Poingkuro Toko’d Momili Do Pomomoinan

1, 2. Nokuro tu intaan-taan toko tontok do momili’d pomomoinan?

SOROHO pogi dot mangakan ko’d tua, nga sampaping do tua diri a no osonong. Nunu wonsoion nu? Akanon nu nangku ngai ri? Pataamon nu nangku tua diri? Toi pataamon nopo sampaping do tua dit a no osonong om akanon nopo sampaping dit osonong?

² Miagal nogi dii, pomomoinan miagal di tua. Haro it kapanahak diya’d kataadan nga kogumuan a osonong tu kisuang do sosomu, kororongit, toi spiritisme. I pogi, tontok momili ko’d pomomoinan, moboros ko toi’d: “Doho nopo’d korohian. Momili oku nunu nopo pomomoinan dit korohian ku.” Toi moboros ko nangku: “Koinsanai pomomoinan nga araat”? Toi intaan-taan nu nangku pomomoinan dit pilion nu, mada dit araat om romiton it osonong?

3. Nunu poguhatan do sorohon toko?

³ Koinsanai dati manu’d pomomoinan. Om manu toko’d momili dit osonong. Uhot pogi, “Poingkuro pomilian toko’d pomomoinan kaampayat do sambaan toko kumaa di Yohuwah?”

“WONSOYON NGAI NORI DO POPOINGGAYO’D KINOROHINGAN”

4. Nunu iso ponontudukan do Baibol it kouhup dati’d momili pomomoinan?

⁴ Tontok mambakti toko kumaa di Yohuwah, mamatos toko dot momoguno’d koposion toko do sumamba Dau. (Basao Gomponuduk 5:4.) Om nogi, ‘momonsoi nunu nopo do popoinggayo’d Kinorohingan.’ (1 Korintus 10:31) Komoyon nopo diti nga, mambakti toko kumaa’d Kinorohingan id koinsanai karalano’d koposion toko, kohompit nogi pomomoinan dit pilion toko.

5. Nunu wonsoion toko moi’d romiton di Yohuwah o sambaan toko?

⁵ Koinsanai dit wonsoion toko id koposion kapanahak kootuson dit osonong toi amu id sambaan toko kumaa di Yohuwah. Ka’d Paulus: “Papatahak do koposi-posion dokoyu dot id Kinorohingan do sumiliu’d porsombahan di poimpasi di potobilangon do maan do dong Kinorohingan.” (Rum 12:1) Minoboros i Yesus: ‘Upuso no i Yohuwah, i Kinorohingan nu’d mikuwo’d aayi-ayi o ginawo nu, aayi-ayi o koposion om pomusorou nu, om kokorisan nu.’ (Markus 12:30) Manahak toko di Yohuwah nunu it osonong kopio. Id maso’d Israil di gulu po, porsombahan dit kibohiton a Dau romiton. (Oturan 22:18-20) Miagal nogi dii, sambaan toko nga a romiton di Yohuwah. Poingkuro iti’d osiliu?

6, 7. Poingkuro pomomoinan koimbayat do sambaan toko kumaa di Yohuwah?

⁶ Ka’d Yohuwah, “Kumolidang kou no, tu olidang Oku i.” (1 Pitrus 1:14-16; 2 Pitrus 3:11) Romiton di Yohuwah ot sambaan toko nung olidang toko. (Ponugutan 15:21) A Dau romiton o sambaan toko nung momonsoi toko dit karaatan di Yohuwah, miagal ko hal-hal dit sosomu, kororongit, om kipiromutan miampai’d rusod dit tangaraat. (Rum 6:12-14; 8:13) A nogi di Yohuwah romiton o sambaan toko nung orohian toko’d pomomoinan dit kikowoyoon miagal diti.

⁷ Poingkuro toko’d kitoilaan do momili pomomoinan? Nunu ponontudukan dit kouhup dati?

KARAATAI NO DIT ARAAT

8, 9. Nunu pomomoinan dit mositi ilagon toko? Nokuro?

⁸ Haro mogisuaian o pomomoinan do baino. Haro it kosudong montok tulun Kristian om haro it amu. Kaino intutunai toko pomomoinan dit mositi’d ilagon toko.

