A kɛra kantigi ye, kɔrɔbɔliw bɛɛ n’a ta

1, 2. Ka Yezu to kuma na Kapɛrnaum, n’a sɔrɔ Piyɛri jigi tun be mun lo la? Nka mun lo kɛra?

PIYƐRI hamiyanin ye Yezu lamɛnbagaw ɲɛdaw filɛ. U tun be Kapɛrnaum batoso kɔnɔ. Piyɛri tun siginin be o dugu kɔnɔ. A tun b’a ka mɔni baara kɛ o yɔrɔ la, Galile baji daa la Saheli fan fɛ. A teriw, a somɔgɔw, a ka baarakɛɲɔgɔnw n’a ka kiliyan caaman fana tun siginin be o dugu kɔnɔ. N’a sɔrɔ Piyɛri jigi tun b’a la ko Kapɛrnaum mɔgɔw bena sɔn a ma ko Yezu ye Masiya ye. A tun b’a miiri fana ko a bena diya u ye kosɔbɛ ka kalan sɔrɔ Ala ka Masaya koo la o karamɔgɔba fɛ min ɲɔgɔn tɛ yen. Nka, a ma kɛ ten.

² U caaman ma sɔn ka Yezu lamɛn tugun. Dɔw y’a daminɛ ka ŋunuŋunu ani ka sɔsɔli kɛ. Yezu ka kalanden dɔw ye min kɛ o sen fɛ, o yɛrɛ lo ye Piyɛri hakili ɲagami ka tɛmɛ. U ɲɛdaw cogoya tun b’a yira ko Yezu tun be u kalanna tiɲɛnko minw na, o tun man di u ye tugun. A be komi u kɔnɔ gwanna ani u dusu dimina yɛrɛ. Dɔw y’u kaan wuli, u ko Yezu ka kuma be mɔgɔ tɔɔrɔ. Komi u tun t’a fɛ k’o kuma mɛn tugun, u bɔra batoso kɔnɔ, ani u ma sɔn ka tugu Yezu kɔ tugun.—Zan 6:60, 66 kalan.

3. Piyɛri ka limaniya y’a dɛmɛ ka mun lo kɛ siɲɛ caaman na?

³ O kɛra wagati gwɛlɛ ye Piyɛri ni ciden tɔɔw fɛ. Yezu ye min fɔ o loon na, Piyɛri m’o bɛɛ faamu. N’a sɔrɔ a y’a ye ko Yezu ka kumaw be se ka mɔgɔ tɔɔrɔ n’i m’u kɔrɔ faamu. Piyɛri bena mun lo kɛ do? A tun be kantigiya min kɛ a Matigi ye, o tun be kɔrɔbɔra. A siɲɛ fɔlɔ tun tɛ, ani o tun tɛna kɛ a laban ye fana. O kɔrɔbɔliw bɛɛ n’a ta, Piyɛri tora kantigiya la. An k’a filɛ cogo min na a ka limaniya y’a dɛmɛ ka kantigiya kɛ.

A kɛra kantigi ye hali k’a sɔrɔ tɔɔw bɔra Yezu kɔ

4, 5. Yezu ka kokɛcogo jumanw lo barila jama na?

⁴ Yezu ka kumaw n’a ka kɛtaw ye Piyɛri kabakoya siɲɛ caaman na. Yezu kumana ani a ye koow kɛ cogo dɔ la min barila mɔgɔw la siɲɛ caaman na. Kunu dɔrɔn, Yezu tun ye kabako dɔ kɛ ka mɔgɔ waa caaman balo. O kosɔn, u tun b’a fɛ k’a kɛ masacɛ ye. Nka a ye min kɛ, o barila mɔgɔ caaman na: A y’a mabɔ u la ani a ko a ka kalandenw ka don kurun kɔnɔ ka taga Kapɛrnaum. K’u to Galile baji kan sufɛ, Yezu ye koo dɔ kɛ min barila u la tugun: a tagamana jikuruw kan. O koo sen fɛ, a ye Piyɛri dɛmɛ ka ladili barikaman sɔrɔ limaniya koo la.

