Pilio Tambalut Dit Mupus Do Kinorohingan

1-3. (a) Nunu nopinsingilaan toko mantad Boros dot Aralom 13:20? (b) Nokuro tu mositi momili toko tambalut di tosonong?

KOILO ko nangku poingkuro baragang mintong do molohing dau? Pogulu id koilo mimboros, minsingilo yau nunu it okito om orongou dau. Soira sumukod, mimpuun nodi yau’d momit do molohing dau. Sobaagi’d tulun dit nongosukod, iyati nga asanang do katanud om kikowoyo-woyoon miagal tulun dit miampai kasai dati.

² Ka’d Boros dot Aralom 13:20: “Ambalut nod tulun dit ongkitoilaan, om osiliu ko i do tulun di kitoilaan.” Boros do “ambalut nod” komoyon dot sosongulun dit momili isai omboluton dau. Komoyon diti, okon ko miampai noo kasai dau, nga kad iso ponorisid do Baibol, mambalut do sosongulun kohompit nogi mupus om kitopurimanan dit ogirot miampai dau. Kogumuan dati koomit do tulun dit asaru’d miampai dati, lolobi po nung mupus toko diyolo.

³ Tambalut toko kaanu’d mongimbayat dati id ralan dit osonong toi araat. Ka’d Boros dot Aralom 13:20: “Ondung monokiambalut ko’d tulun do basug, om obungou ko no.” Tambalut dit mupus do Kinorohingan mongudsuur dati do potimporon kasai kobintumboyoo kumaa Dau. Moi dot kouhup toko’d momili tambalut, kaino pogibabarasai toko nunu kowoyo-woyoon tulun dit pinili di Yohuwah do sumiliu tambalut Dau.

ISAI O TAMBALUT DO KINOROHINGAN?

4. Nokuro tu pongunsikahan dit agayo do sumiliu tambalut do Kinorohingan? Nokuro tu roitan di Yohuwah i Abraham do “tambalut Ku”?

⁴ I Yohuwah it Abantug id Tawan om Tana, manahak dati kosiwatan do sumiliu tambalut Dau. Iti pongunsikahan dit agayo kopio. Iri pogi, pilion di Yohuwah isai o tambalut Dau. Momili Yau tulun dit mupus om kikotumbayaan kumaa Dau, miagal di Abraham. Momonsoi kasai i Abraham nunu nopo montok do Kinorohingan. Solinaid dau do poimpasi, otorodok om obintumboyo kasai iyau. Kasaga nogi yau poporundun di Isak i tanak dau tu otumbayaan iyau dot, “milo o Kinorohingan do mamasi kawagu di Isak do mantad id kapatayon.” (Ibrani 11:17-19; Kinawansayan 22:1, 2, 9-13) Roitan di Yohuwah iyau do “tambalut Ku” tu, otumbayaan om otorodok kopio yau.​—Yosaya 41:8; Yakub 2:21-23.

5. Poingkuro topurimanan di Yohuwah kokomoi diyolo it obintumboyo kumaa Dau?

⁵ Upuson di Yohuwah iyolo it popokito’d kotorodoko kumaa Dau mantad ko nunu nopo. (Basao 2 Somuil 22:26.) Otorodok om obintumboyo iyolo tu mupus iyolo Dau. Ka’d Baibol, orohian o Kinorohingan “dot id tulun di momonsoi do korohian Dau.” (Boros dot Aralom 3:32) Mangalap i Yohuwah do tambalut Dau do rumikot id “Walai” Dau. Mangalap nogi Yau diyolo do sumamba Dau om sumambayang kumaa Dau soira-ira nopo.​—Sinding 15:1-5.

6. Poingkuro toko’d popokito dot mupus toko di Yesus?

⁶ Ka’d Yesus: ‘Tulun nopo dit mupus doho, om mumboyo i do ponudukan ku. Om mupus i i Tapa ku do tulun diri.’ (Yohanis 14:23) Sumiliu tambalut di Yohuwah oporlu dot mupus toko di Yesus om momonsoi nunu it pinotuduk dau. Sobaagi’d suntu, mumboyo toko ponuhuan di Yesus dot popinhabar habar dot osonong om poposiliu tumatanud dau. (Matius 28:19, 20; Yohanis 14:15, 21) Om nogi, ‘tumanud toko di winonsoi dau.’ (1 Pitrus 2:21) Otood i Yohuwah soira’d kokito dati dot minggisom do momit do koboroso om wonsoion di Tanak Dau.

