I k’i ka baaraba diya bɔ
1. Mun lo be se k’a to dɔ be bɔ an ka kisɛya la?
1 Ala tun ye adamaden dan walisa a ‘k’a ka baaraba diya bɔ’ (Waaj. 2:24, ABBF). Nka n’an ɲɛɛ tɛ an ka waajuli baara nafa la, farifaga be se k’a to an dusu be tiɲɛ ani dɔ be bɔ an ka kisɛya la. Mun lo be se k’an dɛmɛ an ka to ka koow filɛ ni ɲɛɛ ɲuman ye?
2. Mun na an man kan k’an jigi la a kan ko mɔgɔw bɛɛ bena sɔn an ka waajuli baara ma?
2 Koow filɛ k’a dama kɛɲɛ: An k’an hakili to a la ko mɔgɔ caaman ma sɔn Yesu ka kibaro ma. O bɛɛ n’a ta, a ka waajuli baara ye sanga sɔrɔ, siga t’o la (Yuh. 17:4). Yesu tun ye ntalen dɔ la sɛnɛkɛla koo la k’a yira ko mɔgɔw fanba tun tɛna sɔn Masaya kibaro ma o min be i n’a fɔ sumankisɛ (Mat. 13:3-8, 18-22). O bɛɛ n’a ta, an be jijali min kɛ, nafaba b’o la.
3. An be se ka “den kɛ” cogo di hali ni mɔgɔ bɛrɛ tɛ sɔn an ka waajuli ma?
3 An be deen caaman kɛ cogo min na: Ka kɛɲɛ ni Yesu ka ntalen ye, minw be sɔn Masaya kibaro ma, olu be “den caman kɛ” (Mat. 13:23). Ɲɔkisɛ mana falen ka bonya, a kala be deen minw kɛ o tɛ ɲɔɔ kala misɛnw ye dɛ, nka ɲɔkisɛ kuraw lo. O kama, kerecɛn minw be sanga sɔrɔ waajuli la, olu be deen minw kɛ, waajibi tɛ o ka kɛ kalanden kuraw ye. Nka u be deen minw kɛ, o ye ka Masaya kisɛ caaman dan waajuli la. O la, an b’an ka “baara diya bɔ” ani ka wasa hali ni mɔgɔw tɛ mɛnni kɛ an fɛ. An b’an niin don Jehova tɔgɔ saniyanin koo la (Es. 43:10-12; Mat. 6:9). An be ni nɛɛma ye ka kɛ Ala ka baarakɛɲɔgɔnw ye, o min be an ninsɔndiya (1 Kɔr. 3:9). Ka Jehova “tɔgɔ tanu an da la” o cogo la, o ka di a ye kosɔbɛ.—Heb. 13:15, 16.
4. Tɔnɔ juman be se ka sɔrɔ an ka waajuli baara la an ɲina ma?
4 Ka fara o kan, an be baara gwɛlɛ min kɛra, tɔnɔ be se ka sɔrɔ o la an ɲina ma. Minw bɛɛ ye Yesu ka waajuli lamɛn, n’a sɔrɔ u dɔw ma kɛ a ka kalandenw ye ka Yesu to dugukolo kan. O cogo kelen na, an be Masaya kisɛ minw dan, n’a sɔrɔ u tɛna falen ka bonya mɔgɔ dusu la joona. Nka kɔfɛ, o tigi be se ka tiɲɛn sira ta an ɲina ma. Tiɲɛn na, nafaba be sɔrɔ an ka waajuli baara la. O kama, an ka “den caman kɛ” ani k’a yira ko an ye Yesu ka kalandenw ye.—Yuh. 15:8.