An ka Jehova ka ɲumanya ladege

¹ An mana tileben cɛɲumanba dɔ mafilɛ, wala an mana domuni diiman dɔ diya bɔ, yala an dusu t’an lasun ka Jehova fo, ale min ye ɲumanya bɛɛ sababu ye wa? A ka ɲumanya b’an lasun an k’a ɲini k’ale ladege (Zab. 119:66, 68; Efes. 5:1). Cogo juman na an be se ka ɲumanya jogo yira?

² Dannabaliw ta fan fɛ: An be se ka Jehova ka ɲumanya ladege cogo dɔ la: n’an b’an janto mɔgɔw la ni kɔnɔgwɛ ye, minw tɛ an balima dannabagaw ye (Gal. 6:10). N’an be ɲumanyako nafamanw kɛ u ye, o be se ka nɔɔ ɲuman to u kan: u bena Jehova Seerew ni u ka cira filɛ ni ɲɛɛ ɲuman ye.

³ Ɲɛyirali fɛ, balimacɛ kamalen piyɔniye dɔ tun be kɔnɔni kɛra dɔgɔtɔrɔ ka daa la. A sigira musokɔrɔba min gɛrɛ fɛ, ale ka bana tun be komi a ka jugu ni tɔɔw ta ye. Dɔgɔtɔrɔ y’an balimacɛ weele tuma min na, a y’a to musokɔrɔba ka don ale ɲɛ. Kɔfɛ, u ye ɲɔgɔn kunbɛn lɔgɔfɛ la. A diyara muso ye kosɔbɛ ka balimacɛ ye. Fɔlɔ la, a tun tɛ sɔn ka kibaro duman lamɛn. Nka, a y’a fɔ ko sisan, ale y’a lɔn ko Jehova Seerew b’u mɔgɔɲɔgɔnw kanu tiɲɛn na. Bibulukalan dɔ daminɛna n’a ye, ani o kalan sabatira.

⁴ An balimaw ta fan fɛ: An be Jehova ka ɲumanya ladege fana n’an b’an yɛrɛ di k’an balimaw dɛmɛ. Balawo wagatiw la, an be mɔgɔ fɔlɔw cɛ, minw be dɛmɛ lase an balimaw ma. O hakili kelen lo b’an na n’an b’an balimaw dɛmɛ, minw mako be taransipɔri la ka taga lajɛnw na, n’an be taga bɔ farikolo dɛsɛbagatɔw ye, ani n’an b’an ka kanuya bonya an balimaw ta fan fɛ, an tɛ minw lɔn koɲuman kafo kɔnɔ.—2 Kɔr. 6:11-13; Heb. 13:16.

⁵ Jehova b’a ka ɲumanya yira cogo wɛrɛ la: A “bɛ sɔn ka yafali kɛ.” (Zab. 86:5). I n’a fɔ Jehova, an be se k’a yira ko ɲumanya ka di an ye n’an be yafali kɛ mɔgɔ wɛrɛw ye (Efes. 4:32). O b’a to, an be jɛnɲɔgɔnya min kɛ n’an balimaw ye, o be ɲɛ ani o be diya.—Zab. 133:1-3.

⁶ An k’a to Jehova ka ɲumanya kɛli caaman k’an lasun k’u ‘weleweleda’ ani k’a tando. An ka ‘ɲagali’ ni dusu diya ye. Ani, an k’a to o k’an lasun k’an jija k’ale ka ɲumanya ladege an ka koow bɛɛ la.—Zab. 145:7; Jer. 31:12.