7. Nokuro tu momili toko’d tambalut dit mupus di Yohuwah?

⁷ Tambalut di Yohuwah kikotumbayaan, otorodok, om mupus di Tanak Dau. Momili toko toi’d tambalut miagal tambalut di Yohuwah? Nung momit o tambalut nu di Yesus om monuduk tulun suai kokomoi Pomorintaan do Kinorohingan, kouhup iyolo diya’d sumiliu tulun dit osonong om potimporon do kotorodoko kumaa di Yohuwah.

MINSINGILO MANTAD SUNTU DO BAIBOL

8. Nunu korohian nu kokomoi piombolutan di Rut om i Noumi?

⁸ Id Baibol, ogumu suntu’d piombolutan, miagal ko piombolutan di Rut om i tiwanon dau i Noumi. Tongoondu diti, misuai o tadon om kopongintutunan, om i Noumi lobi otuo mantad ko i Rut. Nga ogirot o piombolutan diyolo tu mupus iyolo di Yohuwah. Soira tumongkiad i Noumi mantad do Muab om gumuli id Israil, “i Rut . . . a no kopio sitongkiad di tiwanon dau.” Ka dau: “Bansa nu nga bansa ku no, om Kinorohingan nu nga Kinorohingan ku no.” (Rut 1:14, 16) Osonong tomod i Rut kumaa di Noumi. Tontok iyolo id Israil, aparu i Rut do kumaraja do monokodung tambalut dau. Oupus kopio i Noumi di Rut om nonuan dau’d pononsunudan dit osonong. Om kootuson, ogumu barakat naramit diyolo.​—Rut 3:6.

9. Nunu korohian nu kokomoi piombolutan di Daud om i Yonatan?

⁹ I Daud om i Yonatan nga suntu piombolutan dit osonong tu, otorodok iyolo kumaa di Yohuwah. 30 toun di Yonatan dot otuo mantad ko i Daud om yau no raja do sumusuhut id Israil. (1 Somuil 17:33; 31:2; 2 Somuil 5:4) Soira noilaan dau dot pinili di Yohuwah i Daud do sumiliu raja, a yau mosol toi sumolod. Suai ko, sumokodung iyau di Daud. Soira id koligaganan i Daud, nuhupan di Yonatan iyau do ‘popogirot do kotumbayaan kumaa di Yohuwah.’ Asaga yau do porundun do koposion dau montok di Daud. (1 Somuil 23:16, 17) I Daud nga tambalut dit otorodok. Minamatos iyau do momogompi sampaganakan di Yonatan, om iri no winonsoi dau mulong piya napatai no i Yonatan.​—1 Somuil 18:1, 2; 20:15-17, 30-34; 2 Somuil 9:1-7.

10. Nunu nopinsingilaan nu kokomoi piombolutan mantad tolu komulakan do Ibrani?

¹⁰ I Sadrak, i Misak, om i Abidnigo nopo nga tolu komulakan do Ibrani i natanggayan mantad tiyonon diyolo tontok dit ongokoro po. Tu osodu iyolo mantad molohing diyolo, mogiuhup-uhup dii iyolo do potimporon kobintumboyoo kumaa di Yohuwah. Kosukod nopo iyolo, noumbalan o kotumbayaan diyolo. Nga a i iyolo tuminuku di tininganak di Raja Nobukadnisar om minoboros dot: “A i kopio iyahai tumuku dot id kinorohingan nu, om a iyahai tumuku di tininganak do tamas di pinoingkakat nu.” Soira noumbalan o kotumbayaan diyolo, tolu komulakan diti, pinopotimporon do kotorodoko diyolo kumaa Kinorohingan.​—Daniol 1:1-17; 3:12, 16-28.

11. Poingkuro i Paulus om i Timotius do kipiombolutan di tosonong?

¹¹ Tontok dit nokoruba i rasul Paulus di Timotius dit omulok po, okito dau dot mupus kopio i Timotius di Yohuwah om momusou do sidang. Pinopinsingubas di Paulus i Timotius do monguhup tongotobpinai id mogisuaian o koiyonon. (Winonsoi 16:1-8; 17:10-14) Ka’d Paulus kokomoi di Timotius: “Tu nokototos tomod iyau do kuminaraja do minoyo doho do popinsusui di Habar dot Osonong.” Oilaan di Paulus i Timotius dot “mamadul kopio” yau do tongotobpinai. Solinaid iyolo’d sumamba di Yohuwah, osonong kopio o piombolutan diyolo.​—Pilipi 2:20-22; 1 Korintus 4:17.

