Minsomok Kasai Kumaa’d Yohuwah

1, 2. Hombo koihuman toko do pongintirungan do baino?

HONDOMO pogi mamanau ko id maso do kitongus dot opuhod. Otuong o tawan, mongodumaat, om tumimpuun do moninggoron. A no alaid om rumasam. Mogihum ko’d intulungungon. Osonong kopio soira koihum ko’d koiyonon dit kointirung om otuu!

² Miagal nogi kowoyo-woyoon toko do baino. Kowoyo-woyoon do pomogunan nga rumaat nogi. Momusorou ko doti, “Hinombo koihuman ku dot pongintirungan?” Minonurat i susuminding do Baibol: “Om milo no do moro-boros dot id dau do poingkaa, ‘Iya no i mogobi doho om it intirungon ku. Iya no o Kinorohingan ku, i pagandasan ku.’” (Sinding 91:2) Oo, kaanu i Yohuwah do manahak dati do kasanangan mantad kobolingkangan toko’d baino, om manahak nogi Yau do kalansanan dit kikoimayaan montok maso abantalan.

3. Poingkuro toko’d mokiintirung di Yohuwah?

³ Poingkuro i Yohuwah kaanu mongintirung dati? Kouhup Yau dati do monoguang nunu nopo kobolingkangan toko, om kikuasa kopio Yau mantad ko suai tulun dit mumbal doti daa do pokoruol dati. Mulong piya’d oontok toko’d kaantakan dit araat do baino, nga otumbayaan toko dot insanangan i di Yohuwah iri id maso abantalan. Mongudsuur o Baibol dati: “Pointirungon kasai no dokoyu o koposi-posion dokoyu dot id kosianan do Kinorohingan.” (Yudas 21) Mositi minsomok toko kasai di Yohuwah moi’d kaanu ponguhupan id maso koinggoritan. Nga poingkuro toko’d momonsoi dilo?

ROMITO NO TUPUS DI YOHUWAH

4, 5. Poingkuro i Yohuwah popokito do tupus Dau montok dati?

⁴ Moi do koinsomok kasai di Yohuwah, apatut do kopuriman toko songkuro tupus Dau dati. Soroho no o koinsanai dit nowonsoi di Yohuwah montok dati. Nonuan toko Dau do pomogunan dit olumis om sinuangan Dau do mogisuaian o tanom om nintorusan. Nonuan toko nogi Dau do takanon dit aasiu om waig do tinumon. Maya do Baibol, minonuduk i Yohuwah dati do ngaran om kosonongo Dau. Om lolobi po, pinopokito Yau do tupus Dau soira pinaatod Dau i Tanak koupusan Dau, i Yesus, hiti’d pomogunan do manahak koposion dau do porundunon montok dati. (Yohanis 3:16) Om sabap do rundun dilo, kikalansanan toko dii id maso’d abantalan.

⁵ Pinoposodia i Yohuwah do Pomorintaan do Mosias, iso pomorintaan mantad surga dot a no alaid do momunso do koinsanai koinggoritan. Silihon nondo do Pomorintaan do Kinorohingan o pomogunan do iso paradais, om osimbayan om olumaag nondo o koinsanai tulun do sogigisom. (Sinding 37:29) Pinopokito nogi i Yohuwah tupus Dau miampai monuduk dati poingkuro do masi id ralan tosonong do baino. Mangalap nogi Yau dati do sumambayang kumaa Dau, om sumodia kasai do mokinongou do sambayang toko. Pinointalang kopio di Yohuwah o tupus Dau montok dati toinsanan.

6. Poingkuro ko’d rumamit do tupus di Yohuwah?

⁶ Poingkuro ko’d rumamit do tupus di Yohuwah? Pokitono Dau dot mongunsikou ko montok koinsanai dit winonsoi Dau montok diya. Nga, kogumuan do tulun do baino a mongunsikou. Iti otopot miagal soira di hiti po’d tana i Yesus. Id iso kinaantakan, liningasan di Yesus o hopod tulun dit kitoruol do kusta, nga songulun no it minongunsikou dau. (Lukas 17:12-17) Momit toko miagal di kusai dit minongunsikou di Yesus. Manu toko’d mongunsikou kasai di Yohuwah.

