Gafe La Révélation : le grand dénouement est proche !

¹ “Minnu bɛ nin kitabu kiraya kumaw kalan, ani minnu bɛ u lamɛn ka o ko sɛbɛnnenw mara, olu ye dubadenw ye! Katuguni u waati surunyara.” (Jir. 1:3). Nin kumaw b’a yira ka gwɛ ko Jirali ka kitabu nafa ka boon, sanko an ka wagati la. O ye wagati latigɛnen ye, Jirali ka ciraya kuma caaman be dafara min kɔnɔ. A bɛnna cɔ! Saan 2007 kɔnɔ, ka ta zanwiye tile 8nan ka lɔgɔkun ma, an bena a daminɛ ka gafe La Révélation : le grand dénouement est proche ! kalan kafo ka kitabukalanw na.

² Kabi o gafe kalan kɛra ka tɛmɛ kafo ka kitabukalan na, duniɲa cogoya yɛlɛma koo caaman na (1 Kɔr. 7:31). Ka fara o kan, mɔgɔ minw nana fara Masaya kibaro duman waajulikɛlaw kan, u caaman ma Jirali ka kitabu vɛrise kelen-kelen sɛgɛsɛgɛ ka tugu ɲɔgɔnw kɔ ka ye. Gafe La Révélation : dénouement kalan ka ɲi k’an bɛɛ dɛmɛ an ka to ɲɛɛ na ka koo nataw makɔnɔ.—jir. 16:15.

³ I k’i cɛsiri ka kɛ kalan na lɔgɔkun o lɔgɔkun. O kalan tɛna an dɛmɛ an ka to ɲɛɛ na dɔrɔn dɛ. Yesu ka cira minw ɲɛsinna kafo wolonfila ma, u bena an dɛmɛ fana an k’an yɛrɛ tanga koow ni cogoya dɔw ma minw be se k’an mako sa Alako ta fan fɛ ani k’an ka cidenya baara nagasi.—Jir. 1:11, 19.

⁴ I k’i yɛrɛ labɛn koɲuman: Kalan bena kɛ Jirali ka vɛrise minw kan, i k’o vɛrisew lajɛ ka kɔn kitabukalan kelen-kelen ɲɛ. I k’a kɔrɔsi u be tɛmɛ Bibulu fɛ cogo min na ka vɛrisew ɲɛfɔ. I jija ka hakilinataw faamu walisa kalan k’i dusu minɛ (Neh. 8:8, 12). I ka wagati ta ka miiri ani k’i yɛrɛ ɲininga ko: ‘Nin be kalan juman dira ne ma Jehova koo la ani a sagonata dafali koo la? Cogo juman na ne be se ka koow kɛ ka kɛɲɛ n’a sagonata ye ani ka mɔgɔ wɛrɛw dɛmɛ?’

⁵ A saan 92 ye nin ye kabini “Matigi ka don” daminɛna saan 1914 la (Jir. 1:10). Koo kabakoman minw kofɔra Jirali ka kitabu kɔnɔ, u bena dafa yanni dɔɔni. Gafe La Révélation : dénouement kalan bena barika kura don an dusu la. A bena an ka lanaya sabati k’an hakili jigi ko “Ala Sebaayabɛɛtigi ka donba kɛlɛ” ka surun, ani duniɲa kura fana ka surun.—Jir. 16:14; 21:4, 5.