Tile kelen lajɛnba kalan kura

Ɲɛden dilanna cogo cɛɲumanba la (Zab. 139:14). Nka a jɔlen be se ka to fɛɛn kelen dɔrɔn lo kan wagati kelen kɔnɔ. O ye tiɲɛn ye hakilimaya ta fan fɛ fana. N’an b’a fɛ an ka yeli ka gwɛ Alakow ta fan fɛ tuma bɛɛ, Ala sago kɛli ka kan ka kɛ an ɲɛnako fɔlɔ lo ye. Ɲɛnagwɛkow be cayara ka taga Sitanɛ ka duniɲa kɔnɔ. O kama, tile kelen lajɛnba kalan bɛnnen be kosɔbɛ. Waajulibaara saan 2006 kɔnɔ, lajɛnba kalankun bena kɛ “A’ ye aw ɲɛɛ jɔlen to koo kelen kan”!—Mat. 6:22, NW.

An be se ka mun lo kɛ walisa ka Jehova ka dugaw sɔrɔ? (Ntal. 10:22). Kalan nin bena a jaabili di an ma: “Baraji min b’a la n’an b’an ɲɛɛ jɔlen to koo kelen kan.” Balima dɔw bena u ka fɛtaw fɔ k’a yira nafa min be yen Bibulu ka miiriyaw sira tagamani na. Kalankɛla lonan ka kalan fɔlɔ bena kɛ: “Cogo juman na an be se k’an ɲɛɛ jɔlen to koo kelen kan duniɲa juguman kɔnɔ?” A bena an lasɔmi koo dɔw la, minw be se k’an ka ɲɛnamaya fereke, ani k’an bali dɔɔni dɔɔni ka ɲɛtaga sɔrɔ hakilimaya ta fan fɛ. A fana bena a yira an na, a kɔrɔ ye min ye ka “niyɔrɔ ɲuman” sugandi.—Luka 10:42.

Cogo juman na bange-bagaw ni mɔgɔ wɛrɛw be se ka denmisɛnw jija u k’u yɛrɛw di Alakow kɛli ma? Kalan fila ninw bena kuma di bangebagaw ni denmisɛnw ma o koo kan: “Bangebaga minw b’u ka biɲɛkisɛw sin cogo tilennen na” ani “Denmisɛn minw be laɲinitaw latigɛ Alako ta fan fɛ” (Zab. 127:4). Kalankɛla lonan ka kalan laban bena a yira cogo min na an be se ka jɛn ni Jehova ka ɔriganisasiyɔn ye ka tagama: an kelen kelen bɛɛ, an ka denbaya bɛɛ, ani an ka kafo bɛɛ.

N’an ye mɔgɔ kura ye tiɲɛn sira kan wo, n’an be baara kɛra Jehova ye kabini saan caaman wo, a kɔrɔtalen be kosɔbɛ an k’an “ɲɛɛ jɔlen to koo kelen kan.” Tile kelen lajɛnba kalan bena an dɛmɛ k’o lo kɛ.