7. Songkuro rinalom do tupus toko di Yohuwah?

⁷ Apatut nogi popokito toko tupus kumaa di Yohuwah. Minomisunud i Yesus do tumatanud dau dot mositi mupus iyolo di Yohuwah miampai aayi-ayi o ginawo, aayi-ayi o koposion, om aayi-ayi o pomusarahan diyolo. (Basao Matius 22:37.) Nunu rati’d ti?

8, 9. Poingkuro toko’d popokito di Yohuwah dot oupus toko Dau?

⁸ Kabagal toi’d moboros no dot oupus toko di Yohuwah? Amu. Nung oupus toko di Yohuwah miampai aayi-ayi o ginawo, koposion, om pomusarahan, popokito toko do tupus kumaa Dau maya do wonsoiyon toko. (Matius 7:16-20) Atalang kopio ponudukan do Baibol dot nung oupus toko di Yohuwah, mumboyo toko nondo’d ponuhuan Dau. Osusa nangku ti? Amu, sabap “koinsanai di ponuhuan Dau nga a i awagat.”​—Basao 1 Yohanis 5:3.

⁹ Soira mumboyo toko di Yohuwah, kaanu toko’d kolumaagan om kasantaban do koposion. (Yosaya 48:17, 18) Nga nunu it kouhup dati do minsomok kasai di Yohuwah? Kaino intangai toko.

TILOMBUSO NO DO MINSOMOK DI YOHUWAH

10. Nokuro tu apatut toko’d tumilombus do minsingilo kokomoi di Yohuwah?

¹⁰ Poingkuro ko’d sumiliu do tambalut di Yohuwah? Maya’d pinsingilaan nu do Baibol, kaanu ko lobi’d mongintutun di Yohuwah om poposuni do piombolutan miampai Dau. Piombolutan nopodti nga miagal ko tapui dit manu ko’d poinsikit kasai. Miagal do tapui di manu do pomurakit do sumikit, apatut ko’d tumilombus do minsingilo pasal di Yohuwah moi dot ogirot o piombolutan dokoyu.​—Boros dot Aralom 2:1-5.

11. Poingkuro koontok do ginawo nu o ponudukan do Baibol?

¹¹ Soira tumilombus ko do minsingilo do Baibol, koilo ko nondo hal dit koontok do ginawo nu. Intangai do poingkuro topurimanan do duo tumatanud di Yesus soira pinointalang dau diyolo o nubuat do Baibol. Boros ka diyolo: “Okon toi ko notingkau tomod o ginawo to do nokorongou di boros dau di hilo to’d tanga’d ralan diri, do tontok di pinoposuhut iyau do komoyon di songintulis dot id Buuk do Kinorohingan dot id dato?”​—Lukas 24:32.

12, 13. (a) Nunu ot aantakan do tupus toko di Yohuwah? (b) Poingkuro toko popogirot do tupus toko di Yohuwah?

¹² Miagal nogi nokoontok do ginawo di tumatanud di Yesus soira nakarati yolo do Boros do Baibol, kopuriman ko kanto miagal diti soira kotimpuun ko do mamarati do Baibol. Iti kouhup diya do mongintutun om mupus di Yohuwah. A ko manu do sumogit o tupus diti.​—Matius 24:12.

¹³ Soira nosiliu ko’d tambalut di Yohuwah, apatut ko’d monotos do popogirot do piombolutan dokoyu. Apatut ko’d tumilombus do minsingilo kokomoi’d Yohuwah om i Yesus om nogi momusorou pasal nunu it nopinsingilaan nu om poingkuro ko’d tumanud dilo id koposion nu. (Yohanis 17:3) Soira’d minsingilo ko’d Baibol, uhoto tinan sondiri: “Nunu pinotuduk doho diti kokomoi’d Yohuwah? Nokuro tu apatut oku do mupus Dau miampai aayi-ayi o ginawo om koposion ku?”​—1 Timotius 4:15.

