An ka Masaya cira weleweleda
1 “Wajibi don ne ka Ala ka masaya Kibaru Duman fɔ dugu tɔw fana la, k’a masɔrɔ ne cira o de kosɔn.” (Luka 4:43). O kumaw fɛ, Yesu y’a ka cidenyabaara barokun yira ka gwɛ: Ala ka Masaya. An fana be cira min weleweledara bi, a basiginen be Masaya lo kan, i ko a tun fɔra Matiyu 24:14 la ko: “Nin Kibaru Duman waajuli na kɛ diɲɛ yɔrɔw bɛɛ la sankolo masaya ko la ka kɛ siyaw bɛɛ seere ye. O kɔ, a laban na se.” Mɔgɔw ka kan ka tiɲɛn kuma jumanw mɛn Ala ka Masaya koo la?
2 Bi, Ala ka Masaya be kuntigiya kɛra sankolo la, ani sɔɔni, a bena sigi hadamadenw ka kuntigiyaw bɛɛ nɔɔ na. Sitanɛ gwɛnna ka bɔ yen sankolo la ka ban. Ani, bi koow sigicogoya juguman donna a laban loonw na ( Jira. 12:10, 12). Sitanɛ ka duniɲa jugu bɛɛ bena halaki pewu. Nka, Ala ka Masaya tɛna lamaga. A bena to yen fɔɔ abada.—Dan. 2:44; Heb. 12:28.
3 Masaya bena hadamaden kanminɛbagaw ka nege ɲumanw bɛɛ wasa. Kɛlɛ ni kojugukɛ ni nintɔɔrɔ ni fantanya ye tɔɔrɔ min bila mɔgɔ kan, a bena o bɔ yen (Zab. 46:9, 10; 72:12-14). Domunifɛn caaman bena labila bɛɛ ye (Zab. 72:16; Esayi 25:6). Bana ni barikantanya bena kɛ koo tɛmɛnenw ye (Esayi 33:24; 35:5, 6). Hadamadenw kɛtɔ ka kɛ mɔgɔ dafalenw ye, dugukolo bena yɛlɛma ka kɛ alijɛnɛ ye. Ani, mɔgɔw bena sigi ɲɔgɔn fɛ teriya la.—Esayi 11:6-9.
4 An ka bi ɲɛnamaya kɛcogo fɛ, an b’a yira ko an b’a fɛ ka kɛ Ala ka Masaya mɔgɔw ye. Masaya cira ka kan ka nɔɔ to an ka ɲɛnamaya kɛcogo bɛɛ kan: hali an ka laɲinitaw, n’an ka ɲɛnakow. Ɲɛyirali fɛ, hali ni waajibi lo an k’an denbaya ladon, an man kan k’a to balo ɲini ka Masaya koow nagasi (Mat. 13:22; 1 Tim. 5:8). Nka, an ka kan k’an janto Yesu ka lasɔmini nin na: “A’ ye Ala ka masaya ni a ka tilennenya ɲini fɔlɔ. O mana kɛ, Ala na o fɛnw bɛɛ [balo ɲini fɛɛnw] di aw ma ka fara olu kan.” —Mat. 6:33.
5 Kɔrɔtɔba b’a la hadamadenw ka Masaya cira mɛn, ani u k’a laminɛ wagati tɔɔ labilanen kɔnɔ. An k’u dɛmɛ k’o kɛ, an kɛtɔ ka “dusu don u la Ala ka masaya koo la, NW.”—Kew. 19:8.