A’ ye to ka “den caman kɛ”
1 Yesu y’a yɛrɛ kofɔ ntalen kumaw fɛ i ko rezɛnsun sɔbɛ, a Faa y’a sɛnɛbaga ye, ani a ka kalanden mɔlenw ye rezɛnsunbolow ye minw be deen kɛ. Yesu kɛtɔ ka sɛnɛkɛla ka baara lakali ntalen kumaw fɛ, a sinsinna a kan ko a kɔrɔtalen lo an nɔɔrɔlen ka to koɲuman rezɛnsun na (Yuh. 15:1-4). O ntalen kumaw kɔrɔ ko mɔgɔ o mɔgɔ be jɛnɲɔgɔnya teriman kɛ ni Jehova ye, o tigi ka kan ka kɛ i ko “rezɛnsun sɛbɛ” bolo min be deen kɛ. O “rezɛnsun sɛbɛ” ye Yesu Krista lo ye. An ka kan ka to ka Hakili Senu deen caaman kɛ, ani ka kisɛya Masaya waajuli baara la.—Gal. 5:22, 23; Mat. 24:14; 28:19, 20.
2 Hakili Senu deen: An ye ɲɛtaga min sɔrɔ Alako ta fan fɛ, o fanba be ye Hakili Senu deen yiracogo fɛ. Yala i b’i jija ka kɛ ni Hakili Senu deen ye ani k’o yiriwa, i kɛtɔ ka Ala ka Kuma kalan ani ka miiri a kan tuma o tuma wa? (Fil. 1:9-11). I kana sigasiga ka Hakili Senu deli Ala fɛ. A be se k’i dɛmɛ i ka kɛ ni jogow ye, minw be nɔɔrɔ la Jehova kan, ani i ka to ka ɲɛtaga kɛ Alako ta fan fɛ.—Luka 11:13; Yuh. 13:35.
3 N’an be Hakili Senu deen kɛ an yɛrɛ la ani n’an b’a yiriwa, o bena an dɛmɛ fana an ka dɔ fara an ka kisɛya kan cidenya baara la. Ɲɛyirali fɛ, hali n’an bolo degunnen lo, kanuya ni limaniya b’an lasun an ka wagati kunmabɔ walisa k’an seen don cidenya baara la tuma o tuma. Hɛɛrɛ, muɲuli, hinɛ, sabali, ani yɛrɛminɛli ye jogow ye minw b’an dɛmɛ k’an juguw jaabi cogo bɛnnen na. Ɲagali b’a to an be wasa cidenya baara la, hali ni mɔgɔw tɛ sɔn ka lamɛnni kɛ.
4 An ka kisɛya Masaya waajuli baara la: An fana b’a fɛ ka kisɛya Masaya waajuli baara la. O kɔrɔ ko: “Ka tanuli sarakaw bɔ Ala ye, o kɔrɔ, an ka [Jehova] tɔgɔ tanu an da la tuma bɛɛ.” (Heb. 13:15). An b’o kɛ, n’an b’an cɛsiri ka kibaro duman waaju ni kisɛya ye. Yala i b’i jijara ka kisɛya Masaya baaraw la ka tɛmɛ fɔlɔ kan, i kɛtɔ k’i ka cidenya baara kɛcogo fisaya wa?
5 Yesu y’a yira ko a ka kalanden kantigimanw tun bena deen sifa caaman kɛ (Mat. 13:23). O kama an man kan k’an yɛrɛ suma ni mɔgɔ wɛrɛw ye. Nka an ka kan k’an seko fisaman kɛ Jehova ka baara la (Gal. 6:4). N’an be tɛmɛ Ala ka Kuma fɛ k’an yɛrɛ cogoya sɛgɛsɛgɛ ni kɔnɔgwɛ ye, o bena an dɛmɛ an ka to ka nɔɔrɔ la Jehova kan an kɛtɔ ka “den caman kɛ”.—Yuh. 15:8.