Cogo juman na an ka ɲi ka seereya di an somɔgɔw ma?
1 Ni an n’an somɔgɔw tun be se ka kɛ kelen ye Jehova ka batoli kɔnɔ ani ka jɛn ka don duniɲa kura kɔnɔ, o tun bena kɛ ɲagali fisaman ye an fɛ dɛ! O jigiya ɲuman be se ka kɛ tiɲɛnko ye n’an be seereya di an somɔgɔw ma. Walisa an ka se k’o kɛ cogo ɲuman na, fɔɔ an ka faamuyali hakili sɔrɔ. Kafokulu kɔrɔsibaga dɔ y’a kɔrɔsi k’a fɔ ko: “Minw be sanga fisaman sɔrɔ o koo la, olu be kuma n’u somɔgɔw ye koo dɔw kan, koo minw bena u lasun u ka ɲiningali kɛ. U b’o kɛ siɲɛ kelen kelen.” An be se k’o kɛ cogo di?
2 An k’u lasun u ka ɲiningali kɛ: An ka kɔn ka miiri cogo min na an be se k’an somɔgɔw lasun u k’u mako don an ka baro la (Ntal. 15:28). U ka haminankow ye mun lo ye? U be gwɛlɛya jumanw lo kunbɛnna? An be se ka barokun dɔ yira u la gafe dɔ kɔnɔ. Wala, ni baro dɔ ka di u ye kosɔbɛ, an be se ka bibulusen diiman dɔ kofɔ u ye min ɲɛsinna o baro ma. N’an ka somɔgɔw sigilen tɛ yen an gɛrɛfɛ, n’a sɔrɔ an be se k’o kɛ lɛtɛrɛ wala telefɔni fɛ. An ka tiɲɛn sumansi dan u dusu la, nka an kan’a ɲini k’u niin degun. Ani, an k’an bolo la Jehova kan ale k’o sumansiw falen.—1 Kɔr. 3:6.
3 Yesu ye jinɛ caaman gwɛn ka bɔ cɛɛ dɔ la, ani a y’a lasɔmi ko: “I ka taa so. Matigi makarila i la ka koba minnu kɛ i ye, i ka olu bɛɛ lakali i so mɔgɔw ye.” (Marka 5:19). An ka miiri k’a filɛ o koo sera ka nɔɔ min to o cɛɛ ka somɔgɔw kan! Hali n’o kabako ɲɔgɔn ma deli k’an sɔrɔ, n’a sɔrɔ an somɔgɔw b’u mako don an ka baaraw la ani an denmisɛnw ta la. N’o y’a sɔrɔ an ye kalan dɔ di Ala ka Mara cidenyabaara lakɔli la, n’an tagara lajɛnba dɔ la, n’an tagara Betɛli filɛ, wala n’an y’an tɔgɔla koba dɔ kɛ, n’an be kuma o koo dɔw kan, o be se ka sira dayɛlɛ an ye an ka koo dɔ fɔ Jehova n’a ka ɔriganisasiyɔn kan.
4 An ka hakili sɔrɔ: N’an be seereya dira an somɔgɔw ma, an kana a ɲini ka koo caaman fɔ u ye siɲɛ kelen na. Balimacɛ dɔ hakili b’a la tuma min na a y’a daminɛ ka Bibulu kalan. A ko: “Ne tun mana lɔnniya sɔrɔ koo o koo kan Bibulu kɔnɔ, ne tun b’o ɲɛfɔ n’ bamuso ye fɔɔ k’a tulo fa lɛri caaman kɔnɔ. Ani, tuma caaman na, o tun be sɔsɔli lawili soo kɔnɔ, ne ni n’ facɛ kɔni cɛ.” Hali n’an somɔgɔ dɔ y’a mako don Bibulu ka cira la, an k’a jaabi cogo dɔ la walisa o k’a lasun k’a ɲini ka dɔ fara a ka lɔnniya kan (Ntal. 25:7). An ka bonya la u kan, ka teriya kɛ n’u ye ani ka sabali tuma bɛɛ i n’a fɔ n’an tun be kumana ni lonan dɔw ye waajuli la.—Kolos. 4:6.
5 Loon dɔ la, Yesu ka somɔgɔw y’a miiri ko faa y’a minɛ (Marka 3:21). Nka o kɔfɛ u dɔw nana kɛ a ka kalandenw ye (Kew. 1:14). I be jijali minw kɛ ka tiɲɛn kofɔ i somɔgɔw ye, n’u ma sɔn a la a daminɛ na, i kana a dabila. I somɔgɔw ka koow cogoya n’u kɛcogo be se ka yɛlɛma. I ka timinandiya ka sababu wɛrɛ ɲini ka baro kɛ n’u ye koo wɛrɛ kan min be se k’u lasun u ka ɲiningaliw bila i ye. I be se ka ɲagali k’u dɛmɛ u ka ɲɛnamaya banbali sira ta.—Mat. 7:13, 14.
[Study Questions]
1. Mun na an mako be faamuyali hakili la n’an be seereya dira an somɔgɔw ma?
2. N’an b’an mako don an somɔgɔw la ni kɔnɔgwɛ ye, cogo juman na o be se k’an dɛmɛ an k’u lasun u ka ɲiningaliw kɛ?
3. N’an somɔgɔw b’u mako don an ka koow la, cogo juman na o be se ka sira dayɛlɛ an ye an ka seereya kɛ?
4. N’an be seereya dira an somɔgɔw ma, an ka kan k’an yɛrɛ tanga fili jumanw ma?
5. N’an be seereya dira an somɔgɔw ma ani u m’an jaabi cogo ɲuman na, an ka kan ka mun kɛ?