Hakilimaya domuni, wagati bɛnnen na
1 “Ne na aw ka sɛnɛfɛnw jiidi k’u caya. Ne tɛna kɔngɔ bila aw la tun.” O ye Masaba Matigi Jehova ka kumaw ye (Ezek. 36:29). O ciraya kumaw ɲɛsinna Ala ka mɔgɔw ma bi. Ntalen kuma ta fan fɛ, Jehova y’a to sumankisɛ ka falen caaman walisa k’a ka mɔgɔw mara niin na. Hakilimaya domuni min be di wagati bɛnnen na tile saba lajɛnbaw sen fɛ, o b’o koo ɲɛyira koɲuman.
2 Lajɛnba min kɛra Columbus, Ohio mara la, saan 1931 na, Jehova y’a batobagaw ɲɛɛ yɛlɛma u ka tɔgɔ kura la u yɛrɛw kan, ko “Jehova Seerew” (Esayi 43:10-12). Jamakuluba min kofɔra Jirali 7:9-17 la, u y’o faranfasi ka lɔn ka ɲɛ saan 1935 na. Saan 1942 na, balimacɛ Knorr ye forobakalan nin di: “Sini ka hɛɛrɛ, yala a bena mɛɛn wa?” O kalan ye dusu don mɔgɔw la waajuli kama duniɲa bɛɛ kɔnɔ, ani o kɛra sababu ye Gilead jusigira: o ye Watchtower ka Bibulu lakɔli ye. Hali ni lajɛnba dɔw kɔni tora mɔgɔw hakili la, lajɛnba kelen kelen bɛɛ sɔrɔla ka kɛ tabali falen ye hakilimaya balofɛnw na, wagati bɛnnen na.—Zab. 23:5; Mat. 24:45.
3 Yala i b’i yɛrɛ balola ka ɲɛ wa? Balofɛnw be se k’an lamini yɔrɔ bɛɛ, nka n’an t’an jija ka domuni kɛ, an tɛna balo ka ɲɛ (Ntal. 26:15). O kelen lo Alako ta fan fɛ. Lajɛnba dɔw la, u y’a kɔrɔsi ko mɔgɔ caaman be yaala gwansan, wala u be baro kɛra ni mɔgɔ wɛrɛw ye k’a sɔrɔ kalan be kɛra. Hali ni baro nafaman ye lajɛnba faan sɔbɛ dɔ ye, o kɛwagati ye, sanni kalan ka daminɛ, ani a banni kɔ (Waaj. 3:1, 7). N’an sigilen tɛ ka lamɛnni kɛ kosɔbɛ, an be se ka fɔn yɔrɔ nafamanba dɔ la. Tuma kelen kelen na, lajɛnba ka baara ɲɛmɔgɔw, wala minw seen be kalan koo dɔ la, u mako be se ka kɛ a la ka baro kɛ lajɛnba ka koo dɔw kan. O y’a sɔrɔ kalan be dira. K’o nii bɔ a la, u ka kan ka ɲɛyirali di, u kɛtɔ k’u janto ka kalan lamɛn. Hakilimaya domuni min be dira, an si man kan ka fɔn a dɔ la.—1 Kɔr. 10:12; Filip. 2:12.
4 Jehova be hakilimaya tiɲɛn kalan nafaman min di an ma, an be ɲagali k’o sɔrɔ dɛ! Egiliziw ka ngalon kalan nafantanw tɛ suma n’o ye (Esayi 65:13, 14). An be se ka “kɛ ɲuman dɔnbaaw ye” n’an be lajɛnba jati i ko sababu, Jehova be tɛmɛ min fɛ k’an kalan (Kolos. 3:15). An k’an hakili sigi kalan lo kan, an kan’a dan kalankɛla dɔrɔn ma. An k’a jati ko a be cira min dira, o bɔra an “Karamɔgɔba” yɔrɔ (Esayi 30:20, 21; 54:13, NW). An ka lamɛnni kɛ ni jantoli sɔbɛ ye. An ka hakilinata kunbabaw sɛbɛ ka surunya. Loon o loon suu la, an ka segi kalan yɔrɔ jɔnjɔnw kan. An be min kalan, an k’a sira tagama.
5 Lajɛnba kelen kelen min be kɛ sanni Harmagedɔn ka se, a mana kɛ kalifa yɔrɔw la kɛlɛw kosɔn, wala jamana dɔ kɔnɔ min farafaralen be marifakɛlɛ bolo, wala ɲɛsuman yɔrɔ yɛrɛ la, o ye see sɔrɔli ye sitanɛ kan! I ko balimaya jɛkulu kelen, a ka di an ye kosɔbɛ ka ɲɔgɔn kunbɛn tile saba lajɛnbaw kama (Ezek. 36:38). An jigi lanen b’a la ko, a ka kanuya kosɔn, Jehova bena “dumuni [di an ma] waati latigɛlen na” tugun.—Luka 12:42.
[Study Questions]
1. Cogo juman na Ezekiɛl 36:29 be dafara bi tilew la?
2. Cogo juman na Jehova tɛmɛna tile saba lajɛnbaw fɛ ka hakilimaya domuni di wagati bɛnnen na?
3. Hakilimaya domuniba min be di tile saba lajɛnbaw la, an ka kan ka mun kɛ walisa ka nafa sɔrɔ a la?
4. Jehova be hakilimaya domuniba min di an ma, cogo juman na an be se k’a waleɲuman lɔn?
5. Tile saba lajɛnbaw be ɲagali sababu jumaw di an ma?
[Box on page 6]
An ka Jehova waleɲuman lɔn a ka tabali kosɔn
◼ An ka lamɛnni kɛ ni jantoli sɔbɛ ye
◼ An ka hakilinata kunbabaw sɛbɛ
◼ Loon o loon suu la, an ka segi kalan yɔrɔ jɔnjɔnw kan
◼ An be min kalan, an k’a sira tagama