⁹ Kogumuan do wayang, laman web, ababayan id TV, video game, om sinding, kisuang dit sosomu, kororongit, toi spiritisme. Hal dit angaraat pinointalang miagal ko osonong o kokitanan om kotompuirak. Nga tulun Kristian mositi’d antaan-taan om ilagon o pomomoinan dit karaatan di Yohuwah. (Winonsoi 15:28, 29; 1 Korintus 6:9, 10) Ondung ilagon toko o pomomoinan dit a osonong, iti kopokito di Yohuwah dot araatan toko dit angaraat.—Sinding 34:14; Rum 12:9.

10. Nunu kootuson ondung momili toko pomomoinan dit araat?

¹⁰ Nga haro nogi tulun momusorou dot, “Mintong oku nopo tomod pomomoinan dit a osonong nga a okui momonsoi miagal dilo.” Koligogon kopio pomusarahan miagal dilo. Kad’d Baibol, ‘Tu aiso no o goudut kopio ko mantad ginawo’d tulun, om adalaan noti karaat.’ (Yoromia 17:9) Nung orohian toko’d pomomoinan dit karaatan di Yohuwah, otopot nangku’d araatan toko kopio dit angaraat? Otopot nopo nga, nung orohian toko momonsoi nunu it araat, iti posiliu’d kogiiginowoo toko dot a nondo kaanu mononsunud dati kokomoi kootuson di pinili dati dit araat.​—Sinding 119:70; 1 Timotius 4:1, 2.

11. Poingkuro Galatia 6:7 kouhup dati’d momili pomomoinan dit osonong?

¹¹ Ka’d Baibol, “Tu nunu nopo i potonomon, om iri no o tomoton.” (Galatia 6:7) Ondung asaru toko’d mintong pomomoinan dit a osonong, iti koimbayat dati’d momonsoi dit kasala. Sobaagi’d suntu, piipiro tulun Kristian nokowonsoi dit sosomu sabap noimbayatan iyolo’d pomomoinan dit sosomu. Nga nonuan toko di Yohuwah do ponguhupan moi’d kikabaalon momili’d pomomoinan.

MOMONSOI KOOTUSON MAYA’D PONONTUDUKAN DO BAIBOL

12. Nunu it kouhup dati’d momonsoi kootuson dit osonong kokomoi pomomoinan?

¹² Piipiro pomomoinan karaatan kopio di Yohuwah, om mositi’d ilagon toko iti. Nga poingkuro nung a toko koilo dot pomomoinan diri milo’d intangan toi ko amu? A i Yohuwah minanahak dati’d nuludan toturan dit mositi do tonudon toko. Nga manu Iyau do momoguno toko’d kogiiginowoo dit nopinsingubas maya’d Baibol do momonsoi kootuson. (Basao Galatia 6:5.) Nonuan toko di Yohuwah do ponontudukan dit monuduk dati kokomoi pomusarahan Dau. Ponontudukan diti kouhup dati’d mamarati ‘nunu o korohian di Yohuwah’ moi’d kitoilaan toko’d momonsoi kootuson.​—Iposus 5:17.

13. Nokuro tu mogisuaian o kootuson dit pilion toko kokomoi pomomoinan? Nga nunu it wonsoion do tulun Kristian?

¹³ Mogisuaian o kootuson dit wonsoion toko id pomomoinan tu mogisuaian nogi o korohian toko. Om nogi, pomomoinan dit milo’d romiton do sosongulun nga kakasou doti’d kogiiginowoo suai tulun. Mulong piya miagal dii, koinsanai tulun mositi’d tumanud ponontudukan do Baibol soira’d momonsoi kootuson. (Pilipi 1:9) Iti kouhup dati momili pomomoinan dit korohian do Kinorohingan.​—Sinding 119:11, 129; 1 Pitrus 2:16.

14. (a) Nokuro tu oponting dot sorohon toko poingkuro’d momoguno timpu kokomoi pomomoinan? (b) Nunu ponudukan dit tinahak di Paulus kumaa tulun Kristian?

