Nokuro Tu Mamantang Toko Di Kikuasa?

1, 2. (a) Disai tisuhu dit mositi tonudon toko? (b) Nunu poguhatan dit pogibara-barasan toko id kotob diti?

TONTOK dit okoro ko po, nokoumbal ko nangku do sinuhu do molohing nu dot momonsoi nunu it a ko manu’d momonsoi. Oupus ko di molohing nu om koilo ko dot apatut ko’d mumboyo diyolo. Nga somoonu, kakal ko i kasai kanto dot a manu do mumboyo do tisuhu diyolo.

² Oilaan toko dot i Yohuwah nopo nga Tapa toko dit mupus kopio dati. Momusou Yau dati om poposodia Yau nunu nopo kosioonuan toko moi’d otood o koposion toko. Nonuan toko Dau do tisuhu moi dot kalantoi toko id koinsanai karalano id koposion. Somoonu, momoguno Iyau suai tulun do manahak dati’d tisuhu. Mositi dot mamantang toko’d kokuasaan di Yohuwah. (Boros dot Aralom 24:21) Nga nokuro tu osusa toko’d mamaramit do tisuhu? Nokuro tu suhuon toko di Yohuwah tumanud do tisuhu? Om poingkuro toko’d popokito dot mamantang toko’d kokuasaan Dau?​—Intangai Sinuratan id Tohuri 9.

NOKURO TU OSUSA?

3, 4. Poingkuro tongoulun dot nosiliu kibohiton? Nokuro tu osusa montok dati do mamaramit tisuhu mantad tulun suai?

³ Sobaagi’d tulun toomod, koubasan toko do sumaap. Nosiliu ngai iti mantad tulun di timpuuni, i Adam om i Hawa do minomidusa. Mulong piya’d winonsoi iyolo’d aiso bohiton, nga suminaap iyolo’d kokuasaan di Yohuwah. Mantad diri, koinsanai tulun nosusu miampai’d kibohiton. Tu kibohiton toko, iri no sabap dot nokuro tu osusa montok dati do mamaramit tisuhu mantad di Yohuwah om tongoulun. Suai ko iri, minomoguno nogi i Yohuwah diyolo it kibohiton do manahak dati tisuhu.​—Kinawansayan 2:15-17; 3:1-7; Sinding 51:7; Rum 5:12.

⁴ Sabap dot kibohiton, orohian toko do minggayo-gayo. Osusa do mamaramit tisuhu nung minggayo-gayo toko. Sobaagi’d suntu, id maso do Israil, pinili di Yohuwah i Musa do momoyo’d tulun Dau. I Kora songulun kusai dit alaid no’d sumamba di Yohuwah, suminiliu do tulun dit minggayo-gayo om popokito dot a mamantang di Musa. Mulong piya’d momoyo i Musa do tulun do Kinorohingan, a yau minggayo-gayo. Suai ko, songulun yau dit osiriba o ginawo do tontok diri. Nga i Kora a mamaramit tisuhu di Musa. Minongimbayat nogi yau’d tinimungan dit agayo do tumanud dau do sumaap di Musa. Nunu ot nosiliu kumaa di Kora om it susumaap? Pinatai ngai iyolo. (Pongintaban 12:3; 16:1-3, 31-35) Id Baibol, ogumu suntu dit monuduk dati dot minggayo-gayo nopo nga koligogon.​—2 Susui 26:16-21; intangai Sinuratan id Tohuri 10.

5. Poingkuro piipiro tulun kasala do momoguno’d kuasa diyolo?

⁵ Mantad digulu po gisom do baino, ogumu tulun kasala dot momoguno’d kuasa diyolo. (Basao Gomponuduk 8:9.) Sobaagi’d suntu, i Saul, songulun dit osonong om osiriba o ginawo soira pinili di Yohuwah yau sumiliu raja do Israil. Nga suminiliu yau tulun dit minggayo-gayo om mosol gisom dot mongindaraat yau di Daud. (1 Somuil 9:20, 21; 10:20-22; 18:7-11) Kosiliu nopo i Daud do raja, om iyau no songulun raja dit osonong kopio it haro id Israil. Nga id iso timpu, nakasala i Daud do momoguno’d kuasa dau. Minagampahu iyau miampai di Batsiba, sinawo di Uria, om mumbal do popolisok do dusa dau miampai pinapaatod di Uria id pisangadan moi’d apatai yau.​—2 Somuil 11:1-17.

