I k’a laɲini ka bibulukalan kɛ ni mɔgɔw ye

¹ “Aw ka aw ɲɛw kɔrɔta ka forow filɛ. Suman kɔgɔra, a tigɛ tuma sera ka ban.” (Yuh. 4:35) Nin kumaw ye Yesu darakan lo ye. Siga si t’a la, o kumaw fana ɲɛsinna kerecɛnw ka cidenya baara ma bi tile la.

² Hali bi, an be mɔgɔ kɔnɔgwɛw sɔrɔ minw b’a fɛ ka kalan Jehova ka siraw la. Kalanden kuraw hakɛ minw be batɛmu ta saan o saan lajɛnbaw la, o b’a yira ka gwɛ ko mɔgɔ kɔnɔgwɛ be sɔrɔ hali bi. N’a nege b’i la sɔbɛ la ka bibulukalan kɛ ni mɔgɔw ye, i be se k’a latigɛ ka mun lo kɛ?

³ Laɲinita dɔ latigɛ: Fɔlɔ, i k’a laɲini ka bibulukalan daminɛ ni mɔgɔw ye ani k’a kɛ tuma o tuma. N’i be waajuli la, i ka laɲinita to i hakili la. An ka kerecɛn cidenya baara tɛ dan waajuli dɔrɔn ma. Nka, an fana ka ɲi ka mɔgɔw kalan. O kama, an bɛɛ ka kan k’a ɲini ka dɔ fara an ka bibulukalan baara kan.—Mat. 24:14; 28:19, 20.

⁴ Koo ninw fana to i hakili la: Masaya weleweledalaw mako b’a la ka delili kɛ ni kɔnɔgwɛ ye. Tuma dɔw la, an be mɔgɔ dɔw sɔrɔ minw ye delili kɛ walisa dɔ k’u dɛmɛ ka Alakow faamu. Jehova ka tɛmɛ an fɛ k’o ɲɔgɔnna mɔgɔw sɔrɔ ani k’u kalan, o ye duba ye dɛ!—Agize 2:7; Kɛw. 10:1, 2.

⁵ Balimamuso dɔ ye delili kɛ walisa ka bibulukalan sɔrɔ. O kɔ, sɛbɛnin min kuun ko: Yala i b’a fɛ ka dɔ fara i ka lɔnniya kan Bibulu koo la wa?, a y’o dɔw bila mɔgɔw ɲɛɛ kɔrɔ a ka baara kɛyɔrɔ la. Muso dɔ y’o sɛbɛnin kelen ta, k’a bɛɛ kalan, ani k’a daminɛ ka kupɔn dafa. O tuma na balimamuso kumana a fɛ ani a sera ka bibulukalan daminɛ n’a ye.

⁶ Weleweledala minw be se bibulukalan daminɛcogo n’a kɛcogo la, olu be se k’i jija k’i ka laɲinita dafa, o min ye ka bibulukalan kɛ ni mɔgɔw ye. I be jijali minw kɛra walisa ka bibulukalan sɔrɔ, Ala deli sɔbɛ la a k’u duba. Dɛmɛ minw bɛɛ labilara i ye, i ka tɛmɛ fana o sababu fɛ k’i ka laɲinita dafa. N’a sɔrɔ yanni dɔɔni, i bena ninsɔndiya ka bibulukalan kɛ ni mɔgɔw ye.