Baro dadoncogo min be ɲɛɛ i bolo, baara kɛ n’o ye

1. Kerecɛn fɔlɔw bɛɛ ka baro dadoncogo tun tɛ kelen ye. An be kalan juman sɔrɔ olu fɛ?

¹ Kerecɛn fɔlɔw tun be kibaro diiman fɔ mɔgɔ sifaw bɛɛ ye minw bɔyɔrɔw n’u ka diinanw tɛ kelen ye (Kol. 1:23). Hali n’u bɛɛ tun be kibaro kelen lo fɔ, o min ye Ala ka Masaya kibaro ye, u tun b’u ka baro dadoncogo yɛlɛma ka kɛɲɛ n’u lamɛnbagaw cogoya ye. Ɲɛyirali fɛ, baro kɛtɔ ni Yahutuw ye, Piɛrɛ y’a daminɛ ni kira Joɛl ka kumaw ye sabu Yahutuw tun be bonyaba la Bibulu kan (Kɛw. 2:14-17). Nka, Kɛwalew 17:22-31 kɔnɔ, i k’a kɔrɔsi cogo min na Pol ye hakili jagabɔ kɛ ni Grɛkiw ye. Bi, kiin dɔw kɔnɔ, mɔgɔw be bonya la Bibulu kan ani an tɛ sigasiga ka Bibulu kofɔ u ye n’an be waajuli kɛra soo ni soo. Nka dɔw t’u mako don Bibulu koo la wala diinan koo la. Dɔw yɛrɛ tɛ kerecɛn diinan kɔnɔ. N’an be kumana o ɲɔgɔnna mɔgɔw fɛ, an ka ɲi ka hakili sɔrɔ.

2. Minw be bonya la Bibulu kan ani minw t’o kɛ, an be se k’olu dɛmɛ cogo di n’an ka gafew ye an be minw yirala kalo kɔnɔ?

² An be gafe min yirala mɔgɔw la, baara kɛ n’o ye bɛrɛbɛrɛ: Waajulibaara saan nin na, an bena gafe min yira mɔgɔw la, o bena to ka yɛlɛma kalo fila fila. O bena kɛ zurunaliw, sɛbɛninw wala kitabuninw ye. Hali n’an ka kiinmɔgɔw man teli k’u mako don Bibulu koo la, an bele be se ka fɛɛn dɔ yira u la min ɲɛsinna u makoya ma. Siɲɛ fɔlɔ la, n’a sɔrɔ an tun ma se ka vɛrise dɔ kalan wala ka Bibulu kɔnɔ kumaw fɔ mɔgɔ dɔ ye. Nka n’a tigi tun y’a mako don, an k’a ɲini ka taga a dɛmɛ a k’a ka limaniya barika bonya Danbaga ni Bibulu koo la. Faan wɛrɛ fɛ, ni kiinmɔgɔw be bonya la Bibulu kan, an ka sin k’a kɔnɔ kumaw kalan u ye ani ka gafe dɔw yira u la minw be kuma Bibulu koo la. Tiɲɛn na, an be se ka gafe nunu yira mɔgɔw la tuma bɛɛ: Bibulu ka kalan, Mɛnni kɛ Ala fɛ wala Mɛnni kɛ Ala fɛ ani to niin na fɔɔ abada. An k’o kɛ hali n’an be gafe wɛrɛ lo yirala mɔgɔw la o kalo la. Min kɔrɔtanin lo, o ye ka baro dadon cogo dɔ la min be mɔgɔw lasun u k’u mako don.

3. Kɔrɔ juman na an ka kiinmɔgɔw dusukun cogoya be i n’a fɔ dugukolo?

³ Mɔgɔw dusukun cogoya labɛn: Adamaden dusukun cogoya bɔnin be dugukolo ma kosɔbɛ (Luka 8:15). I ko dugukolo, dɔw dusukun ka kan ka labɛn koɲuman fɔlɔ, Bibulu ka tiɲɛn kumaw be sɔrɔ ka falen ani ka bonya. Kerecɛn fɔlɔw sera ka Bibulu ka tiɲɛn kumaw don mɔgɔ sifaw bɛɛ dusukun na. O baara y’u wasa ani k’u ninsɔndiya (Kɛw. 13:48, 52). An fana be se ka sanga sɔrɔ n’an b’an janto an ka baro dadoncogo la.