Duniɲa kura, Ala ye min layidu ta

BIBULU, Ala ka Kuma min sɛbɛra, o be jigiya di an ma, a kɛtɔ k’a fɔ ko: “An bɛ sankolo kura ni dugukolo kura makɔnɔ ka kɛɲɛ ni Ala ka layidu ye, tilennenya na sigi olu kɔnɔ.”—2 Piɛre 3:13.

“Sankolo kura” ye mun ye? Bibulu be sankolo suma ni kuntigiya ye (Kɛwalew 7:49). “Sankolo kura” ye gofɛrɛnɛman kura ye, min bena dugukolo mara. A kuraman lo, sabu a bena bi duniɲa ka kuntigiyaw bɔ yen ka sigi u nɔɔ na. A fana ye koo kura ye Ala ka sagonata dafali koo la. Yesu ye an kalan an ka delili kɛ Masaya min koo la, o lo (Matiyu 6:10). Komi Ala lo y’a sigi sen kan, ani Ala sigilen be sankolo la, o kama u b’a weele ko “sankolola masaya”—Matiyu 7:21.

“Dugukolo kura” ye mun ye? Dugukolo kura yɛrɛ yɛrɛ tɛ, sabu Bibulu b’a fɔ ka gwɛ ko mɔgɔw bena sigi dugukolo kan fɔɔ abada. “Dugukolo kura” ye hadamadenw jɛnkulu kura dɔ ye. A bena kɛ kuraman ye, sabu mɔgɔ juguw tɛna kɛ yen (Ntalenw 2:21, 22). O tuma la, mɔgɔw bɛɛ bena Danbaga bonya ka kolo a ye. Ani, u bena ɲɛnamaya kɛ ka kɛɲɛ n’a ka koo waajibiyalenw ye (Zaburuw 22:28). U b’a ɲinina siya mɔgɔw bɛɛ fɛ u k’o koo waajibiyalenw kalan, ani u k’u ka ɲɛnamaya kɛcogo yɛlɛma ka kɛɲɛ n’u ye. Yala i b’o lo kɛra wa?

Ala ka duniɲa kura kɔnɔ, bɛɛ bena Ala ka kuntigiya bonya. Yala Ala kanu b’i lasun i k’a kaan minɛ wa? (1 Yuhana 5:3). Yala o be ye i ka soo kɔnɔ wa? i ka baarakɛyɔrɔ la wala lakɔliso wa? i ka ɲɛnamaya kɛcogo la wa?

O duniɲa kura kɔnɔ, hadamadenw bena kɛ kelen ye tiɲɛn Ala batoli la. Yala i be sankolo ni dugukolo Danbaga bato wa? Yala i ka batoli be ile kɛ kelen ye ni batobaga wɛrɛw ye, minw be bɔ jamanaw ni siyaw ni kaanw wɛrɛw la wa?—Zaburuw 86:9, 10; Esayi 2:2-4; Sofoni 3:9.

[Koorilen ɲɛɛ 17 kan]

Ala min ye o koow layidu ta

A ye sankolo ni dugukolo Danbaga ye. Yesu y’a kofɔ i ko “Ala sɛbɛ kelenpe.”—Yuhana 17:3.

Hadamaden caamanba be batofɛnw bonya, olu yɛrɛw ye minw dilan. Mɔgɔ miliyɔn caaman be biri jaaw kɔrɔ, minw ɲɛnaman tɛ. Hadamadenw ye labɛn minw sigi sen kan, wala u be kalan min di bololafɛnw koo la, dɔw b’o lo tando. Dɔw wɛrɛw b’u yɛrɛw negew lo tando. Hali minw b’a fɔ k’olu ka batoli basiginen be Bibulu kan, Bibulu be mɔgɔ min kofɔ i ko “[tiɲɛn] Ala”, u bɛɛ t’a tɔgɔ bonya.—Dutɛrɔnɔmɛ 4:35.

Danbaga b’a fɔ a yɛrɛ koo la ko: “Ne ye Jehova de ye, o ye ne tɔgɔ ye.” (Esayi 42:5, 8, A.B.U, 1961). O tɔgɔ be sɔrɔ siɲɛ 7 000 ɲɔgɔn Bibulu kɔnɔ: a sɛbɛra kaan fɔlɔ minw na. Yesu y’a ka kalandenw dege u ka delili kɛ ko: “An Fa min bɛ sankolo la, i tɔgɔ ka saniya.”—Matiyu 6:9.

Jogo sifa jumanw be tiɲɛn Ala la? A b’a yɛrɛ cogoya lakali i ko “makaritigi, hinɛtigi Ala. A tɛ dimin joona. A ka ɲumaya ni a ka kantigiya ka bon.” Nka minw be tugu k’a ka cikanw tiɲɛ, cogo si la, a tɛ u to n’a m’u kolo (Ekisode 34:6, 7). A ye hadamadenw minɛ cogo min na fɔlɔ la, o b’a yira k’o lakalita ye tiɲɛn ye.

O tɔgɔ nin, ani o tɔgɔ be mɔgɔ min yɛrɛ kan, u fila bɛɛ ka kan ka saniya: O kɔrɔ, an ka kan k’u jati senumanw ye. Komi a ye Danbaga ye ani duniɲa kuru bɛɛ Masaba ye, a ka kan n’an ka kanminɛli n’an ka batoli ye. Yala ile kɔni be kolo a ye, ani i b’a bato wa?

[Koorilen/Jaa ɲɛɛ 18 kan]

“Sankolo kura ni dugukolo kura” bena na ni yɛlɛmani jumanw ye?

Dugukolo bena yɛlɛma ka kɛ alijɛnɛ ye Luka 23:43

Bana, dimi, saya tɛna kɛ yen tugun Esayi 25:8; Jirali 21:1, 4

[Koorilen/Jaa ɲɛɛ 19 kan]

Yala o layiduw bena i nafa wa?

Ala tɛ se ka ngalon tigɛ!—Tite 1:2.

Jehova b’a fɔ ko: “Ne ka kuma [. . .] tɛna kɔsegin ne ma sani a ka ne sago kɛ k’a dafa, ka ne ka ci fɔlenw kɛ.”—Esayi 55:11.

Jehova be “sankolo kura ni dugukolo kura” danna ka ban. Sankolola gofɛrɛnɛman be baara la ka ban. “Dugukolo kura” juu sigira ka ban.

“Sankolo kura ni dugukolo kura” bena koo cɛɲumanba minw kɛ hadamadenw ye, Jirali ka kitabu b’u yira. O kɔ, a be Ala, duniɲa bɛɛ Masaba, ka dalakumaw fɔ ko: “A filɛ! Ne bɛ fɛn bɛɛ kɛ kura ye.” A b’a fɔ fana ko: “I ka sɛbɛnni kɛ, katuguni nin kumaw ye kuma jɛlenw ye, kuma sɛbɛw don.”—Jirali 21:1, 5.

Koo min kɔrɔtalen be, o ye nin de ye: Ne ka kan ka yɛlɛmani kɛɲɛnen minw kɛ, yala ne b’u kɛra walisa u k’a jati ko ne ka kan ni “dugukolo kura” ye “sankolo kura” jukɔrɔ wa?