POINGKURO TOKO’D MOMILI TAMBALUT

12, 13. (a) Nokuro tu intaan-taan toko’d momili do tambalut mulong piya id sidang? (b) Nokuro tu minanahak i rasul Paulus pononsunudan id 1 Korintus 15:33?

¹² Koinsanai tongotobpinai toko id sidang mogisuaian o tadon. Kopinsingilo toko miampai tiso om tiso, om mogiuhup-uhup do mumboyo kasai do Kinorohingan. (Basao Rum 1:11, 12.) Nga mulong piya id sidang, oporlu’d sorisidon toko isai pilion do tambalut. Piipiro tobpinai id sidang, alaid kanto do kotuo id di don rusod, miagal tuwa-uwa di kitimpuu do monsok. I pogi, oporlu toko’d alanut o ginawo, mupus tiso om tiso, om kitoilaan kasai momili tambalut.​—Rum 14:1; 15:1; Ibrani 5:12–6:3.

¹³ Somoonu, haro doti kaantakan id sidang, om mositi’d intaan-taan toko kopio. Nokopomonsoi kanto o tongotobpinai hal-hal dit a kopisudong do Baibol. Toi moro-boros kasai iyolo hal dit kaparaag kosimbayanan do sidang. A toko kotigowo tu id di gulu po kotoguang nogi o sidang do kobolingkangan miagal dilo. I pogi, minanahak i rasul Paulus do pononsunudan dot: “Kada kopio kou kaakalai! Tu iri no monokiambalut dit angaraat o karaag do kowoyo-woyoon dit osonong.” (1 Korintus 15:12, 33) Moboros nogi i Paulus kumaa di Timotius dot mositi antaan-taan dau soira momili do tambalut. Iyati nga miagal nogi di do baino.​—Basao 2 Timotius 2:20-22.

14. Poingkuro tambalut toko do mangampayat piromutan toko miampai di Yohuwah?

¹⁴ Mositi’d intirungan toko o piromutan toko miampai di Yohuwah. A toko mambalut do tulun dit kopoluhoi do kotumbayaan om it kaparaag do piromutan toko miampai di Yohuwah. Miagal do span dit poingobug id cuka om tantu no span dilo noponu’d nogi cuka. Miagal nogi dii, nung mambalut toko tambalut dit momonsoi di kasala, iyati nga oimbayatan nogi do momonsoi dit kasala. I pogi, mositi antaan-taan toko’d momili do tambalut.​—1 Korintus 5:6; 2 Tosolunika 3:6, 7, 14.

15. Nunu wonsoion nu moi’d koihum ko’d tambalut dit osonong id sidang?

¹⁵ Id sidang, koihum ko’d tambalut dit mupus di Yohuwah. (Sinding 133:1) Kada pogihum do tambalut dit miagal diya noo o tumur toi bansa dau. Soroho pogi dot i Yonatan nga lobi’d otuo mantad ko i Daud, om i Rut nga lobi’d omulok mantad ko i Noumi. Tumanud toko pononsunudan mantad Baibol dot: “Poukabo no ginawo nu.” (2 Korintus 6:13, NW; basao 1 Pitrus 2:17.) Nung momit ko di Yohuwah, lobi ogumu tulun do mangambalut diya.

TONTOK ID KOBOLINGKANGAN

16, 17. Nung haro tobpinai id sidang pokoruol do ginawo toko, nunu it a apatut do wonsoion toko?

¹⁶ Tobpinai id sidang miagal ko sampaganakan toko, mogisuaian o karalano id kowoyo-woyoon om pomusarahan. Pisuaian diti iso ot koimayaan kopio, tu kopinsingilo toko’d ogumu miampai tiso om tiso. Nga somoonu, pisuaian id kowoyo-woyoon dati, popoimbulai do katagadan om araatan toko doti diyolo, om nogi osindualan toi kopuriman do oruol o ginawo. (Boros dot Aralom 12:18) Pologoson toko nangku kobolingkangan diti do popoluhoi toi popoinsodu dati mantad sidang?

