I k’i bolokuruw sin ni hakili ye
1. Cogo juman na 1 Kɔrɛntekaw 9:26 ɲɛsinna waajuli koo ma?
1 Ciden Pol y’a sɛbɛ ko: “Ne bɛ boli ka ne ɲɛ sinnen to ne ka boli dan yɔrɔ ma. Ne bɛ kɛlɛ kɛ i n’a fɔ bolokuru tulonkɛla, a tɛ i ko ne bɛ fiɲɛ bugɔ.” (1 Kɔr. 9:26). Pol tun be kumana a ka laɲinita koo la, o min tun ye ka baara kɛ Jehova ye bɛrɛbɛrɛ. Nka, o kumaw kɔrɔ jɔnjɔn ɲɛsinna fana waajuli koo ma. An b’a fɛ k’an “bolokuruw” sin ni hakili ye, o kɔrɔ, ka jijali kɛ ni hakilitigiya ye walisa nafa bɛrɛbɛrɛ ka sɔrɔ u la. Cogo di do?
2. An ka ɲi ka waajuli kɛ yɔrɔ juman na ani tuma juman na n’an b’a fɛ ka kerecɛn fɔlɔw ladegi?
2 An ka waajuli kɛ yɔrɔ min na mɔgɔw be sɔrɔ: Pol ni kerecɛn fɔlɔw tun be waajuli kɛ yɔrɔ min na u jigi tun b’a la ka mɔgɔw sɔrɔ (Kɛw. 5:42; 16:13; 17:17). O kama, ni mɔgɔ caaman be sɔrɔ soo wulafɛ an ka kiinw kɔnɔ, n’a sɔrɔ a ka fisa an ka taga soo ni soo o wagati la. Sɔgɔmada fɛ mɔgɔw be taga baara la wala tagama na ani u be kɔsegi soo fitirida fɛ. Yala mobiliw ni takasi gariw fanin be mɔgɔw la o wagatiw la wa? Jagokɛyɔrɔw fanin be mɔgɔw la tuma juman na? N’a sɔrɔ a ka fisa an ka waajuli kɛ siradaw la o wagatiw lo la.
3. An be se k’an bolokuruw sin ni hakili ye cogo di n’an be waajuli kɛra an ka kiinw kɔnɔ?
3 An ka waajuli kɛ kiinw kɔnɔ ni hakili ye: An ka ɲi fana k’an bolokuruw sin ni hakili ye n’an be waajuli kɛra an ka kiinw kɔnɔ. Ɲɛyirali fɛ, n’an ka ca kojugu yɔrɔ kelen na, o bena wagati caaman ta ani jijaliba bena kɛ walisa ka mɔgɔw labɛn ani k’u tilan tilan. O kama, a ka fisa jɛnkuluw ka kɛ fitinin fitininw ye. O cogo kelen na, n’an be waajuli kɛra gɛrɛfɛ duguw la, an bena se k’an seen teliya baara la ani ka sababu caaman sɔrɔ ka kuma mɔgɔw fɛ ni jɛnkuluw man bon bon kojugu. Walisa ka wagati kunmabɔ, an be se ka waajuli kɛyɔrɔ dɔ deli an ka soo gɛrɛfɛ.
4. Mun lo bena an dɛmɛ an ka kɛ ‘mɔgɔ ɲinina’ ŋanaw ye?
4 Yesu ye waajulikɛlaw suma ni “mɔgɔ ɲininaw ye.” (Marka 1:17). Mɔnikɛla ka laɲinita tɛ ka jɔɔ fili jii la dɔrɔn, nka a b’a fɛ ka jɛgɛw minɛ le. O kama, mɔnikɛla ŋana jigi b’a la ko a bena jɛgɛw sɔrɔ yɔrɔ min na ani tuma min na, a be taga yen le ani a be sin ka mɔni kɛ. Tiɲɛn na, a be jijali kɛ ni hakili ye. An fana k’o jijali ɲɔgɔn kɛ an ka waajuli baara la.—Heb. 6:11.