⁵ Sɔgɔma, a ma mɛɛn, u y’a ye ko jama ye kurunw ta ka tugu u kɔ. A gwɛnin lo ko jama tun b’a fɛ Yezu ka kabako kɛ tugun k’u balo, Yezu ka kalan tun tɛ u ɲɛnako ye. O kosɔn, Yezu y’u kɔrɔfɔ sabu u tun be miiri bololafɛnw koo la ka tɛmɛ Alakow kan (Zan 6:25-27). U ye sɔsɔli kɛ fɔɔ ka taga don Kapɛrnaum batoso kɔnɔ. O yɔrɔ la, Yezu ye tiɲɛnko nafaman dɔw fɔ minw faamuyali man nɔgɔ. O kalan ma bɛn jama ma tugun.

6. Yezu ye ɲɛyirali juman fɔ? Jama y’o ta cogo di?

⁶ Yezu tun t’a fɛ mɔgɔw ka tugu ale kɔ dɔrɔn sabu see b’a ye k’u balo. Nka, a tun b’a fɛ u k’a faamu ko Ala bena ɲɛnamaya banbali di u ma n’u limaniyara ale ka saraka la ani n’u sɔnna ka kɛ ale ka kalandenw ye. Walisa k’u dɛmɛ u k’o faamu, a y’a yɛrɛ suma ni maanɛ ye. O ye buru ye min jigira ka bɔ sankolo la Musa tile la. Mɔgɔw tora ka sɔsɔli kɛ. O kama, a y’a ɲɛfɔ ɲɛyirali barikaman dɔ fɛ ko n’i ma ale farisogo dumu ani k’ale joli min, i tɛ se ka ɲɛnamaya sɔrɔ. A y’o fɔ minkɛ, jama dimina kosɔbɛ. Dɔw ko: “A ka kuma nunu ka gwɛlɛ dɛ! Jɔn be se ka sɔn o ma?” Yezu ka kalanden caaman yɛrɛ y’a latigɛ ka bɔ a kɔ.a—Zan 6:48-60, 66.

7, 8. a) Piyɛri tun ma mun lo faamu fɔlɔ Yezu koo la? b) Yezu ye ɲiningali min kɛ cidenw ye, Piyɛri y’o jaabi cogo di?

⁷ Piyɛri tun bena mun lo kɛ do? N’a sɔrɔ Yezu ka kumaw y’ale fana hakili ɲagami. A tun m’a faamu fɔlɔ ko Yezu ka kan ka sa walisa ka Ala sago dafa. Yala a tun be Piyɛri kɔnɔ ka bɔ Yezu kɔ i ko kalanden tɔɔ minw ma lɔ kelen kan wa? Ayi! Piyɛri tun be ni jogo ɲuman ye min b’a to ale ni tɔɔw tɛ kelen ye. O tun ye jogo juman lo ye?

⁸ Yezu y’a ɲɛɛ yɛlɛma a ka cidenw fan fɛ ani a ko: “Aw fana b’a fɛ ka taga wa?” (Zan 6:67). A kumana ni ciden 12 ye, nka Piyɛri lo y’a kaan wuli k’a jaabi. Ale lo tun ka teli ka kuma tɔɔw ɲɛ. N’a sɔrɔ a tun ye u bɛɛ kɔrɔ ye. A ka kɛ cogo o cogo, Piyɛri lo tun ka teli ka kuma ni kɔnɔgwɛ ye ka tɛmɛ tɔɔw kan. A be komi, a tun tɛ sigasiga k’a kɔnɔnako fɔ. Tuma min na Yezu ye ɲiningali kɛ, min tun be Piyɛri kɔnɔ, a y’o fɔ. A ye kuma ɲuman dɔ fɔ mɔgɔ tɛ ɲinɛ min kɔ. A ko: “Matigi, an na taa jɔni yɔrɔ? Ɲɛnamaya banbali kumaw bɛ sɔrɔ e de fɛ.”—Zan 6:68, ABM.

