“I bena o jaabi cogo di?”
1 Yala Ala ka Kuma koo ka di i ye wa? Ani yala a ka gwɛlɛ i fɛ k’i hakili jigi tigitigi Bibulu ka maana dɔw la, wala yɔrɔ min na kuma dɔw sɛbɛra Bibulu kɔnɔ wa? Yala i b’a fɛ i deenw ka Bibulu kɔnɔkow dɔw ani kalan jɔnjɔn faamu bɛrɛbɛrɛ wa? Barokun nin be se ka denmisɛnw ni hali balikuw dɛmɛ ka Ala ka Kuma lɔn ka ɲɛ. A kun ko: “Que répondriez-vous ?” (“I bena o jaabi cogo di?”). A be bɔ Réveillez-vous ! ɲɛɛ 31nan kɔnɔ kalo o kalo.—Kɛw. 17:11.
2 Cogo fisaman juman na i be se ka baara kɛ n’o barokun ye? Saan 2006, zanwiyekalo ka Réveillez-vous ! tun ye ladili nin di ko: “A’ ye wagati dɔɔni ta ka ɲɛɛ 31 lajɛ. A barokun dɔw bena diya denmisɛnw ye. Dɔ wɛrɛw bena Bibulu kalandenw ka lɔnniya kɔrɔbɔ, minw janfara ka ban u ka kalan na. Barokun “Situez dans le temps” (O kɛra tuma juman?) bena i dɛmɛ k’a sɛbɛ ka tugutugu ɲɔgɔn kɔ tuma min na Bibulu ka mɔgɔ kofɔlen dɔw y’u ka ɲɛnamaya kɛ, ani tuma min na kooba dɔw kɛra. Ɲiningali caamanba minw kɛra, u ka jaabili be sɔrɔ zurunali ɲɛɛ wɛrɛ la min kofɔra aw ye, ani u sɛbɛra ka yɛlɛma ɲɛjugu kan. Ɲiningali minw be sɔrɔ barokun “Dans ce numéro” kɔnɔ, olu ka jaabiliw be sɔrɔ yɔrɔ min na Réveillez-vous ! be baro kɛ o kan. Mun na i tɛ sɛgɛsɛgɛri kɛ fɔlɔ ka sɔrɔ ka jaabiliw kalan? O kɔ, i be se k’i ka lɔnniya tilan ni mɔgɔ wɛrɛw ye. I yɛrɛ be se ka baara kɛ ni zurunali ɲɛɛ 31 ye walisa ka baro kɛ Bibulu kan denbaya kɔnɔ wala jɛnkulu dɔ kɔnɔ.”
3 Tiɲɛn na, a ka di denbaya caaman ye ka baara kɛ n’o barokun ye gwakalan kɛtɔ. Bamusoman dɔ y’a sɛbɛ ko: “Ne ni n’ cɛɛ y’a miiri ko a bena kɛ koo ɲuman ye ka barokun ‘Aux enfants de chercher !’ lajɛ an ka gwakalan na walisa ka kalan diya don an denmuso la min be ni saan saba ye. Yɛlɛko lo an fɛ k’a ye ko a ɲagalilenba lo k’a tɔgɔla Réveillez-vous ! ta ani k’a ɲɛɛw yɛlɛ-yɛlɛ fɔɔ ka taga se a be yɔrɔ min ɲinina.” Berezil jamana na, facɛman dɔ b’a fɔ ko: “O barokun ka di kosɔbɛ ne ni n’ dencɛ Musa ye min be ni saan wolonfila ye. A y’a dɛmɛ a k’a ɲɛmalɔ, ka vɛrisew ɲini ka sɔrɔ Bibulu kɔnɔ, ani ka jaaw ni wagatiw faamu.” Ashley, min be ni saan seegi ye, y’a sɛbɛ ko: “A ni ce barokun nin na min be sɔrɔ Réveillez-vous ! laban na: ‘Que répondriez-vous ?’ Ne ye koo caaman lɔn Bibulu kɔnɔ o sababu fɛ.”
4 Mun na aw tɛ baara kɛ ni barokun ‘Que répondriez-vous ?’ ye gwakalan na tuma dɔw la do? Aw be se ka baara kɛ ni Index ye wala CD-ROM Watchtower Library ye ka ɲiningali gwɛlɛman dɔw ka jaabiliw ɲini. O cogo la, aw bena aw deenw degi sɛgɛsɛgɛri kɛcogo la. Ni deen kɔrɔbalenw be aw fɛ, mun na aw tɛ baara gwɛlɛman di olu ma u ka ɲiningali ninw ka jaabili ɲini ka kɔn gwakalan ɲɛ: “Qui suis-je?” wala “Situez dans le temps.” O kɔ, u ye min sɔrɔ, u be se k’o tilan ni tɔɔw ye kalan tuma na. Baara kɛtɔ bɛrɛbɛrɛ n’o barokunw ye, bangebagaw be se ka Ala ka Kuma don u deenw kuun na ani k’u dɛmɛ ka “Kitabu senumaw” lɔn kabini u denmisɛnman.—2 Tim. 3:15; Dut. 6:7.
[Study Questions]
1. An caaman be gwɛlɛya jumanw kunbɛn do?
2. I be se ka baara kɛ ni barokun “Que répondriez-vous ?” kɔnɔkow ye cogo di?
3. Barokun minw kofɔra, u be denbaya dɔw nafa cogo di? Jumanw lo ka di aw ye ka tɛmɛ tɔɔw kan?
4. Denbaya be se ka baara kɛ n’o barokun ye cogo di walisa ka dɔ fara gwakalan diya kan?