I b’i ka lanaya “nigɛkunbɛnnan” ladonna wa?

1-2. a) Ka kɛɲɛ ni Efɛzikaw 6:16 ye, mun na an mako be lanaya “nigɛkunbɛnnan” belebeleba la? b) An bena ɲiningali jumanw lo lajɛ?

I KA lanaya “nigɛkunbɛnnan” ka bon wa? (Efɛzikaw 6:16 kalan). Siga t’a la, a ka bon. Nɛgɛkunbɛnnan belebeleba be farisogo fanba latanga. O cogo kelen na, i ka limaniya b’i latanga kakalayakow, fariyakow ani koo o koo bɛnnin tɛ Ala ka sariyaw ma.

² An be duniɲa “laban tuma” lo la ani an ka limaniya bena to ka kɔrɔbɔ (2 Tim. 3:1). An be se k’an ka limaniya sɛgɛsɛgɛ cogo di walisa k’a lɔn n’a barika ka bon? An be se ka mun lo kɛ walisa ka to ni limaniya barikaman ye? An k’o ɲiningaliw jaabiliw lajɛ.

I KA NƐGƐKUNBƐNNAN SƐGƐSƐGƐ

3. Sɔrɔdasiw tun be mun lo kɛ u ka nɛgɛkunbɛnnanw na ani mun na do?

³ Bibulu sɛbɛwagati la, sɔrɔdasiw tun ka teli ka golo la u ka nɛgɛkunbɛnnanw kan. U tun be tulu mɔ u la walisa golo kana tiɲɛ ani nɛgɛyɔrɔw kana soon. Ni sɔrɔdasi tun y’a ye ko a ka nɛgɛkunbɛnnan yɔrɔ dɔ tiɲɛna, a tun b’a dilan. O la, a labɛnnin tun be to kɛlɛ kama. O ɲɛyirali ɲɛsinna i ka limaniya ma cogo di?

4. Mun na i ka ɲi k’i ka lanaya nɛgɛkunbɛnnan sɛgɛsɛgɛ ani i ka ɲi k’o kɛ cogo di?

⁴ I ka ɲi ka to k’i ka lanaya nɛgɛkunbɛnnan sɛgɛsɛgɛ ani k’a ladon i ko sɔrɔdasiw tun b’u ka nɛgɛkunbɛnnanw ladon cogo min na galen. O la, i labɛnnin bena to kɛlɛ kama tuma bɛɛ. An be kɛlɛ la Alako ta fan fɛ sabu an ye kerecɛnw ye ani an kɛlɛbaga dɔw ye mɛlɛkɛ juguw ye (Efɛz. 6:10-12). Mɔgɔ si tɛ se k’i ka lanaya nɛgɛkunbɛnnan ladon i ye. I be se k’a lɔn cogo di ko kɔrɔbɔliw tɛna i ka limaniya barika dɔgɔya? A fɔlɔ, Ala deli a k’i dɛmɛ. O kɔ, a to Ala ka Kuma k’i dɛmɛ i k’i yɛrɛ sɛgɛsɛgɛ ani i k’a faamu Ala b’i jati cogo min na (Eburuw 4:12). Bibulu b’a fɔ ko: “E jigi la Masaba kan sɔbɛ la. Kan’i bolo la i yɛrɛ ka lɔnniya kan.” (Talenw 3:5, 6). O to i hakili la ani miiri desizɔn dɔw la i ye minw ta kɔsa la. Ɲɛyirali fɛ, yala i mako gwɛlɛ tun be wari la wa? O wagati la, Jehova ka layidu min be sɔrɔ Eburuw 13:5 kɔnɔ, yala o nana i hakili la wa? A fɔra yen ko: “Ne tena i to i kelen, n tena i bila abada.” Yala o layidu y’a to i lara a la ko Jehova bena i dɛmɛ wa? N’o lo, o b’a yira ko i b’i ka lanaya nɛgɛkunbɛnnan ladonna ka ɲɛ.

5. N’i y’i ka limaniya sɛgɛsɛgɛ, n’a sɔrɔ i bena mun lo ye?

⁵ N’i y’i ka limaniya sɛgɛsɛgɛ koɲuman, n’a sɔrɔ i bena koo dɔ ye min bena bari i la. I be se ka fiɲɛ dɔw ye i tun tɛ minw kala ma. Ɲɛyirali fɛ, i be se k’a ye ko hamikojugu, ngalon kumaw wala farifaga y’i ka limaniya nagasi. N’o y’i sɔrɔ, i be se k’i ka limaniya latanga cogo di walisa a kana to ka nagasi ka taga?