9. Piyɛri ye kantigiya kɛ Yezu ye cogo di?

⁹ Piyɛri ka kumaw tɛ e dusu minɛ wa? Piyɛri tun limaniyanin lo Yezu la. O y’a dɛmɛ ka jogo nafamanba dɔ ta min ye kantigiya ye. Piyɛri y’a faamu ka ɲɛ ko Jehova ma Kisibaga wɛrɛ ci Yezu kɔ. A y’a faamu fana ko Yezu be kalan min kɛ Ala ka Masaya koo la, o lo be mɔgɔ dɛmɛ ka kisili sɔrɔ. A tun b’a lɔn ko hali ni koo dɔw b’a hakili ɲagami, tagayɔrɔ wɛrɛ tun t’a fɛ n’a b’a fɛ ka Ala dusu diya ani ka ɲɛnamaya banbali sɔrɔ.

10. Bi, an be se ka Piyɛri ka kantigiya ɲɔgɔn ladegi cogo di?

¹⁰ Yala e fana tɛ o lo miiri wa? Bi, mɔgɔ caaman b’a fɔ ko u be Yezu kanu, nka u tɛ kantigiya kɛ a ye. N’an b’a fɛ ka kantigiya kɛ Yezu ye sɔbɛ la, fɔɔ an ka sɔn a ka kalanw ma i ko Piyɛri y’a kɛ cogo min na. An ka kan k’o kalanw sɛgɛsɛgɛ, k’u kɔrɔ faamu ani k’u sira tagama hali n’u b’an hakili ɲagami wala n’u ma bɛn an ma. Yezu b’a fɛ an ka ɲɛnamaya banbali min sɔrɔ, an tɛ se k’o sɔrɔ n’an ma kantigiya kɛ.—Zaburuw 97:10 kalan.

A ye kantigiya kɛ hali k’a sɔrɔ Yezu y’a kolo

11. Yezu tagara n’a ka kalandenw ye min?

¹¹ O sɔsɔli tɛmɛnin kɔ, a ma mɛɛn, Yezu n’a ka cidenw n’a ka kalanden dɔw ye tagamajan dɔ kɛ ka taga Saheli fan fɛ. K’i to Galile baji daa la, i ɲɛɛ be Ɛrɛmɔn kulu la, nɛzi fanin b’a kun na tuma dɔw la. O kulu tun be layidu jamana daan na Saheli fan fɛ. Yezu n’a ka kalandenw tora ka tagama ka panti dɔ yɛlɛ ka taga dugu dɔw la Sezare Filipi mara la. U gwɛrɛtɔ dɔɔni dɔɔni, u tun be se ka Ɛrɛmɔn kulu ye ka ɲɛ sisan. Layidu jamana faan min be worodugu fan fɛ, u ɲɛɛ b’o la fana. K’u to Sezare Filipi mara la, o yɔrɔ cɛɲumanba nin na, Yezu ye ɲiningaliba dɔ kɛ u ye.

12, 13. a) Mun na Yezu y’a ka kalandenw ɲininga ko “mɔgɔw b’a fɔra ko ne ye jɔn ye”? b) Piyɛri ye kuma minw fɔ Yezu ye, u b’a yira cogo di ko limaniya sɔbɛ b’a la?

¹² A ko: “Mɔgɔw b’a fɔra ko ne ye jɔn ye?” Miiri k’a filɛ: Piyɛri ye Yezu ɲɛda filɛ furututu, ani a y’a ye ko a Matigi ye mɔgɔ ɲuman ye min hakili ka bon kosɔbɛ. Mɔgɔw ɲɛɛ lara min kan ani u ye min mɛn Yezu fɛ, Yezu tun b’a fɛ k’a lɔn u be min miiri o koo la. Mɔgɔw be ni ngalon miiriya minw ye Yezu koo la, a ka kalandenw ye u dɔw fɔ a ye. Nka, Yezu t’a fɛ ka dan o ma. Yala a ka kalandenw fana be n’o ngalon miiriyaw lo ye wa? A y’u ɲininga ko: “Aw do, aw b’a miiri ko ne ye jɔn ye?”—Luka 9:18-20.

