‘A’ ye to ka nin kɛ walisa ka aw hakili to ne la’

Yesu ka saya hakilijigi lajɛn bena kɛ awirili tile 2nan na

¹ Saan 2007, awirilikalo tile 2nan na, mɔgɔ miliyɔn caaman bena lajɛn duniɲa kuru bɛɛ kɔnɔ walisa k’u hakili jigi Yesu ka saya koo la min kɛra saraka ye. Yesu sara sabu a tun ye a sankolola Faa ka masabaya lafasabaga ye. O cogo la, a y’a yira ko Sitanɛ Naafigi ye ngalon tigɛ ko hadamadenw be baara kɛ Ala ye u yɛrɛ ka nafa dɔrɔn kosɔn (Job 2:1-5). Matigi ka surafana b’an hakili jigi fana ko Yesu kɛtɔ k’a niin dafalen jurumuntan saraka, a y’a ‘yɛrɛ di ka kɛ mɔgɔ caaman kunmabɔ sara ye.’ (Mat. 20:28). O lo kosɔn Yesu ye cii di a ka kalandenw ma ko: ‘A’ ye to ka nin kɛ walisa ka aw hakili to ne la.’ (Luka 22:19). O ye Ala ka nilifɛn nafamanba ye dɛ! Yala o waleɲumanlɔn b’i lasun k’a daminɛ k’i yɛrɛ labɛn walisa ka jɛn ni kafo ye k’i hakili jigi o kanuya wale cɛɲumanba koo la wa?—Yuh. 3:16.

² I k’i dusukun cogoya labɛn: N’an be miiri koo minw kɛra Yesu ka loon labanw kelen-kelen na dugukolo kan, o be se k’an dɛmɛ k’an dusukun cogoya labɛn ɲinan ka Hakilijigi lajɛn kama (Esd. 7:10). Walisa k’an dɛmɛ k’o kɛ, porogramu kɛrɛnkɛrɛnnin dɔ kɛra Bibulu kalangwɛ kama. A be sɔrɔ gafenin Examinons les Écritures—2007 kɔnɔ ani Calendrier 2007 kɔnɔ. O kalangwɛ porogramu be bɛn tigitigi loon o loon ka koow ma, minw ɲɛsinna Yesu ka saya ma ka kɛɲɛ ni bi tile ka kalandiriye ye. Bibulu ka lakalita be loon minw kofɔ, u basiginen be Yahutuw ka kalandiriye kan. O kalandiriye kɔnɔ, loonw be daminɛ tileben na ka taga ban tileben wɛrɛ la. U ye u janto o wagati jaticogo la ka Bibulu kalangwɛ porogramu labɛn Hakilijigi wagati kama. An kɛtɔ k’o kunnafoniw lajɛ ani ka miiri delili la cogo min na Ala ka kanuya ka dun, o bena an dɛmɛ ka nafa bɛrɛbɛrɛ sɔrɔ Hakilijigi koo la.

³ An ka mɔgɔw weele u ka na o lajɛn na: Feburukalo ka An ka Masaya Cidenyabaara ɲɛɛ 3-6nan tun y’a fɔ ko kanpaɲi kɛrɛnkɛrɛnnin dɔ bena kɛ ka mɔgɔw weele ka na o kooba la. Yala i ye labɛn kɛ walisa k’i sen don bɛrɛbɛrɛ o kanpaɲi la wa? Yala i ye i lɔnbagaw tɔgɔw sɛbɛ, i b’a fɛ ka minw weele ka na o lajɛn na wa? Ani yala i y’a daminɛ ka kaan bɔ u ma wa? I ka labɛn kɛ ka kɔn ka na joona Hakilijigi lajɛn loon wula fɛ walisa ka mɔgɔw bisimila, i ye minw weele ka na ani makodon mɔgɔ wɛrɛw fana. I be se ka sigi u gɛrɛ fɛ ani i k’i janto a la ko Bibulu ni dɔnkiligafe be sɔrɔ u fɛ. I k’u yira balima wɛrɛw la. Lajɛn bannen kɔ, i ka wagati ta k’u ka ɲiningaliw jaabi. I k’u weele ka na foroba kalan kɛrɛnkɛrɛnnin lamɛn min bena di awirili tile 15nan na. Diinan mɔgɔkɔrɔw kɔni ka kan k’u janto ko kafoden sumalenw ye welekan sɔrɔ ka na Hakilijigi lajɛn na, ani foroba kalan kɛrɛnkɛrɛnnin na.

⁴ An ka mɔgɔ kuraw ni sumalenw dɛmɛ u ka ɲɛtaga sɔrɔ: Hakilijigi lajɛn kalankɛla bena a ɲɛfɔ ka surunya ko an be Bibulu kalan kɛ ni mɔgɔw ye, wariko t’a la. Ani a bena mɔgɔ kuraw jija u ka to ka Jehova lɔn ka taga ɲɛ. I be se ka basigi a ka kumaw kan k’i ka mɔgɔ weelenenw jija u k’a ɲini ka dɔ fara u ka lɔnniya kan Jehova koo la. N’u ma bibulukalan daminɛ fɔlɔ, i janto ka taga bɔ u ye joona Hakilijigi lajɛn tɛmɛnen kɔ. Ani, i k’a yira cogo min na an be bibulukalan kɛ ni mɔgɔw ye gwansan. Walisa u ka ɲɛtaga sɔrɔ Alako ta fan fɛ, u ka ɲi ka na kafo ka lajɛnw na (Heb. 10:24, 25). O kama, i k’u jija u k’a daminɛ ka na lajɛnw na tuma o tuma. Kerecɛn sumalen minw nana Hakilijigi lajɛn na, diinan mɔgɔkɔrɔw ka kan ka taga bɔ u ye ani k’u dɛmɛ u ka miiri tugu kalan ka miiriyaw kan Kosɔbɛ. O be se k’u jija u ka segi ka baara kɛ kafo kɔnɔ.

⁵ Hakilijigi lajɛn be cogoya di an ma an ka miiri kosɔbɛ k’a filɛ Jehova ni Yesu ye min kɛ an ye. O miirili ɲɔgɔn b’a to an ka kanuya be dunya u fan fɛ, ani a be nɔɔ to an tagamacogo kan (2 Kɔr. 5:14, 15; 1 Yuh. 4:11). Sisan lo an ka ɲi k’a daminɛ k’an yɛrɛ labɛn ani ka makodon mɔgɔw fana labɛn o kooba kama min sen fɛ an be ‘Matigi saya kofɔ.’—1 Kɔr. 11:26.

[Study Questions]

1. Mun na saan 2007, awirili tile 2nan ye loonba ye?

2. An be se k’an dusukun cogoya labɛn Hakilijigi lajɛn kama cogo di?

3. An be se ka makodon mɔgɔw ni sumalenw dɛmɛ cogo di ka nafa sɔrɔ Hakilijigi lajɛn na?

4. Hakilijigi lajɛn kɛnen kɔ, an be se ka mɔgɔw dɛmɛ cogo di u ka ɲɛtaga sɔrɔ Alako ta fan fɛ?

5. Hakilijigi lajɛn be se k’an nafa cogo di?