I YƐRƐ TANGA HAMIKOJUGU, NGALON KUMAW ANI FARIFAGA MA

6. Hami sugu minw ka ɲi, u dɔw fɔ.

⁶ Hami sugu dɔw ka ɲi. Ɲɛyirali fɛ, an be se k’an koo diya Jehova ni Yezu ye cogo min na, a ka ɲi an ka hami o la (1 Kor. 7:32). N’an ye jurumuba dɔ kɛ, an be se ka segi ka jɛnɲɔgɔnya ɲuman kɛ ni Jehova ye cogo min na, an be jɔrɔ o la (Zab. 38:19). An be hami koo nunu fana na: An ka ɲi ka min kɛ k’an koo diya an furuɲɔgɔn ye ani k’an janto an ka denbayamɔgɔw n’an kerecɛnɲɔgɔnw na.—1 Kor. 7:33; 2 Kor. 11:28.

7. a) Hamikojugu be se k’an ka limaniya nagasi cogo di? b) Ka kɛɲɛ ni Talenw 29:25 ye, mun na an man ɲi ka siran mɔgɔw ɲɛ?

⁷ Faan wɛrɛ fɛ, hamikojugu be se k’an ka limaniya nagasi. Ɲɛyirali fɛ, an be se ka to ka hami tuma bɛɛ sabu an b’a fɛ ka fani ani dumuni caaman sɔrɔ (Mat. 6:31, 32). O kama, an be se k’a ɲini cogo bɛɛ la ka bololafɛnw sɔrɔ. An be se ka laban yɛrɛ ka wari kanu. N’an y’a to o kɛra, an ka limaniya barika bena dɔgɔya Jehova koo la. Jɛnɲɔgɔnya min b’an ni Jehova cɛ, o bena nagasi (Mariki 4:19; 1 Tim. 6:10). Mɔgɔw be min miiri an koo la, an be se ka hami kojugu fana o koo la. O la, sanni an ka siran ka don Jehova gasi la, an bena siran mɔgɔw ka lɔgɔbɔri n’u ka kɔrɔbɔli lo ɲɛ. Walisa k’an yɛrɛ tanga o farati ma, an mako be limaniya ni jagwɛlɛya min na, an ka Jehova deli a k’o di an ma. O la, an tɛna siran mɔgɔw ɲɛ.​—Talenw 29:25 kalan; Luka 17:5.

8. Ni dɔ be ngalon kumaw fɔra, an ka ɲi ka mun lo kɛ?

⁸ Sutana lo ye “galon faa ye.” Minw b’a sago kɛ, a be tɛmɛ olu fɛ ka ngalon kumaw jɛnsɛn Jehova n’an balimaw koo la (Zan 8:44). Ɲɛyirali fɛ, mɔgɔ murutininw be ngalonw jɛnsɛn Jehova ka ɔriganisasiyɔn koo la ɛntɛrɛnɛti, telewisɔn n’a ɲɔgɔnnaw kan. O ngalonw ye Sutana ka “biɲɛ tasumaman” dɔw ye (Efɛz. 6:16). Ni dɔ y’a daminɛ k’o ngalon kumaw ɲɔgɔn fɔ an ye, an kana a lamɛn. Mun na do? Sabu an limaniyanin lo Jehova la ani an lanin lo an balimaw fana na. An tɛ sɔsɔli kɛ ni mɔgɔ murutininw ye abada koo si la ani kuun si kama walisa k’a ɲini k’a lɔn u bena min fɔ.

9. Farifaga be se ka nɔɔ juman to an kan?

⁹ Farifaga be se k’an ka limaniya barika dɔgɔya. Tuma dɔw la, an fari be faga an ka gwɛlɛyaw kosɔn. Tiɲɛn lo ko an tɛ se k’an ɲɛɛ tugu o gwɛlɛyaw kan. Nka, an man ɲi ka to ka miiri o la tuma bɛɛ. N’an b’o kɛ, Jehova ye layidu ta fɛɛn ɲuman minw koo la, an bena ɲinɛ u kɔ (Yir. 21:3, 4). An fari bena faga fɔɔ an barika be dɔgɔya ani an bena Jehova sago kɛli dabila (Talenw 24:10). An man ɲi k’a to o k’an sɔrɔ.

