2. Kɔngɔ — Watchtower ka BIBLOTƐKI ƐNTƐRƐNƐTI KAN

2. Kɔngɔ

“Kɔngɔ fana bena don.”—MARIKI 13:8.

● Cɛɛ dɔ tagara a yɛrɛ kalifa Quaratadji, Nizɛri dugu dennin dɔ la. A kɔrɔw n’a dɔgɔw ani a somɔgɔ wɛrɛw fana y’u ka dugu bila kɔngɔ kosɔn. Nka a lanin ye nin ye, a kelen n’a kelen, dɛbɛ kan. Mun na a b’a kelen do? Sidi ye o yɔrɔ dugutigi ye. A y’a fɔ ko: “Komi a tɛ sera [k’a ka denbaya] balo tugun, a t’a fɛ a ɲɛɛ ka la u ka tɔɔrɔ kan.”

KOOW BE MUN LO YIRA? Duniɲa kuru bɛɛ kɔnɔ, mɔgɔ wolonfila kan, mɔgɔ kelen ɲɔgɔn tɛ dumuni kɛ ka fa loon o loon. Afiriki mara dɔw yɛrɛ ta ka jugu. O yɔrɔw la, mɔgɔ saba kan, mɔgɔ kelen tɛ dumuni kɛ ka fa wagatijan kɔnɔ. Walisa k’o koo faamu, aw ye miiri k’a filɛ ko denbaya dɔ kɔnɔ, facɛman be yen, bamusoman be yen ani denɲɛnin dɔ b’u fɛ. Dumuni min b’u fɛ, n’o be se ka mɔgɔ fila dɔrɔn lo balo, jɔn lo bena si kɔngɔ la? Facɛman lo wa, bamusoman lo wa, wala denɲɛnin lo? O denbaya mɔgɔw ka ɲi ka o desizɔn ɲɔgɔn lo ta loon o loon.

MƆGƆW KA TELI KA SƆSƆLI JUMAN LO KƐ? Dumunifɛn minw be sɔrɔ dugukolo kan, u be se k’a to bɛɛ be dumuni kɛ ka fa. Mɔgɔw ka ɲi k’u tilan cogo bɛnnin na le dɔrɔn.

TIƝƐN B’U FƐ WA? Tiɲɛn lo ko sisan ka tɛmɛ sanga ni wagati bɛɛ kan, sɛnɛkɛlaw be se ka dumunifɛn caaman sɛnɛ ani k’o lase mɔgɔw ma. Koow sira fɛ, gofɛrɛnɛmanw tun ka ɲi ka dumunifɛnw tilan cogo bɛnnin na walisa ka kɔngɔ ban. Nka a saan caaman ye nin ye u b’u jijara ka kɔngɔ ban ani u ma se k’o kɛ.

E BE MUN LO MIIRI? Min fɔra Mariki 13:8 kɔnɔ, o be dafara wa? Yala kɔngɔ tɛ mɔgɔw tɔɔrɔla duniɲa kuru bɛɛ kɔnɔ, hali k’a sɔrɔ ɲɛtaga sɔrɔla lɔnniko ta fan fɛ wa?

Dugukoloyɛrɛyɛrɛw ni kɔngɔ ka teli ka na ni gwɛlɛya wɛrɛw ye minw b’a yira fana ko an be laban tuma lo la.

[Kumaw ɲɛɛ 5 kan]

“Denmisɛn caaman tun tɛna sa fɔgɔfɔgɔbana, kɔnɔboli ani bana wɛrɛw kosɔn n’u tun be dumuni kɛ ka fa.”—ANN M. VENEMAN, UNICEF ƝƐMINƐBAGA KƆRƆ DƆ.

[Jaa ɲɛɛ 5 kan]