14. Poingkuro sambayang kouhup dati do popogirot kasai tupus toko di Yohuwah?

¹⁴ Soira’d haro tambalut nu dit osonong, asaru ko’d monongkiboros dau, om iti popogirot kasai do piombolutan dokoyu. Miagal nogi, soira asaru toko’d monongkiboros di Yohuwah id sambayang, iti popogirot kasai do tupus toko Dau. (Basao 1 Tosolunika 5:17.) Sambayang nopo nga titahak do koimayaan mantad Tapa toko id surga. Apatut toko’d monongkiboros kasai Dau mantad ginawo toko. (Sinding 62:9) A toko apatut do piguli-gulian o sambayang toko mantad pomusarahan noo, nga mositi mantad id ginawo. Oo, nung tumilombus toko’d minsingilo do Baibol om sumambayang mantad do ginawo toko, kopogirot kasai toko nondo tupus kumaa’d Yohuwah.

MONONGKIBOROS KUMAA’D TULUN SUAI KOKOMOI’D YOHUWAH

15, 16. Poingkuro kokitanan nu do karaja popinhabaran?

¹⁵ Nung manu toko’d minsomok kasai di Yohuwah, apatut toko nogi moboros pasal kotumbayaan toko do suai tulun. Monongkiboros do suai tulun kokomoi’d Yohuwah nopo nga iso kosiwatan dit tosonong. (Lukas 1:73, 74) Om iti nopo nga iso tonggungan dit pinatahak di Yesus kumaa’d koinsanai tulun Kristian totopot. Monikid dati apatut do mongoi popinhabar do habar do osonong kokomoi’d Pomorintaan do Kinorohingan. Nowonsoi nu nangku ti?​—Matius 24:14; 28:19, 20.

¹⁶ Kopuriman i Paulus dot karaja popinhabaran nopo nga kigatang kopio; roitan dau iti do “dapu.” (2 Korintus 4:7) Popinsunud do tulun suai kokomoi’d Yohuwah om hontolon Dau nopo nga iso karaja toponting dit milo nu’d wonsoiyon. Iti no ralan nu do sumamba di Yohuwah, om mongunsikou Yau do nunu it wonsoiyon nu montok Dau. (Ibrani 6:10) Iya om it mokinongou diya kaanu nogi do kasanangan mantad popinhabaran sabap kouhup diya om tulun suai do monginsomok di Yohuwah om kaanu’d koposion sogigisom. (Basao 1 Korintus 15:58.) Haro toi karaja suai it kapanahak diya lobi’d asantaban?

17. Nokuro tu oponting kopio o karaja popinhabaran?

¹⁷ Oponting kopio o karaja popinhabaran. Apatut toko’d “popinsusui . . . di habar do mantad id Kinorohingan,” om apatut toko’d “a tumingkod do popinsusui.” (2 Timotius 4:2) Apatut do mokinongou o tongoulun kokomoi’d Pomorintaan do Kinorohingan. Ka’d Baibol: “Oruhai nod orikot i tadau’d TUHAN, i tadau do kopomisaraan!” Om “a no popiloid-loidon” o kolimpupuson! (Sipania 1:14; Habakuk 2:3) Oo, a no alaid do punsoon di Yohuwah o pomogunan taraat di Rogon. Pogulu id kaantakan dilo, apatut do posunudon do tulun moi’d kaanu yolo momili’d sumamba di Yohuwah.

