Koow Ɲɛnabɔla Jɛkulu Ka Bataki

Saan kɛmɛkulu 21nan daminɛ nin na, a diyara an ye ka bataki ci aw ma “balimaw ka jɛkulu bɛɛ” duniɲa kɔnɔ, ani ka aw fo aw ka sɔbɛ baara kosɔn (1 Piɛre 2:17). A saan 2000 ɲɔgɔn ye nin ye, Yesu ye ɲiningali kɛ ko: “Ni mɔgɔ Dencɛ nana tuma min na, a na dannaya sɔrɔ dugukolo kan wa?” (Luka 18:8). Aw ye baara min kɛ ni kisɛya ye salon, o be Yesu ka ɲiningali jaabi ka gwɛ! Mɔgɔw ye aw dɔw mafiɲɛya ka npara bɔ aw la aw ka lanaya kosɔn. Yɔrɔ caaman na, marifakɛlɛw, balawow, banaw, wala kɔngɔ bɛɛ n’a ta, aw ye muɲuli kɛ (Luka 21:10, 11). A ni ce aw ka wale tilennen kisɛmanw kosɔn. Yesu be se ka “dannaya sɔrɔ dugukolo kan” hali bi. Siga t’a la, ɲagali be yen sankolo la o kosɔn!

An y’a lɔn ko a man nɔgɔ ka muɲuli kɛ. An balimaw be kɔrɔbɔli minw kunbɛnna Azi mara tileben faan fɛ, o filɛ: O jamana na, farinyako minw be lara Jehova Seerew kan, o kɛra delinanko ye. A ma mɛɛn, mɔgɔ 700 ɲɔgɔn tun kafora lajɛnba hɛɛrɛman dɔ kama. Polisiw barila ka cun u kan. Sira datugura mɔgɔ 1300 ɲɛ walisa k’u bali ka lajɛnba dɔ wɛrɛ kɛ. Jama mɔgɔ dɔw y’u ɲɛdaw dogo, u dɔw tun ye polisiw ye, ani u ye lajɛnba kɛyɔrɔ yuguyugu. Minw tun bɔra jamana wɛrɛ ka na o lajɛnba kama, u y’olu caaman bugɔ, ani ka tasuma don lajɛnba kɛyɔrɔ la. Yɔrɔ wɛrɛw la, diinanden juguw ye pɔntiw kɛ berew la ka an balimaw bugɔ cogo farinman na.

O benkanni ɲɔgɔnw be mɔgɔ dusu tiɲɛ kosɔbɛ, nka u tɛ bari an na. Ala ka hakili senu barika la, ciden Pol y’a sɛbɛ ko: “Minw b’a fɛ ka tagama Ala ɲɛsiran na Krisita Yesu la, tugu na kɛ olu bɛɛ la ten ka u tɔɔrɔ.” (2 Tim. 3:12). Saan kɛmɛ fɔlɔ wagati la, kerecɛnw ye kɔrɔbɔliw muɲu: kuma ni farikolo ta faan fɛ. U dɔw fagara yɛrɛ (Kew. 5:40; 12:2; 16:22-24; 19:9). O kelen lo kɛra saan kɛmɛkulu 20nan na. Ani, siga t’a la, a bena to ka kɛ saan kɛmɛkulu 21nan na. Nka Jehova b’a fɔ an ye ko: “Kɛlɛkɛ minan minw be dila i kama, olu bɛɛ na kɛ nafantanw ye.” (Esayi 54:17). Nin ye hakilisigi kuma cɛɲumanbaw ye dɛ! Tiɲɛn na, an ko ka gwɛlɛ Jehova ye fɔɔ a y’a fɔ a ka cira Zakari daa fɛ ko: “Mɔgɔ minw magara aw la, olu magara ne ɲɛkisɛ la.” (Zak. 2:8). Kunnadiya si tɛna Jehova batobagaw ka juguw dɛmɛ ka se sɔrɔ a laban na. Batoli saniman lo bena se sɔrɔ!

