Jehova ye barika kura don Eliya la

U ye min kɛ Baali ka kiraw la, Zezabɛli y’o mɛn minkɛ, a dimina kosɔbɛ. A ye cira lase Eliya ma ko: ‘I bena faga sini i ko Baali ka kiraw.’ Eliya siranna kosɔbɛ ani a bolila ka taga kongokolon na. A ye Jehova deli ko: ‘Jehova, n’ tɛ se tugun. A to n’ ka sa.’ Eliya sɛgɛnnin sinɔgɔra yiri dɔ jukɔrɔ.

Mɛlɛkɛ dɔ y’a kunu ani ka kuma a fɛ ni kaan diiman ye ko: ‘Wuli ka dumuni kɛ.’ Eliya ye buru ye kabakuru gwannimanw kan ani daga dɔ, jii b’o kɔnɔ. A ye dumuni kɛ, ka jii min ani a sinɔgɔra tugun. Mɛlɛkɛ y’a kunu tugun k’a fɔ ko: ‘Dumuni kɛ. I mako be fanga la ka taga i ka tagama na.’ Eliya ye dɔ dumu tugun. O kɔ, a ye tile 40 ni suu 40 kɛ tagama na fɔɔ ka se Orɛbu kulu kan. A donna farawo dɔ kɔnɔ ko a be sinɔgɔ. Nka Jehova kumana a fɛ. A ko: ‘Eliya, i be mun lo kɛra yan?’ Eliya y’a jaabi ko: ‘Israɛldenw m’u ka layidu dafa. U y’i ka sarakabɔlanw ci ani k’i ka kiraw faga. Sisan, u b’a ɲinina ka ne fana faga.’

Jehova y’a fɔ a ye ko: ‘Bɔ ka lɔ kulu kan.’ Fɔɲɔba dɔ kɔnna ka wuli ka tɛmɛ farawo daa la. O kɔ, dugukolo yɛrɛyɛrɛla ani tasuma mɛnɛna. A laban, Eliya ye dususuman kuma dɔ mɛn. A y’a ɲɛda datugu n’a ka fani ye ani a bɔra farawo la ka lɔ. O kɔ, Jehova y’a ɲininga ko mun na a bolila. Eliya ko: ‘Ne kelen dɔrɔn le tora.’ Nka Jehova y’a fɔ a ye ko: ‘I kelen dɔrɔn tɛ. Mɔgɔ 7 000 be Israɛl, minw bele be ne batora. Taga Elize kɛ kira ye i nɔɔ na.’ Eliya sinna ka taga o kɛ. E ka miiri la, n’i be Jehova sago kɛ, yala a tɛna ele fana dɛmɛ wa? Tiɲɛn lo, a bena i dɛmɛ. An k’a filɛ koo min kɛra jaa tuma na.