An ka laɲinita dɔw latigɛ Alako ta fan fɛ
1 Ka Jehova tando fɔɔ abada, o bena kɛ nɛɛma ye dɛ! Walisa k’o laɲinita dafa, an be se ka laɲinita dɔw latigɛ sisan kama, ani k’an jija k’u dafa. O bena an dɛmɛ ka hakili sɔrɔ janko an barika kana tiɲɛ (1 Kɔr. 9:26). Laɲinita jumanw be se ka kɛ nɔgɔman ye ile fɛ?
2 Bibulu kalan: Yala i be lajɛn kelen kelen bɛɛ ka kalan labɛn wa? N’i ko ɔwɔ, yala i be wagati ta ka sɛgɛsɛgɛri kɛ ani ka miiri kalan kɛtɔ wa? Ɲɛyirali fɛ, La Tour de Garde ani kafo ka Kitabukalan labɛntɔ, yala i be jaabiliw jukɔrɔla ci dɔrɔn wa? Wala, yala i be vɛrisew ɲini Bibulu kɔnɔ, ani i be miiri ɲɛfɔliw kuun kan wa? Lɔgɔkun o lɔgɔkun, Bibulu kalangwɛ kɛta be di Ala ka Mara cidenyabaara lakɔli kama. Yala i be se ka sɛgɛsɛgɛri dɔw kɛ o kan wa? Ka sɛgɛsɛgɛri kɛ Alakow kan, o be wagati ta, ani fɔɔ jijali ka kɛ. Nka a nafa ka bon hakilimaya ta fan fɛ. —Ntal. 2:4, 5.
3 Kafo ka lajɛnw: Laɲinita wɛrɛ ye ka taga kafo ka lajɛn looru bɛɛ la tuma o tuma. N’an be kɔn ka na lajɛn na walisa ka jɛnɲɔgɔnya kɛ n’an balimaw ye, ani ka nafa sɔrɔ dɔnkili fɔlɔ ni delili la, o be dusu don kafo ka koow la. An ka kan k’an jija ka lakalitaw kɛ lajɛn kelen kelen bɛɛ la. An fana k’a ɲini k’an ka lakalitaw fisaya. I be se k’a yira cogo min na dakun ka vɛrise dɔ be kalan kɔrɔta, wala cogo min na hakilinataw ɲɛsinna loon o loon ka ɲɛnamaya koow ma. —Heb. 10:24, 25.
4 Waajuli baara: An mana laɲinitaw latigɛ, an ka cidenyabaara be fisaya. Yala i ye lɛri dɔw latigɛ waajuli kama kalo o kalo wa? Mɔgɔ dɔw y’a ye k’o laɲinita ɲɔgɔn b’u dɛmɛ. Wala, yala i be se k’i ka waajuli faan dɔw fisaya wa? I n’a fɔ: ka baara kɛ ni Bibulu ye soo ni soo, ka viziti kura fisamanw kɛ, k’i jija ka Bibulukalan daminɛ, wala ka mɔgɔw kalan cogo fisaman na.
5 Bangebagaw, yala aw be aw denmisɛnw jagwɛlɛya u ka laɲinita dɔw latigɛ Jehova ka baara la wa? A’ y’u dɛmɛ u k’a faamuya ko ka baara kɛ i ko piyɔniye, wala Betɛli denbaya mɔgɔ dɔ, o ye cogoya cɛɲumanba ye u fɛ k’u ka waleɲumanlɔn yira Jehova la. —Waaj. 12:1.
6 An kɛtɔ k’an ka baaraw lajɛ, an ka laɲinitaw latigɛ Alako ta fan fɛ. O kɔ, an k’an jija k’u dafa. O la, dɔ bena fara an ka ɲagali kan cidenyabaara la, ani an bena kɛ jagwɛlɛya sababu ye mɔgɔ wɛrɛw fɛ. —Rom. 1:12.