10. Balimamuso dɔ ka lɛtɛrɛ y’i dɛmɛ ka mun lo faamu?

¹⁰ Etazini, an balimamuso dɔ b’a jantora a cɛɛ la min bananin lo kosɔbɛ. An k’a filɛ a be min kɛ walisa k’a ka limaniya ladon. A ye lɛtɛrɛ dɔ ci an ka sigiyɔrɔsoba ma ko: “An ka koo y’an hakili ɲagami ani k’an fari faga tuma dɔw la. Nka, an ka jigiya barika ma dɔgɔya. Jehova be fɛɛn minw bɛɛ di an ma walisa k’an ka limaniya barika bonya ani k’an jija, n’ b’a waleɲuman lɔn kosɔbɛ o kosɔn. Tiɲɛn na, an mako b’a ka ladiliw n’a ka jijaliw la. U b’an dɛmɛ an ka to ka Jehova sago kɛ ani ka gwɛlɛyaw muɲu. Sutana be tɛmɛ o gwɛlɛyaw lo fɛ k’a ɲini k’an fari faga.” O balimamuso ka kumaw b’an dɛmɛ k’a faamu ko an be se ka see sɔrɔ farifaga kan! Cogo di do? An k’a to an hakili la ko Sutana be tɛmɛ an ka gwɛlɛyaw fɛ k’an kɔrɔbɔ. Nka, an ka la a la ko Jehova bena an dusu saalo. An be kalan minw sɔrɔ ka bɔ Jehova fɛ, an b’a waleɲuman lɔn u kosɔn.

11. Walisa k’an ka limaniya sɛgɛsɛgɛ, an ka ɲi k’an yɛrɛ ɲininga mun lo la?

¹¹ Yala i y’a kɔrɔsi ko i ka ɲi k’i ka limaniya barika bonya tugun wa? Kalo tɛmɛninw na, yala i sera k’i yɛrɛ tanga hamikojugu ma wa? Mɔgɔ murutininw be ngalon minw jɛnsɛn an koo la, yala i banna k’u lamɛn ani i banna ka sɔsɔli kɛ n’u ye wa? Yala i ye see sɔrɔ farifaga kan wa? N’o lo, i ka limaniya barika ka bon. Nka, an ka ɲi k’an yɛrɛ kɔrɔsi kosɔbɛ sabu kɛlɛkɛminan wɛrɛw be Sutana fɛ, a b’a ɲini k’an kɛlɛ ni minw ye. An k’u la dɔw lajɛ.

I YƐRƐ TANGA BOLOLAFƐNW KANUYA MA

12. N’an be bololafɛnw kanu, o nɔfɛkow bena kɛ mun lo ye?

¹² N’an be bololafɛnw kanu, an ka limaniya barika bena dɔgɔya ani an tɛna an sɔbɛ don Jehova ka baara la. Ciden Pol ko: “Ni mɔgɔ min donna sɔlidasiya la, n’a b’a fɛ k’a kuntigi sago kɛ, a be jija o baara la, a t’a niin don baara wɛrɛ la.” (2 Tim. 2:4). A tun daganin tɛ Ɔrɔmu sɔrɔdasiw ka baara wɛrɛ kɛ. Ni sɔrɔdasi dɔ tun banna o ma, mun lo tun be se ka kɛ?

13. Mun na sɔrɔdasi tun man ɲi ka baara wɛrɛ kɛ?

¹³ Miiri k’a filɛ: Sɔgɔma, sɔrɔdasi dɔw b’u yɛrɛ degira kɛlɛ la n’u ka murujanw ye. Nka, sɔrɔdasi dɔ tɛ yen. A ɲɛɛ gwannin lo dumunifeere la lɔgɔ la. Wulafɛ, sɔrɔdasiw b’u ka kɛlɛkɛminanw sɛgɛsɛgɛra ani u b’u ka murujanw daa diyara. Nka min be dumuni feere lɔgɔ la, ale ɲɛɛ gwannin lo ka dumuni labɛn, a bena min feere sini. O loon dugusagwɛ sɔgɔma, u jugu dɔ barila ka wuli u kama. Sɔrɔdasi juman lo labɛnnin lo kɛlɛ kama ani a bena a kuntigi dusu diya? Kɛlɛ tuma na, ele b’a fɛ ka to sɔrɔdasi juman lo gɛrɛfɛ? Sɔrɔdasi min tun b’a yɛrɛ labɛn kɛlɛ kama n’a tɔɲɔgɔnw ye wala min tun be dumuni feere lɔgɔ la?

14. Komi an ye Krista ka sɔrɔdasiw ye, mun lo kɔrɔtanin lo kosɔbɛ an fɛ?

¹⁴ An be komi sɔrɔdasi ɲumanw. An ɲɛnako fɔlɔ ye min ye, o ye k’an Kuntigi Jehova ani Krista dusu diya. O lo kɔrɔtanin lo an fɛ ka tɛmɛ Sutana ka duniɲa kɔnɔfɛnw bɛɛ kan. An mako be wagati ani fanga min na, an be banba k’o sɔrɔ walisa ka koo nunu kɛ: ka baara kɛ Jehova ye ani k’an ka lanaya nɛgɛkunbɛnnan ni Ala ka kɛlɛkɛminan tɔɔw ladon ka ɲɛ.