¹³ Yan fana, Piyɛri teliyara k’a jaabi. Miiriya min tun be tɔɔw kɔnɔ, Piyɛri y’a jaa gwɛlɛya k’o fɔ ka gwɛ. A ko: “I ye Krisita, Ala ɲɛnama Denkɛ de ye.” Miiri k’a filɛ: Yezu ye yɛlɛmisɛn dɔ kɛ ani a ye Piyɛri tando ni dusudiya ye. A ye Piyɛri hakili jigi ko mɔgɔ minw be ni limaniya sɔbɛ ye, Jehova Ala lo y’a to u y’o kuma faamu ka ɲɛ, adamaden tɛ. Nin tun ye tiɲɛn kuma nafamanba ye Jehova ma deli ka min bɔ kɛnɛ kan, ani Piyɛri sera k’o faamu. Layidu tara Masiya wala Krista min koo la kabi wagatijan, Piyɛri sera k’o tigi lɔn.—Matiyo 16:16, 17 kalan, ABM.

14. Yezu ye nɛɛmaba juman kalifa Piyɛri ma?

¹⁴ Galen, kiraw tun ye ale Krista kofɔ ko a be komi kabakuru, bonlɔlaw banna min na (Zab. 118:22; Luka 20:17). Yezu tun kaan be o kiraya kumaw lo ma tuma min na a ko Jehova bena kerecɛn kafo juu sigi o kabakuru wala farakurun lo kan. Piyɛri sera k’a lɔn ko o kabakuru ye Krista lo ye. Yezu ye nɛɛma baarabaw kalifa Piyɛri ma o kerecɛn kafo kɔnɔ. A ma Piyɛri kɛ ciden tɔɔw ɲɛmɔgɔ ye i ko dɔw b’a miiri cogo min na. Nka, a ye kunkanbaaraw lo kalifa a ma. A ye “masaya konnɛgɛw” di Piyɛri ma (Mat. 16:19, ABM ). Nɛɛma tun dira Piyɛri ma ka Ala ka Masaya donda yɛlɛ jɛnkulu sifa saba ye. A fɔlɔ: Yahutuw. A filanan: Samarikaw. A laban: siya tɔɔw.

15. Mun lo y’a to Piyɛri ye Yezu kɔrɔfɔ, ani a ye mun lo fɔ a ye?

¹⁵ Nka kɔfɛ, Yezu y’a fɔ ko fɛɛn caaman dira mɔgɔ min ma, u bena caaman ɲini o tigi fɛ. Fɛɛn caaman do dira Piyɛri ma (Luka 12:48). Yezu tora ka tiɲɛn kuma nafamanbaw ɲɛfɔ Masiya koo la. Ɲɛyirali fɛ, a ko yanni dɔɔni, ale bena tɔɔrɔ ka sa Zeruzalɛmu ani foyi tɛ se k’o bali. O kumaw ye Piyɛri hakili ɲagami. A tagara ni Yezu ye gɛrɛn na k’a kɔrɔfɔ ko: “Matigi, Ala k’i kisi o koow ma. O tena i sɔrɔ.”—Mat. 16:21, 22.