¹⁷ Amu. Mulong piya oruol o ginawo toko nga a toko i minsodu mantad sidang. Okon i ko i Yohuwah it pokoruol do ginawo toko. Minanahak Yau dati koposion om nunu nopo id pomogunan. Yau noo it oboyo do mamaramit tupus om kobintumboyoo toko. (Pinointalang 4:11) Sidang nopo nga titahak mantad do Kinorohingan moi dot kouhup do popotimporon kotumbayaan toko dit ogirot. (Ibrani 13:17) Mulong piya pokoruol o tongotobpinai do ginawo toko, a toko i magada’d titahak do Kinorohingan.​—Basao Sinding 119:165.

18. (a) Nunu i kouhup toko do kipomusarahan om kitopurimanan dit osonong miampai tobpinai-tobpinai toko? (b) Nokuro tu mositi mangampun toko’d suai tulun?

¹⁸ Mupus toko di tongotobpinai om manu’d kipiromutan dit osonong miampai diyolo. A i Yohuwah lumansan diyolo’d aiso bohiton, om iyati nga miagal nogi dii. (Boros dot Aralom 17:9; 1 Pitrus 4:8) Koinsanai dati nga kowonsoi kasalaan, nga tupus no i kouhup dati’d ‘alanut o ginawo dot id tulun do suwai, om miampun-ampun.’ (Kolosi 3:13) Nung pologoson toko topurimanan dit a osonong, iti kounsub dati do araatan om sumuli. Nga, iti koporuol tinan toko sondiri om atagakan kosimbayanan do pomusarahan. Ondung mangampun toko’d tulun dit nokoporuol do ginawo toko, kaanu toko i do kosimbayanan do ginawo om pomusarahan. Suai ko iri, ogompi o piuludan id sidang om kipiromutan toko dit osonong miampai’d Yohuwah.​—Matius 6:14, 15; Lukas 17:3, 4; Rum 14:19.

SOIRA’D OUYUNG O SOSONGULUN ID SIDANG

19. Soira toko’d tumingkod do mambalut miampai sosongulun id sidang?

¹⁹ Id sampaganakan, monikid diyolo momonsoi nunu nopo it kapanahak do kataadan dot tulun suai. Nga soroho pogi nung haro o songulun dot kowonsoi’d kasalaan. Koinsanai id sampaganakan diri manu’d mumbal do monguhup dau, nga mada iyau’d ponguhupan diri. Mogidu kanto iyau, toi ko suhuon di tapa dau do mundaliu. Haro kopiagalan dit milo’d osiliu id sidang. Sosongulun momili doti’d tumilombus dot momonsoi nunu it karaatan di Yohuwah om kaparaag do sidang. Mada iyau’d uhupan om a sumimban. Om sumoliwan kanto yau toi ko ouyung doti mantad sidang. Nung osiliu o miagal diti, ka’d Baibol, ‘a no monokiambalut miampai dau.’ (Basao 1 Korintus 5:11-13; 2 Yohanis 9-11) Kapanahak iti do kosusaan nung iyau nopo nga tambalut toi ko songulun id sampaganakan toko. Nga id kaantakan miagal diti, oponting dot ogirot o kotorodoko toko kumaa di Yohuwah mantad ko isai-isai nopo.​—Intangai Sinuratan id Tohuri 8.

20, 21. (a) Poingkuro oturan ponguyungan popokito’d tupus? (b) Nokuro tu oponting dot kitoilaan toko’d momili tambalut?

²⁰ Toturan ponguyungan iso karalano dit obingupus mantad di Yohuwah. Iti mongintirung do sidang mantad do sosongulun it a momoduli kokomoi toturan di Yohuwah. (1 Korintus 5:7; Ibrani 12:15, 16) Toturan diti kouhup dati’d popokito tupus kumaa di Yohuwah, kolidango ngaran Dau, om mamantang do toturan Dau. (1 Pitrus 1:15, 16) Om toturan diti nogi, popokito tupus montok tulun dit nouyung id sidang. Ponontudukan dit ogirot diti, kouhup dau’d kopuriman dot nakasala i winonsoi dau om kounsub dau do sumimban. Kogumuan dit nouyung nokoguli kaagu id di Yohuwah om ounsikou toko’d kogulian diyolo id sidang.​—Ibrani 12:11.

²¹ Koimbayat dati o tambalut toko. I pogi, oponting do antaan-taan toko’d momili tambalut. Ondung mupus toko diyolo it upuson di Yohuwah, osorilian toko tulun dit kouhup dati do tumorodok kasai Dau do sogigisom.