An ka barika la Jehova ye a ka kanuya kantigiman kosɔn
Kirista ka saya seli bena kɛ marisikalo tile 24nan loon
1 Zaburu sɛbɛbaga kabara ko: “Ayiwa mɔgɔw ka Matigi tanu a ka makari [kanuya kantigiman, NW ] kosɔn, ani a ka kabako kɛlenw kosɔn Hadamadenw ye.” (Zab. 107:8). Tiɲɛn lo, Ala b’a janto mɔgɔw la ni makari ye. Nka a ka kanuya kantigiman tɛ dan o ma. Zaburu sɛbɛbaga ka tandoli kumaw b’o yira. Hakili senu y’a lasun k’a sɛbɛ ko: “Matigi, i ka ɲumanya [kanuya kantigiman, NW ] kɛra ne sinsinnan ye.” (Zab. 94:18). Jehova y’a Dencɛ kelenpe bangelen di an kosɔn. Tiɲɛn na, o ye kanuya kantigiman kabakoman seereya ye dɛ!—1 Yuh. 4:9, 10.
2 Komi Kirista ka saya Hakilijigi seli be surunyana, cogo juman na an be se ka barika la kanuya kantigiman Ala ye? (Zab. 59:18). Yesu ye loon laban minw kɛ dugukolo kan, a ka ɲi an bɛɛ kelen kelen ka wagati ta ka miiri u kan (Zab. 143:5). Labɛn dɔ kɛra Bibulu kalangwɛ kama Hakilijigi seli wagati la. Nafa b’a la an ka tugu o labɛnsira kɔ gafenin Examinons les Écritures chaque jour—2005 kɔnɔ. N’an be se, an fana ka kalan kɛ ani ka sɛgɛsɛgɛri kɛ gafe Le plus grand homme sapitiriw 112-16nan kɔnɔ ani gafe wɛrɛw fana kɔnɔ. An be yɔrɔ minw kalan, an ka miiri u kan, ani an k’an sɔbɛ don u la (1 Tim. 4:15). Ala ka Kuma kalan kɛtɔ, n’an be miiri a kan delili kɔnɔ, o b’an dusukun balo. Ani, o fana b’a yira ko an be Jehova kanu.—Mat. 22:37.
3 An ka mɔgɔ wɛrɛw lasun u ka barika la Ala ye: Salon, duniɲa bɛɛ kɔnɔ, mɔgɔ miliyɔn 16 760 607 nana Hakilijigi seli la. A saan damanin ye nin ye, Liberiya dugu dɔ kɔnɔ, balimaw ye lɛtɛrɛ ci dugutigi ma k’a fɔ a ye k’u b’a fɛ ka Matigi ka surafana seli kɛ a ka dugu kɔnɔ. Dugutigi ye sira di u ma u ka seli kɛ balɔntanyɔrɔ la. Ani a ye cira lase mɔgɔw ma a ka mara la k’u ka na o seli la. Mɔgɔ 636 kafora seli kama, k’a masɔrɔ weleweledala looru dɔrɔn lo tun be yen o dugu kɔnɔ!
4 O cogo kelen na, an b’a fɛ ka mɔgɔ caamanba dɛmɛ u ka na Hakilijigi seli la ka fara an kan. I b’a fɛ ka mɔgɔ minw weele ka na seli la, mun na i t’u tɔgɔw sɛbɛ? Jaa dɔw be sɔrɔ Réveillez-vous ! ni La Tour de Garde ɲɛɛ labanw na (marisikalo tile 8nan ni tile 15nan taw). An be se ka tɛmɛ o jaaw fɛ ka mɔgɔw weele u ka na Hakilijigi seli la. An fana be se ka tɛmɛ Hakilijigi seli weelesɛbɛw fɛ k’o kɛ. O sɛbɛw sanfɛ, an ka seli lɛri n’a kɛyɔrɔ sɛbɛ mansi fɛ wala an bolo fɛ. Ani an ka kelen di mɔgɔ kelen kelen bɛɛ ma, an be minw weele ka na. Marisikalo tile 24nan surunyatɔ, an ka segi ka taga bɔ o mɔgɔw kelen kelen fɛ walisa k’u hakili jigi seli koo la ani ka labɛn laban kɛ n’u ye.
5 Bibulu kalanden minw tɛ na fɔlɔ lajɛnw na, cogo juman na an be se k’u dɛmɛ u ka na o seli la, ani u ka nafa bɛrɛbɛrɛ sɔrɔ a la? Kalan o kalan kɛtɔ n’u ye, an ka miniti damanin ta k’u dɛmɛ u k’a faamuya ko seli kɔrɔtalen be. An be se ka hakilinata ɲumanw sɔrɔ o baro kama La Tour de Garde kɔnɔ, saan 2004, marisikalo tile 15nan ta, ɲɛɛw 3-5nan, ani gafe Comment raisonner ɲɛɛw 241-245nan kɔnɔ.
6 An ka lonanw bisimila: Hakilijigi seli la, an ka magwɛrɛ lonanw la, ani an k’u bisimila (Rom. 12:13). I ye mɔgɔ minw weele ka na, i ka labɛn kɛ ka sigi u gɛrɛ fɛ. Ani, i ka Bibulu ni dɔnkiligafe di u ma. N’an balima sumalen dɔw y’u jija ka na seli la, an k’a bɔ an yɛrɛ la ka taga u kɔni fo ni dusu diya ye. N’an b’an mako don u la ni kanuya ye, o be se k’u dɛmɛ u ka segi ka jɛnɲɔgɔnya kɛ ni kafo ye tuma o tuma (Luka 15:3-7). Nin seli senuman senuman sen fɛ, an k’an seko bɛɛ kɛ ka mɔgɔw jagwɛlɛya u ka jɛn n’an ye ka barika la Jehova ye a ka “makari [kanuya kantigiman, NW ] kabakoman” kosɔn.—Zab. 31:22.
[Study Questions]
1. Cogo juman na Jehova ye kanuya kantigiman kɛ an ye?
2. Cogoya juman na an be se k’an ka waleɲumanlɔn yira Jehova la?
3, 4. (a) Cogo juman na an be se k’a kɛ komi Liberiya balimaw? (b) E b’a fɛ ka jɔn ni jɔn lo weele u ka na Hakilijigi seli la?
5. Cogo juman na an be se ka Bibulu kalandenw jagwɛlɛya u ka na seli la?
6. Mun na a kɔrɔtalen be an ka lonanw bisimila hakilijigi seli la?