isai o posion kawagu.

ORONGOU DIYOLO BOROS DAU OM SUMOLIWAN

16. Nunu kaandasan om kowoyo-woyoon do koposion id pomogunan montok tulun dit pinasi kawagu?

¹⁶ Id di gulu po, tulun dit pinasi kawagu pinaamung miampai sampaganakan om tambalut diyolo hiti’d tana. Osiliu nogi miagal diti id maso’d abantalan nga lobi’d osonong ko iti. Nokuro? Sabap tulun dit pinasi kawagu hiti’d tana kikosiwatan do masi sogigisom om a nondo apatai. Om masi yolo id pomogunan dit poinsuai ko mantad koposion toko’d baino. Aiso nondo o pisangadan, karaaton, om toruol.

17. Isai o potungagon?

¹⁷ Isai o potungagon? Ka’d Yesus: “Korongou ngai do boros dau i tulun di nangapatai. Om sumoliwan nondo iyolo do mantad hiri’d lobong.” (Yohanis 5:28, 29) Id Pinointalang 20:13 minomisunud dot: “Om patahako no do rahat i tulun di napatai do hiri’d rahat. Om kapatayon om Pomogunan do Tulun do Nangapatai (Kalabangan) nga pinapatahak nogi do tulun di nangapatai do hiri.” Minoboros i Paulus dot posion kawagu “i tulun dit ongosonong om i tulun dit angaraat.” (Basao Winonsoi 24:15.) Nunu rati dilo?

18. Isai o “tulun dit ongosonong” dit tungagon kawagu?

¹⁸ “Tulun dit ongosonong” kohompit o tumatanud dit obintumboyo di Yohuwah it poimpasi dit a po nokorikot i Yesus hiti’d tana. Tulun miagal di Nuu, Abraham, Sara, Musa, Rut, om Isto potungagon kawagu do masi hiti’d tana. Kabasa ko’d pasal piipiro diyolo id buuk do Ibrani kotob 11. Nga poingkuro dii i tumatanud dit obintumboyo di Yohuwah i napatai do maso baino? Iyolo nga “tulun dit ongosonong,” i pogi’d potungagon kawagu i iyolo.

19. Isai o “tulun dit angaraat”? Nunu kosiwatan do patahakon di Yohuwah kumaa diyolo?

¹⁹ “Tulun dit angaraat” kohompit o kogumuan do tulun dit a haro kosiwatan do mongintutun di Yohuwah. Mulong piya’d napatai yolo, nga a i di Yohuwah nolihuan yolo. Tungagon i Dau yolo, om kikosiwatan do minsingilo om kumaraja montok Dau.

20. Nokuro tu okon ko koinsanai tulun do posion kawagu?

²⁰ Komoyon diti posion nangku ngai o koinsanai tulun dit napatai? Amu. Nokoboros i Yesus dot piipiro tulun amu no posion kawagu. (Lukas 12:5) Isai o monontu’d posion kawagu toi ko amu o sosongulun? Yohuwah no o Gompomutus kopio, nga nonuan Dau do kuasa i Yesus “do sumiliu’d Gompomutus di tulun di nangapatai.” (Winonsoi 10:42) Tulun dit noukuman sobaagi’d araat om a asaga do sumimban amu no posion kawagu.—Intangai Sinuratan id Tohuri 19.

KOTUNGAGAN KUMAA HILO’D SURGA

21, 22. (a) Nunu komoyon dot potungagon kumaa hilo’d surga? (b) Isai i tulun koiso do pinotungag kumaa hilo’d surga?

²¹ Minomisunud nogi o Baibol dot haro piipiro tulun koiyon hilo’d surga. Soira tinungag o sosongulun kumaa hilo’d surga, a no yau posion kawagu om masi sobaagi’d tinan di don tulun. Tinungag yau do masi hilo’d surga sobaagi’d tinan di don rusod.

²² Yesus no i tulun koiso di nakaramit do kotungagan miagal diti. (Yohanis 3:13) Tolu tadau nakatalib do kinapamataiyan di Yesus, tinungag yau’d Yohuwah. (Sinding 16:10; Winonsoi 13:34, 35) A yau tinungag miampai tinan di don tulun. Pinointalang di Pitrus i Yesus dot “pinatai o tinan dau, nga pinasi i kawagu dot id suang do kowoyo-woyoo di don rusod.” (1 Pitrus 3:18) Pinasi kawagu i Yesus sobaagi’d tinan di don rusod dit kikuasa kopio! (1 Korintus 15:3-6) Nga nokoboros o Baibol dot okon ko songulun no yau.

23, 24. Isai “it okuuri o nintaban” dit pinoboros di Yesus, om piro ginumu diyolo?

²³ Dit a po yau napatai, minomisunud i Yesus do tumatanud dau dit obintumboyo dot: “Mongoi oku’d hilo do mongoi posodia do tiyonon dokoyu.” (Yohanis 14:2) Komoyon diti dot piipiro tumatanud dau potungagon om koiyon miampai dau hilo’d surga. Piro ginumu? Ka’d Yesus: “It okuuri o nintaban.” (Lukas 12:32) Minanahak i Yohanis do nintaban dit otopot soira nokokito yau di Yesus “poingkakat dot id [surga] timpak di Nulu-Nulu do Sion. Om poinsugku dau o 144,000 o tulun.”​—Pinointalang 14:1.

²⁴ Soira’d potungagon iti 144,000 tulun? Minomisunud o Baibol dot osiliu iti soira’d kotimpuun o pomorintaan di Yesus hilo’d surga. (1 Korintus 15:23) Poimpasi toko no id maso dilo do baino, om kogumuan do 144,000 tulun, nokotungag no kumaa hilo’d surga. Iyolo i kakal po hiti’d tana om apatai do baino kotilombus do tungagon kumaa hilo’d surga. Nga, ginumuan do tulun potungagon kawagu id maso’d abantalan id Paradais do hiti’d tana.

25. Nunu opinsingilaan toko id kotob do sumusuhut?

²⁵ A no alaid om poiduon nondo di Yohuwah koinsanai tulun mantad kapataiyon om aiso nondo kapataiyon sogigisom! (Basao Yosaya 25:8.) Nga nunu o wonsoiyon diyolo i kumaa hilo’d surga? Pinointalang do Baibol dot momorinta yolo miampai di Yesus id Pomorintaan di Yohuwah. Kopinsingilo toko’d ogumu kokomoi do pomorintaan dilo id kotob do sumusuhut.