NOKURO TU MAMANTANG TOKO’D KOKUASAAN DI YOHUWAH

6, 7. (a) Tupus toko id di Yohuwah, kounsub dati do momonsoi nunu? (b) Nunu it kouhup dati do mumboyo ondung a osinang do momonsoi?

⁶ Mamantang toko’d tisuhu mantad di Yohuwah tu mupus toko Dau. Oupus toko di Yohuwah lobi ko mantad do nunu nopo toi isai nopo. Manu toko’d otood Yau. (Basao Boros dot Aralom 27:11; Markus 12:29, 30.) Mantad tulun dit timpuuni it poingiyon id kabun do Idon, manu i Rogon dot sumaap o tulun kumaa di Yohuwah. Manu nogi i Rogon do momusorou toko dot aiso kuasa di Yohuwah do momisunud nunu it wonsoion toko. Nga koilo toko dot iti nopo nga tudut. Kaakun toko do boros diti: ‘Oi Yohuwah, i Kinorohingan dahai! Iya noo ot osorupai do royohon, om pusohon om kikuasa. Tu Iya no o minomonsoi do koinsanai’d nunu nopo.’​—Pinointalang 4:11.

⁷ Dit okoro ko po, tinudukan ko’d mumboyo’d molohing nu mulong piya a ko manu. Miagal nogi, sobaagi’d susumamba di Yohuwah, kitimpu nogi dit a osinang do mumboyo. Nga miampai tupus om pamantangan toko di Yohuwah, tumotos toko’d mumboyo Dau. Pinosodia di Yesus o suntu montok dati. Minumboyo yau di Yohuwah mulong piya dot a osinang do momonsoi. I pogi moboros yau dot: “A indo tumanud di doho’d korohian, suwai ko tumanud nopo do korohian do Tapa.”​—Lukas 22:42; intangai Sinuratan id Tohuri 11.

8. Nunu piipiro karalano dit pinotuduk di Yohuwah dati? (Intangai kutak “Kinongoho o Pononsunudan.”)

⁸ Baino, minonuduk i Yohuwah dati id mogisuaian o karalano. Sobaagi’d suntu nonuan toko Dau do Baibol om ponotua id sidang. Popokito dot mamantang toko do kokuasaan di Yohuwah soira’d mamantang toko diyolo it ginuno Dau do momoyo dati. Nung mada toko ponguhupan diyolo, iti miagal ko magada toko di Yohuwah. Soira minagada o tulun Israil di Musa, bagi di Yohuwah iti miagal ko minagada iyolo Dau.​—Pongintaban 14:26, 27; intangai Sinuratan id Tohuri 12.

9. Poingkuro tupus koudsuur dati tumanud do tisuhu?

⁹ Soira’d mamantang toko kokuasaan, iti popokito dot mupus toko tongotobpinai toko. Soroho pogi, soira aantakan do kosusaan, koubasanan haro tinimungan do monguhup do tongoulun. Moi’d kitoilaan do monguhup o tinimungan diti, mositi haro songulun dit kaanu mongulud, om tongosurupu dau nga apatut tumanud do tisuhu diri. Nga poingkuro nung haro songulun dit a tumanud do tisuhu diri, om momonsoi no di korohian dau? Mulong piya’d osonong ot hontolon dau, nga iti manahak dot koligaganan kumaa tinimungan dau, om nogi koponinduol kanto diyolo. Miagal nogi dii, nung a toko tumanud tisuhu di Yohuwah om tulun dit nonuan Dau do kuasa, iti koinggorit doti do tulun suai. Nga soira’d mumboyo toko di Yohuwah, iti popokito dot mupus toko tongotobpinai om mamantang ponguludan di Yohuwah.​—1 Korintus 12:14, 25, 26.

10, 11. Nunu ot pogibara-barasan toko’d baino?

¹⁰ Nunu nopo tisuhu di Yohuwah do wonsoion toko nga montok kasanangan toko. Soira mamantang toko kokuasaan id sampaganakan toko, id sidang, om soira monoguang do pomorinta, iti kopogowit do kasanangan.​—Ponugutan 5:16; Rum 13:4; Iposus 6:2, 3; Ibrani 13:17.

¹¹ Nokoilo toko no nokuro tu manu i Yohuwah dati do popokito do pamantangan kumaa tulun suai, iti kouhup dati do mamantang do kokuasaan. Kaino pogibara-barasai toko, poingkuro toko’d kaanu popokito do pamantangan id tolu karalano id koposion.

