Ka seereya di n’an ma kuma

¹ Jehova ka danfɛn yetaw b’a ka jogo yebaliw yira an na ka gwɛ hali ni kumaden kelen tɛ mɛn u fɛ (Zab. 19:2-4; Rom. 1:20). O cogo kelen na, an ka tagamacogo ɲuman fɛ, an ka kerecɛnya jogow fɛ, ani an ka fani doncogo fɛ ni majigilenya ye, an be seereya di n’an yɛrɛ ma kuma (1 Piɛre 2:12; 3:1-4). An ka tagamacogo fɛ, an kelen kelen ka kan k’a ɲini ka “an Kisibaa Ala ka kalan bonya ko bɛɛ la.”—Tite 2:10.

² Cogo juman na hadamaden dafabaliw be se ka dɔ fara Bibulu ka kalan cɛɲi kan? O be se ka kɛ Ala ka Kuma dɛmɛ, ani hakili senu ka fanga dɔrɔn lo sababu fɛ (Zab. 119:105; 143:10). “Ala ka kuma ɲɛnama don, a ka teli. A da ka di ka tɛmɛn npan da fila bɛɛ kan.” (Heb. 4:12). A be don ka dunya an dusu kɔnɔ ani a be see di an ma walisa an ka jogo kura don an yɛrɛ la (Kolos. 3:9, 10). Hakili senu b’an dɛmɛ ka jogo ɲumanw dege i n’a fɔ ɲɔgɔnladiya, ɲumanya, sabali, ani yɛrɛminɛli (Gal. 5:22, 23). Yala an b’a to Ala ka Kuma n’a ka hakili senu ka baara kɛ an ka ɲɛnamaya kɔnɔ wa?—Efes. 4:30; 1 Tes. 2:13.

³ Mɔgɔw b’a kɔrɔsi: N’an be Jehova ka sariyaw sira tagama an ka ɲɛnamaya kɔnɔ, ani n’an b’an jija k’a ka jogow dege, mɔgɔ wɛrɛw b’a kɔrɔsi. Ɲɛyirali fɛ, cɛɛ dɔ ka baarakɛɲɔgɔnw tun b’a lɔgɔbɔ sabu a tun ka surun. An balimamuso dɔ tun be baara kɛ n’o cɛɛ ye fana, nka ale tun be danbe ni bonya la cɛɛ kan. O ye cɛɛ lasun k’a ɲininga mun na ale be dan na ni tɔɔw ye. A y’a ɲɛfɔ ko Bibulu ka kalan sira tagamani lo y’a to ale be mɔgɔw bonya. A fana ye Masaya ka jigiya cɛɲumanba kofɔ cɛɛ ye. Cɛɛ y’a daminɛ ka Bibulu kalan, a ye ɲɛtaga sɔrɔ kalan na fɔɔ ka taga batise. A segira a faso la minkɛ, a tagamacogo ɲuman y’a somɔgɔw kabakoya. U caaman fana sɔnna tiɲɛn sira la.

⁴ Baarakɛyɔrɔ la, lakɔliso, wala n’an be jɛnɲɔgɔnya kɛra n’an somɔgɔw n’an sigiɲɔgɔnw ye, an tagamacogo ɲuman n’an ka seereya fɛ, an be se ka mɔgɔw lasun u ka nɔɔrɔ la Ala kan.—Mat. 5:16.