Bɛɛn sigi i n’i balima cɛ fɔlɔ: O kɛcogo

Miiri k’a filɛ: I be Galile mara la, Yezu ka wagati la. I tagara Zeruzalɛmu walisa ka Gwatakɔrɔsigi seli kɛ. Ala sagokɛla caaman bɔra yɔrɔjan ka na. I b’a fɛ ka saraka bɔ Jehova ye. O kama, i b’a daminɛ ka tɛmɛ jamaba cɛma Zeruzalɛmu siraw kan n’i ka baa ye i bolo. I be tagara Alabatosoba lo kɔnɔ. I sera tuma min na, i b’a ye ko mɔgɔ caamanba nana fana Alabatoso kɔnɔ walisa ka saraka bɔ. Sisan, ele lo ka ɲi k’i ka baa di sarakalasebagaw ma. O yɔrɔnin bɛɛ, i hakili jigira ko i balima dɔ diminin lo i kɔrɔ. N’a sɔrɔ a be jamaba cɛma wala a be yɔrɔ wɛrɛ la dugu kɔnɔ. Yezu y’a yira i ka ɲi ka min kɛ (Matiyo 5:24 kalan). I y’i balima min hakɛ ta, ele n’ale be se ka Yezu ka ladiliw sira tagama cogo di walisa ka bɛɛn sigi aw ni ɲɔgɔn cɛ? Kɛcogo dɔw kofɔra jukɔrɔ. Nɔɔ bila kɛcogo ɲuman yɔrɔ la.

I KA ƝI KA . . .

• kuma i balima fɛ n’i b’a miiri ko joo b’a fɛ ka dimi i kɔrɔ

• a ɲini k’i balima ka miiriya latilen n’i b’a miiri ko a be dimi joona ani ko ale fana niin b’o koo la

• i balima lamɛn koɲuman n’a be kumana. Hali n’i t’a faamu ka ɲɛ, a fɔ a ye ko a ka yafa i ma n’i donna a gasi la. A fɔ a ye ko i ma tugu k’o kɛ

I BALIMA KA ƝI KA . . .

• a fɔ kafomɔgɔw ye cogo min na i donna a gasi la walisa u ka tiɲɛn d’a ma

• sɔngɔ i kun na, ka segi koo fitinin fitinin bɛɛ kan ani k’a ɲini i fɛ i ka sɔn i ka fili ma

• a faamu ko i ye i majigi ani k’i jaa gwɛlɛya ka na bɔ a ye ani a ka ɲi ka yafa i ma n’a dusu bɛɛ ye

Hali n’an tɛ bɛgɛnw saraka bi, Yezu y’a yira cogo di ko n’an b’a fɛ Ala ka sɔn an ka batoli ma, fɔɔ an ka kɛ hɛɛrɛ la n’an balimaw ye?