KAPAMANTANGAN ID SAMPAGANAKAN

12. Poingkuro o sawo popokito’d mamantang yau’d kokuasaan?

¹² Winonsoi di Yohuwah o sampaganakan, om monikid diyolo nonuan do tonggungan. Nung koilo iyolo’d ponuhuan di Yohuwah, oulud om kikasanangan o sampaganakan diyolo. (1 Korintus 14:33) Pinoingkakat di Yohuwah o sawo sobaagi’d tulu do sampaganakan. Komoyon, manu i Yohuwah dau do momogompi om momoyo di sinawo om tangaanak miampai’d tupus. I pogi, kitonggungan i sawo kumaa di Yohuwah nung a yau momogompi’d sampaganakan dau. Sawo Kristian apatut kikowoyo-woyoon dit osonong, mupus, om momogompi sampaganakan dau miagal karalano di Yesus do momogompi sidang. Nung wonsoion dau ilo, iti popokito’d mamantang yau di Yohuwah.​—Iposus 5:23; intangai Sinuratan id Tohuri 13.

13. Poingkuro sinawo popokito dot mamantang iyau’d kokuasaan?

¹³ Sinawo Kristian kitonggungan nogi dit oponting. Mositi monokodung yau do sawo om kitonggungan do popinsingubas do tangaanak miampai dit sawo dau. Iso nopo karalano dau monuduk di tangaanak do kipamantangan nga, maya poomitanan dau sondiri. (Boros dot Aralom 1:8) Mamantang om monokodung yau di sawo dau. Nung a yau kaakun kootuson dit pinili di sawo kokomoi nunu nopo, pointalangon dau o topurimanan dau do tososonong om kipamantangan. Soira’d nakasawo o tondu Kristian dit okon ko Sasi, kotoguang yau’d ogumu pogumbalan. Nga nung tumilombus yau’d mupus om mamantang do sawo, insan tadau manu doti i sawo do mintutun om sumamba di Yohuwah.​—Basao 1 Pitrus 3:1.

14. Poingkuro tangaanak popokito pamantangan do kokuasaan?

¹⁴ Oponting o tangaanak montok di Yohuwah, om manu kopio iyolo’d pongintirungan om ponguhupan. Soira mumboyo o tangaanak do molohing, iti popotood do molohing diyolo. Lobi oponting, kobintumboyoo diyolo popokito’d pamantangan om popotood iyolo di Yohuwah. (Boros dot Aralom 10:1) Sampaganakan dit iso noo o molohing, tangaanak, tapa toi tina kotoguang ogumu o pogumbalan. Nga soira’d mumboyo om monokodung o tangaanak do tina toi tapa diyolo, lobi osonong o koposi-posion do sampaganakan diyolo. Poingkuro po nga kibohiton ngai o sampaganakan. Nga sampaganakan kaanu kataadan nung monikid diyolo tumanud do tisuhu di Yohuwah. Iti kopogowit do pamarayahan kumaa di Yohuwah, i Gompomonsoi do sampaganakan.​—Iposus 3:14, 15.

KAPAMANTANGAN ID SIDANG

15. Poingkuro toko’d popokito dot mamantang toko kokuasaan id sidang?

¹⁵ Monguhup i Yohuwah dati maya’d sidang Kristian. Pinoingkakat Dau i Yesus sobaagi’d tulu do sidang. (Kolosi 1:18) Om pinatahak di Yesus o tonggungan kumaa “susuhuon dit otorodok om it oilo” do momogompi tulun di Yohuwah hiti’d tana. (Matius 24:45-47) Baino, “susuhuon dit otorodok om it oilo” nopo nga Kotinanan Boyoon do Momoyo. Pinoposodia iyolo do kosusukupan di do rusod id timpu dit poingontok do monguhup dati’d popogirot do kotumbayaan. Ponotua, ponguhup sidang, om ponyolia posorili monokodung do sidang id pointongkop do pomogunan om mamaramit tisuhu mantad Kotinanan Boyoon do Momoyo. Koinsanai tobpinai diti kitonggungan do momogompi dati, om manu i Yohuwah diyolo’d papanau karaja do tososonong. Soira mamantang toko diyolo, komoyon dot mamantang toko di Yohuwah.​—Basao 1 Tosolunika 5:12; Ibrani 13:17; intangai Sinuratan id Tohuri 14.