15. Pol y’an lasɔmi mun lo la ani mun na do?

¹⁵ An ka ɲi k’an yɛrɛ kɔrɔsi tuma bɛɛ! Mun na do? Ciden Pol y’an lasɔmi ko: “Minnu b’a fɛ ka fɛntigiya,” olu bena “dannaya sira bila.” (1 Tim. 6:9, 10, Bible senuma). Pol ko ka “sira bila,” o b’a yira ko an be se k’a daminɛ dɔɔni dɔɔni ka bololafɛnw ɲini an mako tɛ minw na. O kɔ, “nege jugu kunntanw” bena an minɛ. Sanni an k’a to o negew ka don an kɔnɔ, an k’a jati ko kɛlɛkɛminanw lo minw be se k’an ka limaniya nagasi.

16. Maana min be sɔrɔ Mariki 10:17-22 kɔnɔ, o ka ɲi k’an lasun an ka miiri ɲiningali jumanw lo la?

¹⁶ N’a sɔrɔ wari b’an fɛ ka bololafɛn caaman san. N’an ye fɛɛn dɔ san min nege b’an na, nka an mako t’a la sɔbɛ la, yala o ye koo jugu ye wa? Ayi, koo jugu tɛ. Nka, an ka miiri ɲiningali nunu na: Hali ni fɛɛn dɔ see b’an ye, yala an be ni wagati ni fanga ye k’a ladon wa? Yala an tɛna an masiri an ka bololafɛnw na kojugu wa? Yezu tun y’a ɲini kanbele nafolotigi dɔ fɛ a ka baara kɛ Ala ye bɛrɛbɛrɛ. Nka, a banna. Yala bololafɛnw kanuya tɛna a to an be koow kɛ i n’a fɔ o kanbele wa? (Mariki 10:17-22 kalan). A ka fisa an ka ɲɛnamaya kɛ cogo nɔgɔman na ani k’an ka wagati n’an fanga kɛ Jehova sago kɛli la!

I KA LANAYA NƐGƐKUNBƐNNAN MINƐ KA ƝƐ

17. An man ɲi ka ɲinɛ mun lo kɔ abada?

¹⁷ An be kɛlɛ la ani an labɛnnin ka ɲi ka to kɛlɛ kama loon o loon. An man ɲi ka ɲinɛ o kɔ abada (Yir. 12:17). An balimaw tɛ se k’an ka lanaya nɛgɛkunbɛnnan minɛ an ye. An yɛrɛ lo ka ɲi k’o kɛ.

18. Nɛgɛkunbɛnnan minw tun be sɔrɔdasiw fɛ galen, mun na u tun b’u minɛ ka ɲɛ?

¹⁸ Galen, u tun be se ka bonya la sɔrɔdasi dɔ kan a ka jagwɛlɛya kosɔn kɛlɛ la. Nka, maloya tun lo a fɛ n’a tun kɔsegira soo ani a ka nɛgɛkunbɛnnan t’a bolo. Ɔrɔmukaw ka tariki sɛbɛbaga Tacitus y’a sɛbɛ ko: “Ni sɔrɔdasi tun bolila k’a ka nɛgɛkunbɛnnan to kɛlɛ la, o maloya tun ka jugu yɛrɛ le!” O lo kama, sɔrɔdasiw tun b’u ka nɛgɛkunbɛnnanw minɛ ka ɲɛ.

19. An be se k’an ka lanaya nɛgɛkunbɛnnan minɛ ka ɲɛ cogo di?

¹⁹ An b’an ka lanaya nɛgɛkunbɛnnan minɛ ka ɲɛ cogo di? An b’o kɛ n’an be to ka taga an ka lajɛnw na ani n’an be Jehova tɔgɔ n’a ka Masaya kofɔ tɔɔw ye (Eburuw 10:23-25). An be Ala ka Kuma kalan loon o loon fana. An be Jehova deli walisa min fɔra a ka Kuma kɔnɔ, a k’an dɛmɛ an k’o sira tagama an ka kokɛtaw bɛɛ la (2 Tim. 3:16, 17). O la, Sutana ka kɛlɛkɛminan si tɛna se k’an mako sa pewu (Ezayi 54:17). An ka lanaya “nigɛkunbɛnnan” bena an latanga. An bena lɔ kelen kan ani k’an jaa gwɛlɛya ka baara kɛ n’an balimaw ye. An be kɛlɛ min na loon o loon walisa k’an ka limaniya barika bonya, an bena see sɔrɔ o la. Min yɛrɛ kɔrɔtanin lo ka tɛmɛ, o ye ko an bena kɛ Yezu kɔfɛmɔgɔw ye tuma min na a bena Sutana n’a ka mɛlɛkɛ juguw kɛlɛ ani ka see sɔrɔ u kan.​—Yir. 17:14; 20:10.