Yala i b’a ɲini ka kalan sigi ni kalanden ka lɔnbagaw ye wa?

N’i be bibulukalan kɛra ni mɔgɔ dɔ ye sisan, mun na i tɛ kalanden ɲininga n’a bena diya a teriw wala a somɔgɔw wala a lɔnbaga dɔw ye ka Bibulu ka kalan lɔn? Tuma caaman na kalanden be mɔgɔ caaman tɔgɔ fɔ. Ni kalanden sɔnna, i be se k’a tɔgɔ fɔ n’i tagara bɔ o mɔgɔw ye walisa ka bibulukalan kofɔ u ye. I be se k’a fɔ dɔrɔn ko: “Bibulu kalan ka di [karisa] ye, ani a y’a miiri ko a bena diya ile fana ye ka nafa sɔrɔ an ka bibulukalan labɛn na. Wariko t’a la.” O kɔ, i ka tɛmɛ gafe Qu’enseigne la Bible ? fɛ ka kalan kɛcogo ɲɛyira a la ka surunya.

N’i ka kalanden dɔ be ɲɛtaga kɛra koɲuman, i be se k’a jija a ka kalan koo ɲɛfɔ a teriw n’a somɔgɔw ye, kalan be se ka diya minw ye. A be se k’u weele u ka na ale ka kalan na. Walima n’a bɛnnen tɛ, a be se ka labɛn kɛ walisa i k’u kunbɛn ani i ka kalan kɛcogo ɲɛyira u la. O kɛcogo be se ka kalanden jija a k’a daminɛ k’a ka lɔnniya tilan ni mɔgɔw ye Bibulu koo la.

I be to ka taga viziti kuraw kɛ mɔgɔ minw fɛ, olu fana be se k’u lɔnbaga dɔw kofɔ i ye hali n’olu yɛrɛw ma sɔn ka bibulukalan kɛ ka tilen n’i ye fɔlɔ. I kɛtɔ ka gafe Qu’enseigne la Bible ? di u ma, i be se k’u ɲininga dɔrɔn ko: “Yala aw be mɔgɔ wɛrɛ lɔn, a bena diya min ye ka gafe nin dɔ sɔrɔ wa?”

Komi kɔrɔtɔba be yen an ka wagati ka koow la, an b’a fɛ ka fɛɛrɛw bɛɛ kɛ ka mɔgɔw dɛmɛ u ka kibaro duman mɛn ani u ka sɔn a la. Yala i b’a ɲini ka kalan sigi ni kalanden ka lɔnbagaw ye wa?