Aw ka ɲiningaliw jaabiliw

◼ Bɛɛ be se ka mun lo kɛ walisa lamɛnnikɛlaw hakili ka sigi ka kalan lamɛn kafo ka lajɛnw na? (Dut. 31:12)

Jehova ye kafo ka lajɛnw labɛn an kosɔn. Walisa k’a yira ko an be bonyaba la Jehova ni o labɛnw kan, an bɛɛ ka ɲi k’an jija ka na joona lajɛnw na ani an labɛnnen ka sɔrɔ ka kalan a fɛ. Nafa b’a la an ka sigi ɲafɛ ani ka kɔfɛla sigilanw to denbatigiw ye ani minw be na kɔfɛ tuma kelen-kelen. Sanni lajɛnw ka daminɛ, telefɔni selilɛri n’a ɲɔgɔnnaw ka kan ka labɛn walisa u kana lamɛnnikɛlaw hakili ɲagami. Ni bɛɛ be koow kɛ ni bonyaba ye lajɛn kuru bɛɛ la, koo caaman tɛna kɛ ka mɔgɔ hakili ɲagami. Minw bena kɛ fana, u tɛna kɛ koo bɛrɛw ye.—Waaj. 5:1; Fil. 2:4.

Mɔgɔ kura dɔw mana a daminɛ ka na lajɛnw na, kafoden min b’u lɔn, o be se k’a ɲini ka sigi u gɛrɛ fɛ. O bena o tigiw dɛmɛ kosɔbɛ sanko n’u ka kan k’u janto deen fitininw na. Ka na lajɛnw na, o be se ka kɛ koo kura ye o denbaya fɛ. N’o lo, a bena diya u ye kosɔbɛ u ka se ka sigi kɔfɛ yɔrɔ la, yɔrɔ min na u tɛna tɔɔw degun kojugu n’o y’a sɔrɔ u ka kan ka bɔ Masaya Boon kɔnɔ wagati dɔɔni walisa ka taga u ka deen fitininw ladon (Ntal. 22:6, 15). Denbatigiw man kan ka sigi ɲɔgɔn kan dan na, boon ɲɛɛ dɔ wɛrɛ kɔnɔ, yɔrɔ min na denmisɛnw bena a miiri ko a dagalen lo u ka mankan kɛ. Tuma caaman na, a ka fisa denbatigiw ka bɔ Masaya Boon kɔnɔ walisa k’u deenw kolo wala k’u ladon, ani o kɔ, u be sɔrɔ ka segi ka don.

Mɔgɔ kunbɛnbagaw ka baara ye k’a to koo min bɛnnen tɛ batoso kɔnɔ, o kana kɛ. U be denbayaw dɛmɛ u ka sigi yɔrɔ bɛnnen sɔrɔ ani fana mɔgɔ minw be na kɔfɛ tuma kelen-kelen. N’u be mɔgɔw dɛmɛna ka sigiyɔrɔ ɲuman sɔrɔ, u be koow kɛ nɛmɛnɛmɛ walisa u kana tɔɔw hakili ɲagami gwansan. Koo ferekelen dɔ mana bari ka kɛ, u b’o ɲɛnabɔ ni hakili ye. Deen dɔ mana a daminɛ ka koo dɔ kɛ min be tɔɔw hakili ɲagami, mɔgɔ kunbɛnbagaw be se k’a ɲini ka dɛmɛ kɛ ni ɲumanya ye.

Mɔgɔ minw be na lajɛnw na batoli kama, u bɛɛ be se ka dɛmɛ don walisa lamɛnnikɛlaw hakili ka sigi ka lamɛnni kɛ Jehova n’a sagonata koo la. O sagonata ɲɛsinna duniɲa kura tilennen hɛɛrɛman koo ma.—Heb. 10:24, 25.