16. Nokuro tu moboros toko dot ponotua om ponguhup sidang pinili maya’d rusod tolidang?

¹⁶ Ponotua om ponguhup sidang potimporon do kobintumboyoo om piuludan. Iyolo nga kibohiton miagal dati. Nga, poingkuro iyolo’d pinili? Tongotobpinai diti mositi’d kikowoyo-woyoon dit kosudong do Baibol. (1 Timotius 3:1-7, 12; Titus 1:5-9) Minomoguno i Yohuwah do rusod tolidang do monguhup gomponurat do Baibol dot popointalang kowoyo-woyoon dit kosudong. Sumambayang o tongoponotua montok rusod tolidang di Yohuwah soira’d momili isai ot oboyo sumiliu ponotua toi ko ponguhup sidang. Atalang kopio dot sidang, id siriba ponontudukan di Yesus om i Yohuwah. (Winonsoi 20:28) Tongotobpinai dit monokodung om momogompi dati nopo nga titahak mantad di Yohuwah.​—Iposus 4:8.

17. Montok popokito’d pamantangan, nunu id oporlu do wonsoion do tobpinai tondu?

¹⁷ Somoonu, aiso kanto ponotua toi ponguhup sidang do papapanau do karaja id sidang. Tobpinai suai dit nabatis kaanu nogi’d monguhup. Nga nung aiso, tobpinai tondu kaanu momonsoi karaja dit koubasanan do wonsoion do tobpinai kusai dit nabatis. Nung kaantakan miagal diti, tobpinai tondu mositi dot monongkulu. (1 Korintus 11:3-10) Id karalano diti, popokito dot mamantang iyau ponguludan di Yohuwah kokomoi’d tulu id sampaganakan om sidang.​—Intangai Sinuratan id Tohuri 15.

KAPAMANTANGAN DO POMORINTA ID POMOGUNAN

18, 19. (a) Nunu nopinsingilaan toko id Rum 13:1-7? (b) Poingkuro toko’d popokito pamantangan montok do pomorinta?

¹⁸ Baino, pasagaon di Yohuwah o tongoulun do momorinta, i pogi pantangon toko iyolo. Mongulud iyolo’d pogun om tongoulun moi’d kapanau pomorintaan diyolo’d tososonong om poposodia kosusukupan montok tongoulun. Tulun Kristian mumboyo’d ponontudukan id Rum 13:1-7. (Basao.) Mamantang toko’d kuasa do pomorinta om tumanud do toturan dit pinatahak. Toturan diti kaanu doti kaampayat do sampaganakan, konu-onuan, toi ko dapu toko. Miagal ko, mambarai toko cukai om posodia kopoilaan dit pokionuon do pomorinta. Nga nunu wonsoion toko nung suhuon toko’d pomorinta do momonsoi dit a pointanud toturan do Kinorohingan? Ka’d rasul Paulus: “Kinorohingan no ot apatut dahai’d umboyoon, om okon i ko tulun.”​—Winonsoi 5:28, 29.

¹⁹ Mositi’d mamantang toko’d pagawai pomorinta, miagal ko gompomutus toi pulis. Komulakan do Kristian popokito’d mamantang iyolo do sigu diyolo toi i kukumaraja suai id sikul. Id karajaon, popokito toko’d pamantangan kumaa boyoon. Soira momonsoi toko miagal diti, momit toko di rasul Paulus dit mamantang dot pomorinta mulong piya’d osusa. (Winonsoi 26:2, 25) Mulong piya’d a osonong o suai tulun kumaa dati, nga potimporonon kasai dati o pamantangan.​—Basao Rum 12:17, 18; 1 Pitrus 3:15.

20, 21. Nunu it osonong dot osiliu soira mamantang toko’d tulun suai?

²⁰ Id pointongkop do pomogunan, okuri no o tulun do popokito pamantangan tiso om tiso. Sobaagi’d tulun di Yohuwah a toko momit miagal diyolo. Ka’d rasul Pitrus: “Pusohon no o koinsanai’d tulun.” (1 Pitrus 2:17) Kopuriman i o tulun pamantangan dit pokitonon toko. Ka’d Yesus: “Potitihon no kopio o tanawau dokoyu dot id tulun do suwai, om okito indo diyolo i wonsoyon dokoyu dit osonong, om royohon nondo diyolo i Tapa.”​—Matius 5:16.

²¹ Soira’d mamantang toko’d sampaganakan, sidang, om tulun suai, iti kounsub doti’d tulun suai do sumamba di Yohuwah. Nung mamantang toko tulun suai, iti popokito dot mamantang toko di Yohuwah. Iti popotood di Yohuwah om popokito’d mupus toko Dau.