¹⁴ Sobaagi’d tulun Kristian manu toko’d popogulu karaja montok di Yohuwah. (Basao Matius 6:33.) Ondung a toko antang-antangan, ayi kanto timpu toko montok no’d pomomoinan. Ka’d Paulus: “Kada kou omit di kowoyo-woyoo do tulun di basug. Suwai ko omit kou no di kowoyo-woyoo di tulun dit oilo. Om pakayon no kopio dokoyu kosonong-sonong o maso dokoyu.” (Iposus 5:15, 16) I pogi, potontuon toko o timpu montok pomomoinan om popogulu kasai karaja montok di Yohuwah id koposion toko.​—Pilipi 1:10.

15. Poingkuro toko’d mongintirung tinan sondiri mantad pomomoinan dit karaag do piromutan toko miampai di Yohuwah?

¹⁵ Atalang kopio dot mositi’d minsodu toko mantad pomomoinan dit karaatan di Yohuwah. Nga poingkuro ondung a toko koilo pomomoinan diri karaatan di Yohuwah toi amu? Soroho pogi, nung mamanau ko id timpak do nulu dit otidong, mamanau ko nangku id disan do nulu diri? Amu. Nung mongunsikou ko’d koposion nu, tantu no’d minsodu ko dit koligogon. Miagal nogi di pomilian toko id pomomoinan. Ka’d boros do Kinorohingan: “Insodu no dit araat.” (Boros dot Aralom 4:25-27) I pogi, okon nopo ko ilagon o pomomoinan dit oilaan toko’d araat, nga minsodu toko nogi nunu nopo pomomoinan dit karaag kanto do piromutan toko kumaa di Yohuwah.

POPOSUNI KARALANO’D POMUSARAHAN DI YOHUWAH

16. (a) Nunu hal dit karaatan di Yohuwah? (b) Poingkuro toko popokito’d araatan toko’d nunu it karaatan di Yohuwah?

¹⁶ Ka’d Sinding: ‘Osianan i Yohuwah do koinsanai di tulun dit araatan do karaaton.’ (Sinding 97:10) Minonuduk o Baibol poingkuro pomusarahan om topurimanan di Yohuwah. Sobaagi’d suntu, koilo toko’d araatan i Yohuwah “kabang di goudut, longon di mamatai’d tulun dot aiso o sala, pomusarahan di minsorou dot angaraat, gakod di marau-arau do kumaa dot id karaaton.” (Boros dot Aralom 6:16-19) Koilo toko nogi’d mositi’d minsodu toko ‘momonsoi di sosomu, tumuku id tingolig om id toilaan do bobolian, kobimbioguho, om kobintogodo, mogiosol-osol, i magauk, it adalaan o pogiginakan om suwai-suwai ko iri.’ (Galatia 5:19-21) Koilo ko nangku poingkuro ponontudukan do Baibol kouhup diya’d momili pomomoinan? Manu toko tumanud toturan di Yohuwah id koinsanai karalano’d koposion toko mulong piya’d osongulunan toko toi miampai do tulun suai. (2 Korintus 3:18) Koubasan nopo nga, pomomoinan dit pilion toko tontok osongulunan, popointalang do isai toko kopio.​—Sinding 11:4; 16:8.

17. Pogului’d momili toko’d pomomoinan, nunu poguhatan dit uhoton toko?

¹⁷ Tontok do momili ko’d pomomoinan, uhot pogi: “Pomomoinan dit pilion ku koimbayat nangku piromutan ku miampai di Yohuwah? Nunu kootuson diti montok kogiiginowoo ku?” Pinsingilaai toko piipiro ponontudukan do Baibol it kouhup dati’d momili pomomoinan.

18, 19. (a) Nunu pononsunudan di Paulus kumaa’d tulun Kristian? (b) Nunu piipiro ponontudukan do Baibol it kouhup dati’d momili pomomoinan?

¹⁸ Pomomoinan dit pilion toko koimbayat do pomusarahan toko. Ka’d Paulus, “Potumpuon no dokoyu o pomusarahan dokoyu dot id koinsanai di haro o guna, om it apatut do royohon, iri no it ongotopot, om i suahon, om it otulid, om it olidang, om i popoinsonong, om it osonong.” (Pilipi 4:8) Ondung suangan toko pomusarahan miagal diti, kaanu toko moboros dot “maha daa koboros-boroso ku om pomusarahan ku, kapasanang diya oi Yohuwah.”​—Sinding 19:14, NW.