16. Yezu ye Piyɛri kolo cogo di? An bɛɛ be se ka ladili nafaman juman sɔrɔ Yezu ka kumaw na?

¹⁶ Siga t’a la, Piyɛri y’o kumaw fɔ ni ŋaniya ɲuman ye. O kama, Yezu ka kumaw barila a la. Yezu y’a kɔɔ di Piyɛri ma k’a ka kalanden tɔɔw filɛ. N’a sɔrɔ olu ni Piyɛri ka miiriya tun ye kelen ye. Yezu ko Piyɛri ma: “Taa ka bɔ ne kɔrɔ, Sitanɛ. I ye ne kunnatiɲɛnni fɛn ye, katuguni i ka miiriliw tɛ Ala ka kow la, fɔ mɔgɔw ka kow.” (Mat. 16:23; Mariki 8:32, 33, ABM ). Yezu ye min fɔ Piyɛri ye, an bɛɛ be se ka ladili nafaman sɔrɔ o la. An ka teli k’a to adamadenw ka miiriya k’an kuun minɛ ka tɛmɛ Ala ka miiriyaw kan. O lo kama, n’an b’a fɛ ka mɔgɔ dɔ dɛmɛ, n’an ma an yɛrɛ kɔrɔsi, an be se k’a tigi jija a ka Sutana sago kɛ sanni ka Ala sago kɛ. Piyɛri ye Yezu ka kololi ta cogo di?

17. Yezu y’a fɔ Piyɛri ma ko “taa ka bɔ ne kɔrɔ, Sitanɛ.” O kɔrɔ ko di?

¹⁷ Piyɛri b’a lɔn ko Yezu t’a miirila ko ale ye Sutana Naafigi ye yɛrɛ yɛrɛ la. Yezu tun ye min fɔ Sutana ma, a m’o ɲɔgɔn fɔ Piyɛri ma tiɲɛn na. Yezu tun ye Sutana gwɛn ka bɔ a yɛrɛ kɔrɔ (Mat. 4:10). Nka, a ma ban Piyɛri la. A ɲɛɛ tun be Piyɛri ka jogo ɲuman caaman na. Nka, nin koo nin na, a ye Piyɛri kolo sabu a ka miiriyaw tun man ɲi. Piyɛri tun ka kan k’a faamu ko ale man kan ka kɛ sentalonfɛn ye a Matigi ɲɛfɛ, nka a ka kan ka tugu Yezu kɔ ka kɛ a dɛmɛbaga ye.

18. Piyɛri y’a yira cogo di ko a ye kantigi ye? An be se k’a ladegi cogo di?

¹⁸ Yala Piyɛri ye joo di a yɛrɛ ma, yala a dimina wala a y’a ɲɛɛ sisi wa? Ayi. A y’a yɛrɛ majigi ka sɔn kololi ma. O cogo la, a ye kantigiya kɛ tugun. Yezu ka kalandenw bɛɛ ka ɲi ni kololi ye tuma dɔw la. N’an b’a fɛ ka to k’an magwɛrɛ Yezu Krista n’a Faa Jehova Ala la, fɔɔ an k’an majigi ka sɔn kololi ma ani k’a to a k’an nafa.—Talenw 4:13 kalan.

Jehova y’a sara a ka kantigiya kosɔn

19. Yezu ye kuma kabakoman juman lo fɔ? N’a sɔrɔ Piyɛri ye mun lo miiri o koo la?

¹⁹ A ma mɛɛn, Yezu ye kuma kabakoman wɛrɛ fɔ ko: “Tiɲɛ na, ne b’a fɔ aw ye ko aw minw be yan, aw dɔw tena sa n’u ma Mɔgɔ Dencɛ natɔ ye n’a ka masaya ye.’ ” (Mat. 16:28). N’a sɔrɔ Piyɛri y’a ɲini k’o kumaw kɔrɔ faamu. Yezu tun b’a fɛ ka mun lo fɔ do? N’a sɔrɔ Piyɛri y’a miiri ko ale tɛna o nɛɛmaba ɲɔgɔn sɔrɔ sabu Yezu y’ale kolo bɛrɛbɛrɛ a ma mɛɛn.

20, 21. a) Piyɛri ɲɛɛ lara yelifɛn min kan, i k’o lakali. b) Baro min kɛra yelifɛn na, o ye Piyɛri dɛmɛ cogo di k’a ka miiriya latilen?

²⁰ Lɔgɔkun kelen tɛmɛnin kɔ, Yezu ni Zaki ni Zan ni Piyɛri ye kilomɛtɛrɛ damanin kɛ ka taga “kulujan” dɔ kan. N’a sɔrɔ Ɛrɛmɔn kulu tun lo. I be taga a sɔrɔ sufɛ tun lo sabu o kalanden saba tun be banbana u kana sinɔgɔ. Nka ka Yezu to delili la, koo dɔ kɛra min ye sinɔgɔ bɔ u ɲɛɛw na pewu.—Mat. 17:1; Luka 9:28, 29, 32.