18. Nokuro tu apatut toko do sumamba di Yohuwah miampai tulun do Kristian totopot?

¹⁸ Manu i Yohuwah dati do sumamba Dau miampai tulun Kristian suai dit otopot. Ka’d Baibol: “Om pogipadul-padul toko no, om kopogiodsuur-suur toko i do mogiinsian-sian dot iyati ngai, om kopomonsoi toko dit ongosonong. Om kumaparu toko no do mogititimung, om a tukono do miagal di tulun do suwai. Om apatut nogi do ruhangan toko o kotorodoko toko om mogiodsuur-suur toko, tu oilaan toko i dot a no alaid do rumikot o TUHAN.” (Ibrani 10:24, 25) Apatut do rumikot kasai toko id koinsanai pitimungan. Id pitimungan, kapanahak dati kosiwatan do mongudsuur om popogirot do tiso om tiso.

19. Nunu kouhup dati do mupus do tobpinai Kristian toko?

¹⁹ Soira rumikot ko id pitimungan, koruba ko nondo’d tambalut tosonong it kouhup diya do sumamba’d Yohuwah. Koruba ko nondo’d mogisuaian o tobpinai kusai om tondu it miagal diya do monotos do sumamba Dau. Om miagal diya, iyolo nga kibohiton om kowonsoi dit kasala. Soira kowonsoi iyolo’d miagal dii, ompunai no yolo. (Basao Kolosi 3:13.) Intangan kasai o kosonongo dot tobpinai Kristian nu om iti kouhup diya do mupus diyolo om koinsomok kopio di Yohuwah.

KOPOSION DIT OTOPOT

20, 21. Nunu o “koposion dit otopot”?

²⁰ Manu i Yohuwah do koinsanai tambalut Dau’d kaanu do koposion tosonong. Minonuduk o Baibol dati dot poinsuai kopio o koposion toko id maso’d abantalan ko mantad baino.

²¹ Id maso abantalan, apasi toko nondo do sogigisom, okon ko 70 toi 80 toun noo. Kaanu toko nondo “koposion . . . poingompus” miampai kolidasan tosonong, kosimbayanan, om kolumaagan id paradais dit olumis. Iti no roitan do Baibol dot “koposion dit otopot.” Minamatos i Yohuwah do manahak dati do koposion dit otopot, nga mositi monotos toko do momonsoi koinsanai dit kaanu’d kopogirot dati dot mongigit dilo.​—1 Timotius 6:12, 19.

22. (a) Poingkuro toko’d kaanu koposion dit totopot? (b) Nokuro tu a toko kaanu do koposion dit poingompus?

²² Poingkuro toko’d kaanu koposion dit totopot? Mositi toko’d “kumaparu do momonsoi dit ongosonong.” (1 Timotius 6:18) Rati nopo ti nga mositi wonsoiyon toko nunu it nopinsingilaan toko mantad Baibol. Nga, koposion dit otopot okon ko poinghontol do pinggisaman toko sondiri. A toko insan kaanu koposion dit poingompus. Iti nopo nga titahak dit aiso bayaran mantad di Yohuwah kumaa’d tumatanud Dau, om iso poomitanan do kopuhawangan Dau. (Rum 5:15) Manu kopio i Tapa toko hilo’d surga do manahak do titahak diti montok tumatanud Dau dit obintumboyo.

23. Nokuro tu apatut ko’d momonsoi pomilian dit otopot do baino?

²³ Uhoto o tinan nu sondiri, “Sumamba oku nangku di Yohuwah tumanud do korohian Dau?” Nung kopuriman ko dot apatut do sumimban, wonsoiyo no dot osisikap. Soira lumansan toko’d Yohuwah om tumotos do mumboyo Dau, suminiliu nondo i Yohuwah sobaagi’d pongintirungan toko. Intirungan nondo Dau i tulun dit obintumboyo id tadau do kolimpupuson do pomogunan taraat di Rogon. Poiyonon toko di Yohuwah id Paradais do sogigisom, miagal dit nabatos Dau. Oo, kaanu ko’d koposion dit otopot nung momonsoi ko’d pomilian dit otopot do baino!