Kalanbagaw ka ɲiningaliw

Yiri min b’a to mɔgɔ be koo ɲuman ni koo jugu lɔn ka bɔ ɲɔgɔn na, Sutana y’a fɔ Awa ye ko n’a y’o deen dumu, a tɛna sa. Miiriya min ye ko niin tɛ sa, yala Sutana tun b’o lo donna Awa kuun na wa?

Ayi. Ala ko Adama ni Awa kana yiri min deen dumu, Sutana m’a fɔ Awa ye ko n’a y’o dumu, a bena sa ani fɛɛn dɔ (dɔw be min weele ko suja) bena bɔ a la ka taga ɲɛnamaya kɛ yɔrɔ wɛrɛ. Sutana tɛmɛna saa fɛ ka min fɔ Awa ye, o ye ko ‘a tena sa’ abada. O kɔrɔ ko a bena to ka ɲɛnamaya diyabɔ dugukolo kan ani ko a mako tɛna kɛ Ala la.​—Zɛnɛzi 2:17; 3:3-5.

Ngalon kalan min ye ko niin tɛ sa, n’o ma daminɛ Edɛn nankɔ kɔnɔ, o daminɛna tuma juman? An t’o wagati tigitigi lɔn. An be min lɔn, o ye ko sanjiba min benna Nuhun ka wagati la, o ye ngalon kalanw bɛɛ tunu. Nuhun n’a ka denbaya dɔrɔn lo kisira ani olu bɛɛ tun ye Jehova batobagaw ye.

O la, kalan min ye ko niin tɛ sa, a be komi o daminɛna sanjiba kɔ le. Babɛli sangaso lɔtuma na, Ala ye mɔgɔw ka kaanw ɲagami ani a y’u jɛnsɛn “dugukolo yɔrɔ bɛɛ la.” Siga t’a la, kalan min ye ko niin tɛ sa, o jɛnsɛnna fana (Zɛnɛzi 11:8, 9). O ngalon kalan daminɛna tuma o tuma, an lanin b’a la k’o bɔra Sutana lo yɔrɔ. Ale lo ye “galon faa” ye ani a ka di a ye k’a ye k’o kalan jɛnsɛnna yɔrɔ bɛɛ.​—Zan 8:44.