Jamana min koo tun fɔra, o kɔnɔ Jehova Seerew ɲagalila ka farankan cayaliba fila sɔrɔ salon. Ɔwɔ, o yɔrɔ la, an balimaw be timinandiya kɔrɔbɔli bɛɛ n’a ta. U fana b’a kɛ ten yɔrɔ bɛɛ la. Salon, duniɲa kuru bɛɛ kɔnɔ, lɔgɔkun o lɔgɔkun mɔgɔ 5066 tun be batise k’a yira k’u ye u yɛrɛkun di Jehova ma. Sisan, o mɔgɔ kuraw cɛsirinen be an gɛrɛ fɛ walisa an bɛɛ “dafalen, jigi sigilen ka to Ala sago bɛɛ la.” —Kolos. 4:12.

Koow yɛlɛmacogo filɛ kɔsa la Gɛrɛsi jamana na. O jamana ka Eglisi kɔrɔman (Orthodoxe) ye bali belebele bila Jehova Seerew seen kɔrɔ kabini saan caaman. Nka sisan, gofɛrɛnɛman sɔnna a la ko Jehova Seerew ye “diinan lɔnnen” ye. O seereya kumaw be sɔrɔ sɛbɛ min kɔnɔ, o sɛbɛ y’a fɔ fana ko Gɛrɛsi ka betɛli ye “yɔrɔ senuman ye min labilara daan na Ala batoli kama.” An nisɔn ka di fana k’a fɔ aw ye ko saan tɛmɛnen kɔnɔ, kitiso dɔw ye kitiw tigɛ ka joo di an ka batoli ma jamana ninw na: Alemaɲi, Buligari, Eta Zini, Irisi (Russie), Kanada, Urumani, Zapɔn. An be barika la Jehova ye kosɔbɛ, a kɛtɔ ka daaw yɛlɛnenw to walisa baara ka kɛ o yɔrɔw la!

Jehova b’a ka jama dɛmɛ cogo min na laban loon ninw na, n’an b’o filɛ, an b’a ye ko a ye teri fisaman ye, min ɲɔgɔn tɛ se ka sɔrɔ. An be jɛnɲɔgɔnya min kɛ n’ale ye, o ye ɲagali sababu ye katugu a b’an kanu, a b’an kalan, ani a b’an kolo. Tiɲɛn na, an ka lanaya be na to ka kɔrɔbɔ. Nka an kɛtɔ ka lanaya lamagabali kɛ Jehova la, o bena an dɛmɛ o kɔrɔbɔliw kɔnɔ. Yakuba y’a sɛbɛ ko: “Ne balimaw, kɔrɔbɔli sifa caman mana aw sɔrɔ, aw ka o jate ɲagaliba sababu ye, k’a dɔn ko muɲuli be bɔ aw ka dannaya kɔrɔbɔli la.” ( Yaku. 1:2, 3). Ka fara o kan, an ka muɲuli b’a yira ko an be Jehova kanu. O be ɲagaliba lase an ma! Balima kanulenw, a’ ye la a la ko Jehova bena an kelen kelen bɛɛ dɛmɛ. N’an tora kantigiya la, siga t’a la, a bena an dɛmɛ ka don duniɲa kura kɔnɔ. A b’a fɛ an ka see sɔrɔ.

O kama, balimacɛw ni balimamusow, denmisɛnw fara mɔgɔ kɔrɔw kan, an be aw jija. Duga cɛɲumanba minw b’an ɲɛ fɛ, a’ ye aw hakili to u la tuma o tuma. An ka ciden Pol ka miirili kɛ an yɛrɛ la. A y’a sɛbɛ ko: “Ne b’a jate ko sisan tɔɔrɔ kow tɛ foyi ye ni u ni sini nɔɔrɔ bɛ suma ɲɔgɔn ma, o nɔɔrɔ min na jira an ko la.” (Rom. 8:18). I mana gwɛlɛya sifa o sifa kunbɛn, i jigi la Jehova kan. Muɲuli kɛ, ani kana a dabila. I tɛna nimisa abada, abada! Ala ka Kuma b’an jigi sigi ko: “Mɔgɔ tilennen na ɲɛnamaya a ka dannaya barika la.” —Hab. 2:4.

A balimaw,

Governing Body of Jehovah’s Witnesses