¹⁹ Uhot pogi: “Suangan ku nangku o pomusarahan ku do hal dit osonong? Katalib mintong do wayang toi ababayan id TV, kopuriman oku nangku kosimbayanan? Kikosimbayanan toi o kogiiginawoo ku? (Iposus 5:5; 1 Timotius 1:5, 19) Otingngayaman oku nangku’d sumambayang kumaa di Yohuwah? Koimbulai nangku id pomusarahan ku hal dit ongorongit toi i sosomu? (Matius 12:33; Markus 7:20-23) Maya pomomoinan dit pilion ku, koimbayat toi doho’d ‘tumanud di koubasan diti pomogunan’?” (Rum 12:2) Oo, oporlu toko’d minsodu hal dit kaparaag piombolutan toko miampai di Yohuwah. Apatut do momit toko sambayang di gomponurat do Sinding: ‘Kada oku pologoso do mogihum dit aiso o kotutuk-tutukon.’a—Sinding 119:37.

KOOTUSON TOKO KOIMBAYAT DO TULUN SUAI

20, 21. Nokuro tu sorohon toko topurimanan tulun suai tontok do momili toko’d pomomoinan?

²⁰ Iso po kaagu ponontudukan dit oponting i pinotuduk di Paulus, ‘Koino-ino toko i do momonsoi do nunu nopo i korohian toko, nga a i haro ngai no o guna di korohian toko. Kada nod haro o tongoiso pod tulun do tumotos do mogihum di dau nod koinsanangan. Suwai ko apatut nogi do tumotos do mogihum do koinsanangan do tulun do suwai.’ (1 Korintus 10:23, 24) Mulong piya’d kikosimbayanan toko’d momonsoi nunu nopo, nga a apatut do momonsoi diri tu kootuson toko koimbayat do tulun suai.

²¹ A mogiagal o kogiiginawoo koinsanai tulun. Sobaagi’d suntu, kogiiginowoo nu papasaga diya’d mintong ababayan id TV. Nga kogiiginawoo tulun suai a kanto pasaga diyolo do mintong. Nunu wonsoion nu? Mulong piya’d kikosimbayanan ko mintong ababayan diri, nga a ko kanto mintong. Nokuro? Tu a ko manu’d ‘mamaraag kopurimanan do ginawo diyolo,’ toi ‘kowonsoi dusa dot id Kristus.’ (1 Korintus 8:12) A toko manu’d momonsoi nunu nopo it mamaraag do kogiiginawoo tobpinai sopikotumbayaan toko.​—Rum 14:1; 15:1; 1 Korintus 10:32.

22. Nunu ot wonsoion toko kokomoi’d kootuson do tulun suai?

²² Poingkuro nung kogiiginowoo toko a papasaga dati’d mintong, mambasa, toi momonsoi nunu nopo, nga kogiiginawoo tulun suai papasaga diyolo? A toko mononsog diyolo’d tumanud do kootuson toko, tu mupus om mamantang toko diyolo. Songulun i papapanau’d korita koilo’d mulong piya tulun suai osiau do papapanau’d korita toi oloyo ko iyau, nga tulun diri kakal id papapanau dot osonong. Miagal nogi di, iya om tobpinai sopikotumbayaan nu kipomusarahan dit a mogiagal kokomoi pomomoinan, nga kakal kou ngoduo dot tumanud ponontudukan do Baibol.​—Gomponuduk 7:16; Pilipi 4:5.

23. Nunu it kouhup dati’d momili pomomoinan dit osonong?

²³ Nunu it kouhup toko’d momili pomomoinan dit osonong? Kogiiginowoo dit nopinsingubas om tupus kumaa tobpinai-tobpinai kouhup dati’d momili pomomoinan dit osonong. Tantu’d ounsikou toko soira’d ‘momonsoi nunu nopo do popoinggayo’d Kinorohingan.’