²¹ U y’a ye ko Yezu cogoya be yɛlɛmana. A ɲɛda y’a daminɛ ka manamana fɔɔ ka na kɛ komi tile. A ka faniw gwɛra parapara. O kɔ, u barila ka mɔgɔ fila ye Yezu gɛrɛfɛ: Kelen tun be i n’a fɔ Musa ani tɔɔ kelen tun be i n’a fɔ Eliya. U tun be kumana min na, o ye ko Yezu ka kan ka “taga Zeruzalɛmu,” o kɔrɔ, a ka kan ka sa ani ka kunu. Sisan, Piyɛri y’a faamu ko ale tun filila: joo tun t’a fɛ k’a miiri ko Yezu man kan ka tɔɔrɔ ani ka sa.—Luka 9:30, 31.

22, 23. a) Piyɛri y’a yira cogo di ko mɔgɔya b’a la ani ko a be koow kɛ ni dusudiya ye b) O suu kelen na, Jehova ye Piyɛri, Zaki ni Zan sara cogoya wɛrɛ juman na?

²² Piyɛri y’a miiri ko waajibi lo ale ka fɛɛn dɔ kɛ u ye walisa o yelifɛn kabakoman kana ban joona. A tun be komi Musa ni Eliya be tagara ka bɔ Yezu kɔrɔ. O kama, Piyɛri y’a fɔ ko: “Matigi, a ka ɲi an ka to yan. Anw be bugu saba lɔ, e ta kelen, Musa ta kelen, [Eliya] ta kelen.” A gwɛnin lo ko yelifɛn tun lo sabu Musa ni Eliya tun sara kabi wagatijan ani u mako tun tɛ fanibugu la. Tiɲɛn na, Piyɛri tun ma miiri ka sɔrɔ ka kuma. Yala Piyɛri ka mɔgɔya n’a ka dusudiya tɛ a koo diya i ye wa?—Luka 9:33.

²³ O suu kelen na, Jehova ye Piyɛri, Zaki ni Zan sara cogoya wɛrɛ la. K’u to kulu kan, sankaba dɔ jigira k’u datugu. U ye kumakan dɔ mɛn: Jehova Ala kumakan tun lo! A ko: “Nin ye ne Dencɛ ye ne ye min ci aw ma, aw k’a lamɛn.” O kɔ, yelifɛn nin banna, kalandenw ma mɔgɔ si ye tugun kulu kan Yezu kelen kɔ.—Luka 9:34-36.

24. a) Yezu cogoya yɛlɛmani ye Piyɛri nafa cogo di? b) Bi, o yelifɛn be se k’an fana nafa cogo di?

²⁴ Yala Yezu cogoya yɛlɛmani ma kɛ nilifɛnba ye Piyɛri ni an fana fɛ wa? Saan caaman o kɔ, Piyɛri y’a sɛbɛ ko a kɛra nɛɛma ye ale fɛ a “yɛrɛ ɲaa lara [Krista] ka nɔɔrɔ kan” o suu la. A fana y’a sɛbɛ ko Yezu tun bena nɔɔrɔ min sɔrɔ a ka Masaya la sankolo la, a kɛra nɛɛma ye ale fɛ k’o ye. O yelifɛn ye Bibulu ka kiraya kuma caaman tiɲɛntigiya yira. A fana ye dɔ fara Piyɛri ka limaniya barika kan walisa a ka se ka kɔrɔbɔli nataw muɲu (2 Piyɛri 1:16-19 kalan). O yelifɛn be se ka nɔɔ to an fana kan n’an ye kantigiya kɛ an Matigi Yezu ye, Jehova ye o min sigi an kun na. An ka ɲi fana ka sɔn a ka kalan ma, k’a to a k’an kolo ani an k’an yɛrɛ majigi ka tugu a kɔ loon o loon.